E20 పెట్రోల్ కార్ల కొనుగోలుదారులకు గుడ్ న్యూస్.. 10 ఏళ్ల వరకు వారంటీ ఇస్తున్న టాప్ 5 బ్రాండ్లు ఇవే

ప్రస్తుతం మార్కెట్లో E20 పెట్రోల్ వాడకంపై ఎన్నో రకాల అపోహలు ప్రచారంలో ఉన్నప్పటికీ, భారతదేశంలోని ప్రధాన కార్ల తయారీ సంస్థలు కస్టమర్లకు గట్టి భరోసా ఇస్తున్నాయి. వాహనదారులకు మానసిక ప్రశాంతతను చేకూర్చేలా అద్భుతమైన స్టాండర్డ్ వారంటీలతో పాటు సుదీర్ఘమైన ఎక్స్‌టెండెడ్ వారంటీ ప్రోగ్రామ్‌లను ఆఫర్ చేస్తున్నాయి. కొన్ని బ్రాండ్లు అయితే ఏకంగా 10 ఏళ్ల వరకు వారంటీ కవరేజీని అందిస్తూ, లాంగ్ టర్మ్ ఓనర్‌షిప్ కోరుకునే వారికి బెస్ట్ ఆప్షన్‌గా నిలుస్తున్నాయి. మన దేశంలో E20 కార్లపై అత్యధిక కాలం ఎక్స్‌టెండెడ్ వారంటీ ఇస్తున్న టాప్ 5 కార్ల బ్రాండ్ల వివరాలను తెలుసుకుందాం.

1. హోండా కార్స్ ఇండియా (Honda Cars India)
భారతదేశంలో లాంగ్ టర్మ్ వారంటీ ఇవ్వడంలో హోండా కార్స్ ఇండియా మొదటి స్థానంలో నిలుస్తుంది. హోండా తన అన్ని మోడళ్ల కార్లపై ప్రాథమికంగా ఎలాంటి కిలోమీటర్ల పరిమితి లేకుండా 3 సంవత్సరాల స్టాండర్డ్ వారంటీని ఉచితంగా అందిస్తుంది. అయితే, కస్టమర్లు ఈ వారంటీ కాలాన్ని స్టాండర్డ్ వారంటీతో కలిపి ఏకంగా 10 సంవత్సరాల వరకు పొడిగించుకునే సదుపాయాన్ని కల్పించింది.

ఈ కంపెనీ అందిస్తున్న ప్రత్యేకమైన ఎనీ టైమ్ వారంటీ ప్రోగ్రామ్ ద్వారా.. స్టాండర్డ్ వారంటీ లేదా పాత ఎక్స్‌టెండెడ్ వారంటీ గడువు ముగిసిపోయిన తర్వాత కూడా కస్టమర్లు కొత్తగా వారంటీని కొనుగోలు చేయవచ్చు. ఈ వారంటీ వ్యవధిలో కారులో ఏదైనా అర్హత కలిగిన విడిభాగం పాడైతే, లేబర్ ఛార్జీలు లేదా పార్ట్స్ ఖర్చు లేకుండా ఉచితంగా రిపేర్ లేదా రీప్లేస్‌మెంట్ చేస్తారు. అయితే స్టాండర్డ్ వారంటీ ముగిసిన తర్వాత ఈ ప్లాన్ కొంటే ప్రీమియం ధర కాస్త ఎక్కువగా ఉంటుందని గమనించాలి.

2. నిస్సాన్ ఇండియా (Nissan India)
జపాన్ కార్ల తయారీ సంస్థ నిస్సాన్ ఇండియా కూడా తన కస్టమర్లకు 10 సంవత్సరాల గరిష్ట వారంటీ రక్షణను అందిస్తోంది. సాధారణంగా నిస్సాన్ కొత్త కార్లపై 3 సంవత్సరాలు లేదా 1,00,000 కిలోమీటర్ల స్టాండర్డ్ వారంటీ లభిస్తుంది. దీనిని మరింత పొడిగించాలనుకునే వారి కోసం నిస్సాన్ ఎక్స్‌టెండెడ్ వారంటీ ప్రోగ్రామ్‌ను తెచ్చింది. దీని ద్వారా బేస్ వారంటీకి అదనంగా మరో 7 సంవత్సరాలు లేదా 2,00,000 కిలోమీటర్ల వరకు కవరేజీని పెంచుకోవచ్చు.

మొత్తంగా చూసుకుంటే కస్టమర్‌కు 10 ఏళ్ల వరకు అయాచిత రిపేర్ ఖర్చుల నుంచి ఉపశమనం లభిస్తుంది. ప్రస్తుతం మార్కెట్లో ఉన్న నిస్సాన్ మ్యాగ్నైట్, కొత్తగా లాంచ్ చేసిన గ్రావైట్ కార్లకు ఈ ఆఫర్ వర్తిస్తుంది. అంతేకాకుండా, భవిష్యత్తులో రాబోయే టెక్టాన్ కాంపాక్ట్ ఎస్‌యూవీకి కూడా ఇదే 10 ఏళ్ల వారంటీ ప్లాన్ వర్తింపజేసే అవకాశం ఉంది.

3. హ్యుందాయ్ మోటార్ ఇండియా (Hyundai)
దక్షిణ కొరియా ఆటో దిగ్గజం హ్యుందాయ్ మోటార్ ఇండియా సైతం తన వాహనాల శ్రేణిపై నమ్మకమైన ఎక్స్‌టెండెడ్ వారంటీ ప్రోగ్రామ్‌ను నడుపుతోంది. సాధారణ ఆపరేటింగ్ పరిస్థితుల్లో వచ్చే ఎలాంటి మెకానికల్, ఎలక్ట్రికల్ ఫెయిల్యూర్స్ (మెకానికల్, ఎలక్ట్రికల్ లోపాలు) కైనా ఈ వారంటీ పూర్తి రక్షణ కల్పిస్తుంది. కస్టమర్లు తమ కారుకు ఉండే స్టాండర్డ్ 4 సంవత్సరాలు/80,000 కిలోమీటర్ల వారంటీని గరిష్టంగా 7 సంవత్సరాలు లేదా 1,40,000 కిలోమీటర్ల వరకు విస్తరించుకోవచ్చు.

హ్యుందాయ్ ప్లాన్‌లో ఉన్న అత్యంత పెద్ద ప్లస్ పాయింట్ ఏంటంటే.. ఈ వారంటీని కారు కొన్న తదుపరి యజమానికి బదిలీ చేయవచ్చు. ఒకవేళ వారంటీ పీరియడ్‌లో మీరు కారును వేరే ఎవరికైనా అమ్మేసినా, ఆ వారంటీ కొత్త ఓనర్‌కు కూడా వర్తిస్తుంది. దీనివల్ల సెకండ్ హ్యాండ్ మార్కెట్లో హ్యుందాయ్ కార్లకు రీసేల్ వాల్యూ చాలా అద్భుతంగా పెరుగుతుంది.

4. ఫోక్స్ వ్యాగన్, స్కోడా (Volkswagen / Skoda)
జర్మన్ కార్ల బ్రాండ్లయిన ఫోక్స్ వ్యాగన్, స్కోడా ఇండియా కూడా తమ మొత్తం ప్రొడక్ట్ పోర్ట్‌ఫోలియోపై ఆకర్షణీయమైన వారంటీ ప్యాకేజీలను ఇస్తున్నాయి. సాధారణంగా జర్మన్ కార్ల మెయింటెనెన్స్, రిపేర్ ఖర్చులు భారతీయ మార్కెట్లో కాస్త ఎక్కువగా ఉంటాయని అందరికీ తెలిసిందే. అందువల్ల ఈ కార్లకు ఎక్స్‌టెండెడ్ వారంటీ తీసుకోవడం అనేది భవిష్యత్తులో జేబుకు చిల్లు పడకుండా కాపాడుతుంది.

ఈ రెండు కంపెనీలు తమ కార్లపై బేసిక్‌గా 4 సంవత్సరాలు లేదా 1,00,000 కిలోమీటర్ల స్టాండర్డ్ వారంటీని ఇస్తాయి. ఆ తర్వాత కస్టమర్లు తమ బడ్జెట్‌ను బట్టి అదనంగా ఒక సంవత్సరం/1,25,000 కిలోమీటర్లు లేదా రెండు సంవత్సరాలు/1,50,000 కిలోమీటర్ల ప్లాన్‌ను ఎంచుకోవచ్చు. దీనివల్ల కారుకు మొత్తం 6 సంవత్సరాల వరకు పూర్తి వారంటీ రక్షణ లభిస్తుంది.

5. మారుతి సుజుకి (Maruti Suzuki)
భారతదేశపు అతిపెద్ద కార్ల తయారీ సంస్థ మారుతి సుజుకి కూడా కొన్ని నిర్దిష్ట నిబంధనలకు లోబడి ఎక్స్‌టెండెడ్ వారంటీ ప్రోగ్రామ్‌ను అందిస్తోంది. ఈ ప్లాన్ పొందాలంటే కారు వయస్సు 3 సంవత్సరాల కంటే తక్కువ ఉండాలి. కారు 1,00,000 కిలోమీటర్ల కంటే తక్కువ తిరిగి ఉండాలి. మారుతి ఇచ్చే వారంటీలో ఇంజన్, హై-ప్రెజర్ ఫ్యూయల్ పంప్, టర్బోచార్జర్, ఏసీ కంప్రెషర్, ఈసీఎమ్, స్టీరింగ్ అసెంబ్లీ వంటి ఎన్నో ఖరీదైన విడిభాగాలు కవర్ అవుతాయి.

కస్టమర్లు ఇందులో రెండు రకాల ప్లాన్లను ఎంచుకోవచ్చు. మొదటిది ప్లాటినం ప్లాన్- ఇది కారు వారంటీని ఒక సంవత్సరం అదనంగా పొడిగించి 1,20,000 కిలోమీటర్ల వరకు రక్షణ ఇస్తుంది. రెండోది ప్రీమియం సాలిటైర్ ప్లాన్ - ఇది కారు కొన్న ఆరవ సంవత్సరం వరకు లేదా 1,60,000 కిలోమీటర్ల వరకు కారుకు పూర్తి వారంటీ భరోసాను కల్పిస్తుంది.

టాటా మోటార్స్, మహీంద్రా, టయోటా వంటి ఇతర ప్రముఖ కంపెనీలు కూడా ఎక్స్‌టెండెడ్ వారంటీ ప్యాకేజీలను అందిస్తున్నప్పటికీ, ప్రస్తుతానికి పైన పేర్కొన్న 5 బ్రాండ్లు మాత్రమే సుదీర్ఘ కాల వారంటీలతో టాప్‌లో ఉన్నాయి. కస్టమర్లు ఈ ప్లాన్లను కొనేముందు వాటి నియమ నిబంధనలు, మినహాయింపుల గురించి దగ్గరలోని షోరూమ్‌కు వెళ్లి పూర్తిగా తెలుసుకోవడం మంచిది.