ఎక్కడ చూసినా ఈ కంపెనీ కార్లే కొనాలని పట్టుబడుతున్నారు.. డీలర్‌షిప్‌లలో లైన్లు.. ఎవరిని అడిగినా ఇదే బ్రాండ్!

టయోటా కిర్లోస్కర్ మోటార్ (Toyota Kirloskar Motor) భారత ఆటోమొబైల్ రంగంలో అత్యంత విశ్వసనీయమైన, పేరుగాంచిన కార్ల తయారీదారుగా తనకంటూ ప్రత్యేక గుర్తింపును సంపాదించుకుంది. నాణ్యత, మన్నిక, తక్కువ మెయింటెనెన్స్ ఖర్చులు, అధిక రీ-సేల్ విలువ వంటి అంశాలు టయోటా కార్లకు దేశవ్యాప్తంగా బలమైన అభిమానాన్ని తెచ్చిపెట్టాయి. అందుకే దేశీయ మార్కెట్‌లో టయోటా వాహనాలకు డిమాండ్ రోజురోజుకూ పెరుగుతూనే ఉంది. వినియోగదారులు కూడా ఈ బ్రాండ్‌పై ఉన్న నమ్మకంతో వరుసగా టయోటా కార్లను ఎంచుకుంటున్నారు. ఈ పెరుగుతున్న డిమాండ్‌కు తాజా ఉదాహరణగా జనవరి 2026 నెల నిలిచింది. గత నెలలో టయోటా కిర్లోస్కర్ మోటార్ మొత్తం 33,880 యూనిట్లను వినియోగదారులకు డెలివరీ చేసి, బలమైన అమ్మకాల ప్రదర్శనను నమోదు చేసింది.

కొత్త ఏడాది ఆరంభంలోనే ఇంత భారీ సంఖ్యలో వాహనాలను విక్రయించడం కంపెనీ మార్కెట్‌లో ఉన్న బలాన్ని స్పష్టంగా చూపిస్తోంది. గత ఏడాది ఇదే కాలంతో పోలిస్తే టయోటా సాధించిన వృద్ధి మరింత ఆకట్టుకునేలా ఉంది. జనవరి 2025లో కంపెనీ 29,371 యూనిట్లను మాత్రమే విక్రయించగా, ఈ ఏడాది జనవరిలో అమ్మకాలు 15 శాతం పెరిగాయి. ఇది ఏడాది వ్యవధిలోనే టయోటా తన కస్టమర్ బేస్‌ను గణనీయంగా విస్తరించిందని చెప్పడానికి నిదర్శనం.

SUVలు, MPVలు, హైబ్రిడ్ వాహనాలపై పెరుగుతున్న ఆసక్తి ఈ వృద్ధికి కారణం. ప్రత్యేకంగా ఇన్నోవా క్రిస్టా, ఇన్నోవా హైక్రాస్, ఫార్చ్యూనర్, అర్బన్ క్రూయిజర్ హైరైడర్ వంటి మోడళ్లకు కొనసాగుతున్న డిమాండ్ టయోటా అమ్మకాలను ఈ స్థాయికి తీసుకువచ్చింది. ఈ వాహనాలు తమ సెగ్మెంట్‌లలో నమ్మకమైన పనితీరు, భద్రత, సౌకర్యంతో వినియోగదారుల విశ్వాసాన్ని పొందాయి. అంతేకాదు, టయోటా హైబ్రిడ్ టెక్నాలజీపై పెట్టిన ఫోకస్ కొత్త కస్టమర్లను ఆకర్షించడంలో కీలక పాత్ర పోషిస్తోంది.

ప్రస్తుతం టయోటా కిర్లోస్కర్ మోటార్ భారత మార్కెట్‌లో 10కు పైగా కార్లను విక్రయిస్తూ విస్తృత పోర్ట్‌ఫోలియోతో ముందుకు సాగుతోంది. వివిధ సెగ్మెంట్లలో టయోటా అందిస్తున్న మోడళ్లు భారత వినియోగదారుల అవసరాలకు బాగా సరిపోతుండటంతో, కంపెనీకి స్థిరమైన డిమాండ్ కొనసాగుతోంది. ఇటీవల టయోటా మరో కీలక అడుగు వేసింది. భవిష్యత్ ఎలక్ట్రిక్ మొబిలిటీని దృష్టిలో ఉంచుకుని కొత్త టయోటా అర్బన్ క్రూయిజర్ ఎబెల్లా ఎలక్ట్రిక్ SUVను కంపెనీ పరిచయం చేసింది.

ఇది టయోటా EV వ్యూహంలో ఒక ముఖ్యమైన మోడల్‌గా భావిస్తున్నారు. ఈ ఎలక్ట్రిక్ SUV ధర రూ. 18 లక్షల నుంచి రూ. 25 లక్షల వరకు (ఎక్స్-షోరూమ్) ఉండవచ్చని అంచనా. టయోటా అర్బన్ క్రూయిజర్ ఎబెల్లా SUV మారుతి సుజుకి E-విటారాకు రీ-బ్యాడ్జ్ చేసిన వెర్షన్‌గా రూపుదిద్దుకున్నప్పటికీ, టయోటా బ్రాండ్ టచ్‌తో ప్రత్యేక గుర్తింపును సంతరించుకుంది. పనితీరు, రేంజ్, సౌకర్యాల పరంగా ఇది వినియోగదారుల అంచనాలను అందుకునేలా రూపొందించబడింది.

ఈ SUVలో రెండు బ్యాటరీ ప్యాక్ ఆప్షన్లు అందుబాటులో ఉంటాయి. 49 kWh, 61 kWh సామర్థ్యం గల బ్యాటరీ ప్యాక్‌లతో వచ్చే ఈ మోడల్, పూర్తి ఛార్జ్‌పై గరిష్టంగా 543 కిలోమీటర్ల వరకు రేంజ్ అందించగలదని అంచనా. ఈ స్థాయి రేంజ్ ఉండటం వల్ల రోజువారీ ప్రయాణాలతో పాటు దీర్ఘ ప్రయాణాలకూ ఈ ఎలక్ట్రిక్ SUV సరైన ఎంపికగా నిలుస్తుంది.

సీటింగ్ విషయానికి వస్తే, కొత్త అర్బన్ క్రూయిజర్ ఎబెల్లా 5-సీటర్ లేఅవుట్తో వస్తుంది. ఫీచర్ల విషయంలో ఈ ఎలక్ట్రిక్ SUV నిజంగా ఆకట్టుకుంటుంది. ఇందులో 10.25 అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ డ్రైవర్ డిస్ప్లే, ఆండ్రాయిడ్ ఆటో, ఆపిల్ కార్‌ప్లే వంటి కనెక్టివిటీ ఫీచర్లు ఉన్నాయి. అదేవిధంగా సన్‌రూఫ్, వెంటిలేటెడ్ ఫ్రంట్ సీట్లు, యాంబియంట్ లైటింగ్ వంటి ప్రీమియం ఫీచర్లు కూడా అందించబడ్డాయి.