ఈ కారు కోసం కస్టమర్లు రాక దోమలు కొట్టుకుంటున్న డీలర్లు.. ధర కేవలం రూ.6.39 లక్షలే, 30Km మైలేజ్!

భారతీయ మార్కెట్లో ప్రీమియం హ్యాచ్‌బ్యాక్ కార్లకు ఎప్పుడూ ప్రత్యేకమైన ఆదరణ ఉంటుంది. స్టైలిష్ డిజైన్, మంచి మైలేజ్, సౌకర్యవంతమైన క్యాబిన్, తక్కువ నిర్వహణ ఖర్చులు వంటి కారణాల వల్ల ఈ విభాగానికి చెందిన కార్లు కుటుంబ వినియోగదారులను విస్తృతంగా ఆకర్షిస్తుంటాయి. ఈ సెగ్మెంట్‌లో మంచి గుర్తింపు సంపాదించుకున్న మోడళ్లలో టయోటా గ్లాంజా (Toyota Glanza) ఒకటి. నగరాల్లో రోజువారీ ప్రయాణాలకు అనువుగా ఉండటంతో పాటు, టయోటా బ్రాండ్ విశ్వసనీయత కారణంగా కూడా ఈ కారు కొనుగోలుదారుల జాబితాలో తరచుగా కనిపిస్తూ ఉంటుంది. అయితే తాజాగా విడుదలైన అమ్మకాల గణాంకాలు గ్లాంజా విక్రయాల్లో కొంత మందగమనం కనిపిస్తున్నట్లు సూచిస్తున్నాయి.

2026 మే నెలలో టయోటా గ్లాంజా మొత్తం 3,198 యూనిట్ల అమ్మకాలను నమోదు చేసింది. గత ఏడాది ఇదే నెలలో ఈ కారు 4,753 యూనిట్ల విక్రయాలను సాధించగా, ఈసారి ఆ సంఖ్య గణనీయంగా తగ్గింది. దీంతో ఏడాది ప్రాతిపాదికన చూస్తే గ్లాంజా అమ్మకాలు దాదాపు 33 శాతం మేర క్షీణించడం గమనార్హం. నెలవారీ ప్రాతిపాదికన కూడా ఈ కారు విక్రయాలు తగ్గుముఖం పట్టాయి.

2026 ఏప్రిల్ నెలలో 3,360 యూనిట్ల అమ్మకాలు నమోదు చేసిన గ్లాంజా, మే నెలలో 3,198 యూనిట్లకే పరిమితమైంది. అంటే కేవలం ఒక నెల వ్యవధిలోనే సుమారు 5 శాతం అమ్మకాల తగ్గుదల నమోదైంది. పెరుగుతున్న పోటీ, కొత్త మోడళ్ల రాక, వినియోగదారుల అభిరుచుల్లో మార్పులు వంటి అంశాలు ఈ తగ్గుదలకు కారణమై ఉండవచ్చు. అయినప్పటికీ, టయోటా గ్లాంజా ఇప్పటికీ ప్రీమియం హ్యాచ్‌బ్యాక్ విభాగంలో ఒక బలమైన ఎంపికగానే కొనసాగుతోంది.

డిజైన్ పరంగా ప్రీమియం లుక్‌కు మంచి ఉదాహరణగా నిలుస్తుంది. ముందు అమర్చిన స్టైలిష్ LED హెడ్‌ల్యాంప్‌లు, LED డే టైమ్ రన్నింగ్ లైట్స్ (DRLలు) కారుకు ఆకర్షణీయమైన రూపాన్ని అందిస్తాయి. అలాగే వెనుక భాగంలో ఉన్న LED టెయిల్ లాంప్‌లు, 16 అంగుళాల అల్లాయ్ వీల్స్ గ్లాంజా ప్రీమియం హ్యాచ్‌బ్యాక్ అనే గుర్తింపును మరింత బలపరుస్తాయి. నగర రోడ్లపై ఈ కారు ప్రత్యేకంగా కనిపించడానికి ఇవి కీలక పాత్ర పోషిస్తాయి.

ధర విషయానికి వస్తే, ప్రస్తుతం టయోటా గ్లాంజా ఎక్స్-షోరూమ్ ధర రూ.6.39 లక్షల నుంచి ప్రారంభమై రూ.9.15 లక్షల వరకు ఉంటుంది. దీంతో బడ్జెట్‌లోనే ప్రీమియం ఫీచర్లు కోరుకునే వినియోగదారులకు ఇది మంచి ఎంపికగా నిలుస్తోంది. పనితీరు పరంగా ఈ కారులో 1.2 లీటర్ నేచురల్లీ ఆస్పిరేటెడ్ పెట్రోల్ ఇంజిన్ అందించారు. ఈ ఇంజిన్ గరిష్టంగా 90 PS పవర్, 113 Nm టార్క్‌ను ఉత్పత్తి చేస్తుంది.

ఇంధన ఖర్చులను తగ్గించాలని భావించే వారి కోసం 1.2 లీటర్ CNG వేరియంట్ కూడా అందుబాటులో ఉంది. ఈ ఇంజిన్ 77.5 PS శక్తి, 98.5 Nm టార్క్‌ను ఉత్పత్తి చేస్తుంది. ట్రాన్స్‌మిషన్ పరంగా 5-స్పీడ్ మాన్యువల్, 5-స్పీడ్ ఆటోమేటిక్ గేర్‌బాక్స్ ఎంపికలు లభిస్తాయి. దీంతో వినియోగదారులు తమ అవసరాలకు అనుగుణంగా వేరియంట్‌ను ఎంచుకునే అవకాశం ఉంటుంది.

మైలేజ్ విషయంలో కూడా గ్లాంజా మంచి ఫలితాలను అందిస్తుంది. వేరియంట్‌ను బట్టి సుమారు 22.35 కిమీ నుంచి 30.61 కిమీ వరకు మైలేజ్ అందిస్తుందని కంపెనీ పేర్కొంది. అందువల్ల స్టైల్, పనితీరు, మైలేజ్ మూడు అంశాలను సమతుల్యం చేసే ప్రీమియం హ్యాచ్‌బ్యాక్‌గా గ్లాంజా నిలుస్తోంది. రానున్నది పండగల సీజన్ కాబట్టి ఆ సమయంలో సేల్స్ పెరిగే అవకాశం ఉంది.