పదే పదే యాక్సిలేటర్ తొక్కాల్సిన పనిలేదు.. బడ్జెట్ ధరలో దొరికే టాప్ 4 క్రూయిజ్ కంట్రోల్ కార్స్ ఇవే

మారుతున్న కాలానికి అనుగుణంగా భారతీయ వాహనదారులు కార్లతో అత్యాధునిక ఫీచర్లను కోరుకుంటున్నారు. ముఖ్యంగా హైవేలపై సుదీర్ఘ ప్రయాణాలు చేసేటప్పుడు డ్రైవర్లకు అలసట లేకుండా ఉండేందుకు కార్ కంపెనీలు క్రూజ్ కంట్రోల్ (Cruise Control) అనే అద్భుతమైన ఫీచర్‌ను అందిస్తున్నాయి.

ఈ ఫీచర్ సహాయంతో మనం ఒక నిర్దిష్ట వేగాన్ని సెట్ చేసుకుంటే, యాక్సిలరేటర్ పెడల్‌పై కాలు పెట్టాల్సిన అవసరం లేకుండానే కారు అదే స్పీడ్‌తో ముందుకు సాగుతుంది. ఒకప్పుడు కేవలం ఖరీదైన లగ్జరీ కార్లకే పరిమితమైన ఈ ఫీచర్.. ఇప్పుడు సామాన్యుడికి అందుబాటులో ఉండే బడ్జెట్ కార్లలోనూ లభిస్తోంది. భారత మార్కెట్లో లభిస్తున్న టాప్ 4 అఫోర్డబుల్ క్రూజ్ కంట్రోల్ కార్ల వివరాలు తెలుసుకుందాం.

1. టాటా టియాగో (Tata Tiago)
భారత మార్కెట్లో క్రూజ్ కంట్రోల్ ఫీచర్‌ను అందిస్తున్న అత్యంత చౌకైన హ్యాచ్‌బ్యాక్ కార్లలో టాటా టియాగో మొదటి వరుసలో ఉంటుంది. టాటా మోటార్స్ ఇటీవల ఈ పాపులర్ కార్కు ఒక పెద్ద అప్‌డేట్‌ను ఇచ్చింది. ఇందులో క్రూజ్ కంట్రోల్‌తో పాటు వైర్‌లెస్ స్మార్ట్‌ఫోన్ చార్జింగ్, పవర్ఫుల్ 65W యూఎస్‌బీ టైప్-సి పోర్ట్, వెనుక ప్రయాణికుల కోసం రియర్ ఏసీ వెంట్స్ వంటి ఆధునిక ఫీచర్లను జోడించింది.

ఈ కార్లో 1.2 లీటర్, 3 సిలిండర్ రెవోట్రాన్ పెట్రోల్ ఇంజన్‌ను వాడారు, ఇది 86 హార్స్‌పవర్, 113Nm టాక్‌ను ఉత్పత్తి చేస్తుంది. ఇది 5-స్పీడ్ మాన్యువల్, ఏఎంటీ ఆటోమేటిక్ గేర్‌బాక్స్ ఆప్షన్లలో లభిస్తుంది. టియాగోలో క్రూజ్ కంట్రోల్ ఫీచర్ ఉన్న వేరియంట్ ప్రారంభ ధర కేవలం రూ.5.99 లక్షలు (ఎక్స్-షోరూమ్)గా ఉంది.

2. టాటా పంచ్ (Tata Punch)
భారతదేశంలో అత్యధికంగా అమ్ముడవుతున్న బెస్ట్ సెల్లింగ్ మైక్రో ఎస్‌యూవీ టాటా పంచ్ కూడా తక్కువ ధరలోనే క్రూజ్ కంట్రోల్ ఫీచర్‌ను ఆఫర్ చేస్తోంది. కంపెనీ ఈ ఫీచర్‌ను ప్యూర్+ (Pure+) వేరియంట్ నుంచి కస్టమర్లకు అందుబాటులోకి తెచ్చింది. దీని ఎక్స్-షోరూమ్ ధర రూ. 7 లక్షల నుంచి ప్రారంభమవుతుంది.

టాటా పంచ్ ప్రత్యేకత ఏమిటంటే.. క్రూజ్ కంట్రోల్ ఫీచర్‌తో పాటు అత్యధిక వేరియంట్ ఆప్షన్లను అందిస్తున్న కారు ఇదే. దీనిలో 1.2 లీటర్ నేచురల్లీ ఆస్పిరేటెడ్ పెట్రోల్ ఇంజన్‌ను అమర్చారు, ఇది 88 హార్స్‌పవర్ శక్తిని ఇస్తుంది. మైలేజ్ లవర్స్ కోసం ఈ కార్ సిఎన్‌జి (CNG) వేరియంట్లో కూడా లభిస్తుంది, ఇది 74 హార్స్‌పవర్ పవర్‌ను జనరేట్ చేస్తుంది.

3. టాటా ఆల్ట్రోజ్ (Tata Altroz)
టాటా సంస్థకు చెందిన ప్రీమియం హ్యాచ్‌బ్యాక్ కార్ టాటా ఆల్ట్రోజ్ సురక్షితమైన ప్రయాణానికి, అదిరిపోయే లుక్స్‌కు కేరాఫ్ అడ్రస్‌గా నిలుస్తుంది. ఈ కార్లో లాంగ్ జర్నీలను మరింత సుఖవంతం చేయడానికి కంపెనీ క్రూజ్ కంట్రోల్ ఫీచర్‌ను ప్యూర్ ఎస్ (Pure S) వేరియంట్ నుంచి అందిస్తోంది. ఈ ప్రత్యేక వేరియంట్ ప్రారంభ ధర రూ. 7.41 లక్షలు (ఎక్స్-షోరూమ్) గా నిర్ణయించబడింది.

ఆల్ట్రోజ్ కారు 1.2 లీటర్ రెవోట్రాన్ పెట్రోల్ ఇంజన్ (86 BHP పవర్, 115Nm టాక్), పవర్‌ఫుల్ 1.5 లీటర్ టర్బో డీజిల్ ఇంజన్ (88 BHP పవర్, 200Nm టాక్) ఆప్షన్లలో లభిస్తుంది. దీనిలో 5-స్పీడ్ మాన్యువల్, ఏఎంటీ, అధునాతన 6-స్పీడ్ డ్యూయల్-క్లచ్ ఆటోమేటిక్ (DCA) ట్రాన్స్‌మిషన్లు అందుబాటులో ఉన్నాయి.

4. మారుతి సుజుకీ బాలెనో (Maruti Suzuki Baleno)
భారతదేశపు అతిపెద్ద కార్ల తయారీ సంస్థ మారుతి సుజుకికి చెందిన అత్యంత ప్రజాదరణ పొందిన ప్రీమియం హ్యాచ్‌బ్యాక్ బాలెనో. ఈ కారు టాప్-ఎండ్ వేరియంట్లలో కంపెనీ క్రూజ్ కంట్రోల్ ఫీచర్‌ను అందిస్తోంది. ఈ ఫీచర్ కలిగిన బాలెనో వేరియంట్ ప్రారంభ ధర రూ. 8.59 లక్షలు (ఎక్స్-షోరూమ్)గా ఉంది.

ఈ కార్లో 1.2 లీటర్, 4 సిలిండర్ నేచురల్లీ ఆస్పిరేటెడ్ పెట్రోల్ ఇంజన్‌ను ఉపయోగించారు. ఇది 88 BHP గరిష్ట శక్తిని, 113Nm టాక్‌ను చాలా లీనయర్‌గా అందిస్తుంది. ఈ ఇంజన్‌తో పాటు స్మూత్ డ్రైవింగ్ కోసం 5-స్పీడ్ మాన్యువల్, ఏఎంటీ ఆటోమేటిక్ గేర్‌బాక్స్ ఆప్షన్లు కస్టమర్లకు లభిస్తాయి. బడ్జెట్ ధరలో లగ్జరీ ఫీచర్, బెస్ట్ రీసేల్ వాల్యూ కావాలనుకునే వారికి బాలెనో ఒక పర్ఫెక్ట్ ఛాయిస్.