చుక్క పెట్రోల్ అవసరం లేకుండా 421 కిమీ.. రూ.10 లక్షల లోపు బెస్ట్ ఎలక్ట్రిక్ కార్లు ఇవే

పెట్రోల్, డీజిల్ ధరలు మండిపోతున్న ప్రస్తుత రోజుల్లో సామాన్యుడి చూపు ఇప్పుడు ఎలక్ట్రిక్ వాహనాల వైపు మళ్లుతోంది. కాలుష్యం లేకపోవడం, మెయింటెనెన్స్ ఖర్చు తక్కువగా ఉండడంతో చాలా మంది ఈవీల కొనుగోలుకు మొగ్గు చూపుతున్నారు. అయితే ఎలక్ట్రిక్ కార్లు అంటే చాలా ఖరీదైనవి అనే అపోహ చాలా మందిలో ఉంది.

కానీ ఇప్పుడు మార్కెట్లోకి మధ్య తరగతి ప్రజల బడ్జెట్‎కు సరిపోయేలా రూ.10లక్షల లోపే అద్భుతమైన ఎలక్ట్రిక్ కార్లు అందుబాటులోకి వచ్చాయి. దేశంలో ప్రస్తుతం తక్కువ ధరలో లభిస్తున్న టాప్ 3 ఎలక్ట్రిక్ కార్ల వివరాలు తెలుసుకుందాం.

భారతీయ ఆటోమొబైల్ మార్కెట్లో ఎలక్ట్రిక్ విప్లవం కొనసాగుతోంది. ఒకప్పుడు ఎలక్ట్రిక్ కార్లు అంటే లక్షల్లో ఖర్చు పెట్టాలని భయపడేవారు. కానీ ఇప్పుడు ప్రభుత్వ సబ్సిడీలు, పెరుగుతున్న డిమాండ్ వల్ల కంపెనీలు సామాన్యుల కోసం బడ్జెట్ కార్లను ప్రవేశపెట్టాయి. ఈ క్రమంలో ఎంజీ మోటార్స్, టాటా మోటార్స్ అగ్రగామిగా నిలుస్తున్నాయి.

1. ఎంజీ కామెట్ ఈవీ (MG Comet EV): ప్రస్తుతం భారతదేశంలో లభిస్తున్న అత్యంత చౌకైన ఎలక్ట్రిక్ కార్లలో ఇది మొదటి స్థానంలో ఉంది. ఈ కారు ప్రారంభ ధర కేవలం రూ.7.50 లక్షలు (ఎక్స్-షోరూమ్). ఈ కారు చూసేందుకు చాలా చిన్నగా ఉన్నా లోపల ఫీచర్లు మాత్రం అద్భుతంగా ఉంటాయి.

ఈ కారులో 17.3 kWh బ్యాటరీని అమర్చారు. ఒక్కసారి ఫుల్ ఛార్జ్ చేస్తే 230 కిలోమీటర్ల రేంజ్ అందిస్తుంది. ఇరుకైన రోడ్లు ఉండే నగరాల్లో, రద్దీ ట్రాఫిక్కులో డ్రైవింగ్ చేసేందుకు, ఆఫీసు అవసరాలకు ఇది చాలా అనుకూలంగా ఉంటుంది. ఇందులో డ్యూయల్ స్క్రీన్ సెటప్, కీ లెస్ ఎంట్రీ వంటి స్మార్ట్ ఫీచర్లు కూడా ఉన్నాయి.

2. టాటా టియాగో ఈవీ (Tata Tiago EV): ఇండియాలో టాటా అంటేనే నమ్మకం. అలాంటి నమ్మకమైన బ్రాండ్ నుంచి తక్కువ ధరలో కారు కావాలనుకునే వారికి టాటా టియాగో ఈవీ ఒక గొప్ప వరం. దీని ప్రారంభ ధర రూ.7.99 లక్షలు. టియాగో ఈవీ రెండు రకాల బ్యాటరీ ఆప్షన్లలో లభిస్తుంది.

దీని రేంజ్ 250 కిలోమీటర్ల నుంచి 315 కిలోమీటర్ల వరకు ఉంటుంది. ఈ కారులో ఫాస్ట్ ఛార్జింగ్ సదుపాయం కూడా ఉంది. దీనివల్ల కేవలం 58 నిమిషాల్లోనే 10 నుంచి 80 శాతం బ్యాటరీ ఛార్జ్ అవుతుంది. సేఫ్టీ విషయంలో కూడా టాటా రాజీ పడలేదు. ఇందులో డ్యూయల్ ఎయిర్ బ్యాగ్స్, ఏబీఎస్ వంటి ఫీచర్లు ఉన్నాయి.

3. టాటా పంచ్ ఈవీ (Tata Punch EV): ఎస్ యూవీ (SUV) మోడల్ కార్లు ఇష్టపడే వారికి టాటా పంచ్ ఈవీ సరైన ఎంపిక. దీని ప్రారంభ ధర రూ.9.99 లక్షలు. రూ.10 లక్షల లోపే లభించే అత్యంత శక్తివంతమైన ఎలక్ట్రిక్ కారుగా దీనిని చెప్పవచ్చు. ఇది ఏకంగా 315 కిలోమీటర్ల నుండి 421 కిలోమీటర్ల వరకు భారీ రేంజ్‌ను ఇస్తుంది.

అంటే సిటీల్లోనే కాకుండా దూర ప్రయాణాలకు కూడా దీనిని ధైర్యంగా వాడుకోవచ్చు. ఇందులో 6 ఎయిర్‌బ్యాగ్‌లు, వైర్‌లెస్ ఆండ్రాయిడ్ ఆటో/యాపిల్ కార్‌ప్లే, డిజిటల్ డ్రైవర్ డిస్ప్లే వంటి అడ్వాన్స్‌డ్ ఫీచర్లు ఉన్నాయి. 56 నిమిషాల్లోనే దీనిని ఫాస్ట్ ఛార్జ్ చేసుకోవచ్చు.

ఎవరు ఏది కొనాలి?
మీరు కేవలం సిటీలో తిరగడానికి, పార్కింగ్ సమస్యలు లేకుండా ఉండాలని కోరుకుంటే ఎంజీ కామెట్ బెస్ట్. తక్కువ ఖర్చులో ఫ్యామిలీ కోసం కారు కావాలనుకుంటే టియాగో ఈవీని ఎంచుకోవచ్చు. అలా కాకుండా మంచి గ్రౌండ్ క్లియరెన్స్, భారీ రేంజ్, ఎస్ యూవీ లుక్ కావాలనుకునే వారు టాటా పంచ్ ఈవీని కళ్లు మూసుకుని కొనేయవచ్చు. ఎలక్ట్రిక్ వాహనాలు కొనేటప్పుడు మీ ఇంటి దగ్గర ఛార్జింగ్ సౌకర్యం ఉందో లేదో ఒకసారి సరిచూసుకోవడం మంచిది.