ఇవి చిన్న కార్లు కావు.. 8 సీటర్ భారీ కార్లు, 23 కి.మీ మైలేజ్! ఈ రెండు ఫ్యామిలీకి ప్యాలెస్‌లు.. ఏది కొనాలి?

భారతీయ ఆటోమొబైల్ మార్కెట్‌లో ఎంవీపీలకు ఉన్న ప్రాధాన్యం ప్రత్యేకంగా చెప్పాల్సిన అవసరం లేదు. పెద్ద కుటుంబాలు, సౌకర్యవంతమైన ప్రయాణం, మెరుగైన స్పేస్ కలిపి ఈ సెగ్మెంట్‌ను మరింత బలంగా నిలబెట్టాయి. ఈ నేపథ్యంలోనే టయోటా ఇన్నోవా హైక్రాస్ (Toyota Innova Hycross), మారుతి సుజుకి ఇన్విక్టో (Maruti Suzuki Invicto) వంటి రెండు ఆధునిక ఎంవీపీలు మార్కెట్లోకి వచ్చి వినియోగదారుల దృష్టిని ఆకర్షిస్తున్నాయి. టయోటా ఇన్నోవా హైక్రాస్ ఇప్పటికే భారత మార్కెట్లో మంచి పేరు సంపాదించిన ఇన్నోవా బ్రాండ్‌కు చెందిన తాజా రూపం. మరోవైపు, మారుతి సుజుకి ఇన్విక్టో కూడా ఇదే ప్లాట్‌ఫామ్‌ను ఆధారంగా చేసుకుని రూపొందించబడింది.ఈ రెండు కార్లు ఒకదానితో ఒకటి పోటీ పడుతున్నాయి. ఈ నేపథ్యంలో వీటి మధ్య ఉన్న తేడాలను ఇక్కడ చూద్దాం.

ధర: ఇన్నోవా హైక్రాస్ విస్తృతమైన ధర శ్రేణితో మార్కెట్లో అందుబాటులో ఉంది. దీని ప్రారంభ ధర సుమారు రూ. 18.48 లక్షల నుంచి ప్రారంభమై, టాప్ వేరియంట్లకు వెళ్తే రూ. 31.30 లక్షల వరకు చేరుతుంది. ఇన్విక్టో ధరలు రూ. 24.97 లక్షల నుంచి ప్రారంభమై, సుమారు రూ. 28.61 లక్షల వరకు ఉంటాయి (ఎక్స్-షోరూమ్). తక్కువ బడ్జెట్‌తో పెద్ద ఎంవీపీ కొనాలనుకునే వారికి ఇన్నోవా హైక్రాస్ దొరుకుతుంది.

డిజైన్: ఇన్నోవా హైక్రాస్ మరింత ప్రీమియం లుక్‌తో, బోల్డ్ స్టైలింగ్‌తో ముందుకు వస్తుంది. దీని ఫ్రంట్ ప్రొఫైల్‌లో ఆకర్షణీయమైన LED హెడ్‌ల్యాంప్స్, డే టైమ్ రన్నింగ్ లైట్స్ (DRLs) ప్రత్యేకంగా కనిపిస్తాయి. అలాగే LED టెయిల్ ల్యాంప్స్, 18-అంగుళాల అల్లాయ్ వీల్స్ దీనికి మరింత రోడ్ ప్రెజెన్స్ ఇస్తాయి. ప్లాటినం వైట్ పెర్ల్, సిల్వర్ మెటాలిక్, సూపర్ వైట్ వంటి కలర్ ఆప్షన్లు దీనికి క్లాసిక్ ఫీల్‌ను అందిస్తాయి.

ఇన్విక్టో కూడా తనదైన స్టైలింగ్‌తో ఆకట్టుకుంటుంది. ఇది కొంచెం సింపుల్ కానీ ఎలిగెంట్ డిజైన్‌ను కలిగి ఉంది. LED హెడ్‌ల్యాంప్స్, DRLs, LED టెయిల్‌ల్యాంప్స్ వంటి ఫీచర్లు ఇందులో కూడా అందుబాటులో ఉన్నాయి. అయితే అల్లాయ్ వీల్స్ విషయంలో ఇది 16-అంగుళాల ఆప్షన్‌తో వస్తుంది, ఇది కొంచెం సబ్టిల్ లుక్‌ను ఇస్తుంది. ఇది మెజెస్టిక్ సిల్వర్, స్టెల్లార్ బ్రాంజ్, మాగ్నిఫిసెంట్ బ్లాక్, నెక్సా బ్లూ, మిస్టిక్ వైట్ కలర్స్‌లో లభిస్తుంది.

పనితీరు: ఇన్నోవా హైక్రాస్ విభిన్న ఇంజిన్ ఎంపికలతో వినియోగదారులకు ఎక్కువ ఫ్లెక్సిబిలిటీని ఇస్తుంది. ఇందులో 2-లీటర్ పెట్రోల్ ఇంజిన్‌తో పాటు 2-లీటర్ స్ట్రాంగ్ హైబ్రిడ్ (పెట్రోల్ + ఎలక్ట్రిక్) ఆప్షన్ కూడా లభిస్తుంది. ట్రాన్స్‌మిషన్ విషయంలో CVT మరియు e-CVT గేర్‌బాక్స్ ఎంపికలు ఉండటం వల్ల స్మూత్ డ్రైవింగ్ అనుభవం లభిస్తుంది. మైలేజ్ పరంగా 16.13 kmpl నుంచి 23.24 kmpl వరకు సామర్థ్యాన్ని అందిస్తుంది.

ఇన్విక్టో విషయానికి వస్తే, ఇందులో 2-లీటర్ పెట్రోల్ + ఎలక్ట్రిక్ కాంబినేషన్‌తో కూడిన ఇంజిన్ అందుబాటులో ఉంది. దీనికి e-CVT గేర్‌బాక్స్ జత కావడం వల్ల డ్రైవింగ్ చాలా స్మూత్‌గా ఉంటుంది, ముఖ్యంగా సిటీ ట్రాఫిక్‌లో మంచి అనుభవాన్ని ఇస్తుంది. మైలేజ్ పరంగా సుమారు 23 kmpl వరకు ఇంధన సామర్థ్యాన్ని అందిస్తుంది. వేగం విషయంలో కూడా ఇది ఇన్నోవా హైక్రాస్‌తో సమానంగా 170 kmph గరిష్ట వేగాన్ని అందుకుంటుంది.

ఫీచర్స్: ఫీచర్ల విషయంలో ఇన్నోవా హైక్రాస్ అందించే ఫీచర్లు దీనిని ఒక ప్రీమియం ఫ్యామిలీ కార్‌గా నిలబెడతాయి. ఇందులో 10.1-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ డ్రైవర్ డిస్‌ప్లే వంటి ఆధునిక సౌకర్యాలు ఉన్నాయి. అంతేకాకుండా సన్‌రూఫ్, వెనుక AC వెంట్స్, ఆటోమేటిక్ క్లైమేట్ కంట్రోల్ వంటి ఫీచర్లు ప్రయాణాన్ని మరింత కంఫర్టబుల్‌గా మారుస్తాయి. మ్యూజిక్ సిస్టమ్ కూడా మంచి అనుభవాన్ని ఇస్తుంది.

ఇన్విక్టో కూడా ఫీచర్ల విషయంలో ఏమాత్రం తగ్గదు. ఇందులో కూడా 10.1-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ డ్రైవర్ డిస్‌ప్లే ఉన్నాయి. అయితే అదనంగా డ్యూయల్-జోన్ క్లైమేట్ కంట్రోల్, యాంబియంట్ లైటింగ్, వెంటిలేటెడ్ ఫ్రంట్ సీట్లు వంటి ఫీచర్లు ప్రయాణానికి మరింత ప్రీమియం ఫీల్‌ను ఇస్తాయి. దీని వల్ల డ్రైవర్, ముందు ప్రయాణీకులకు ఎక్కువ సౌకర్యం లభిస్తుంది.