టయోటా ఎలక్ట్రిక్‌ కారు ఫీచర్లు, రేంజ్‌ వీర లెవల్‌.. కింగ్‌ మేకర్‌ అవ్వడం ఖాయం!

సరికొత్త టయోటా అర్బన్ క్రూయిజర్ ఎబెల్లా (toyota urban cruiser ebella) నిన్న భారత మార్కెట్‌లో అధికారికంగా లాంచ్ అయింది. ఎలక్ట్రిక్ SUVలపై ఆసక్తి పెరుగుతున్న ఈ సమయంలో టయోటా నుంచి వచ్చిన ఈ కొత్త మోడల్‌పై ఇప్పటికే వినియోగదారుల్లో మంచి ఉత్సాహం కనిపిస్తోంది. లాంచ్‌తో పాటు బుకింగ్‌లను కూడా ప్రారంభించిన కంపెనీ, ఆసక్తి ఉన్న కస్టమర్లు కేవలం రూ. 25,000 అడ్వాన్స్ చెల్లించి ఈ కారును రిజర్వేషన్ చేసుకునే అవకాశం కల్పించింది. మీరు కొత్తగా ఒక ఎలక్ట్రిక్ SUV కొనాలని ప్లాన్ చేస్తుంటే, స్టైలిష్ డిజైన్, టయోటా బ్రాండ్ నమ్మకం, ఆధునిక టెక్నాలజీ ఒక ప్యాకేజీగా అర్బన్ క్రూయిజర్ ఎబెల్లా ఒక మంచి ఎంపికగా నిలుస్తోంది. సిటీ నుంచి లాంగ్ డ్రైవ్స్ వరకు అన్ని అవసరాలకు సరిపోయేలా ఈ కారును డిజైన్ చేశారు.

ధర విషయానికి వస్తే, టయోటా అధికారికంగా ఇంకా ఫైనల్ ప్రైస్‌ను వెల్లడించలేదు. అయితే మార్కెట్ వర్గాల అంచనాల ప్రకారం, టయోటా అర్బన్ క్రూయిజర్ ఎబెల్లా ఎక్స్-షోరూమ్ ధర సుమారు రూ. 18 లక్షల నుంచి రూ. 25 లక్షల మధ్య ఉండే అవకాశం ఉంది. ఈ ధర శ్రేణిలో లాంచ్ అయితే, ఇది టాటా నెక్సాన్ EV, మహీంద్రా XUV400 వంటి పాపులర్ ఎలక్ట్రిక్ SUVలకు గట్టి పోటీ ఇవ్వనుంది.

దీని డిజైన్ విషయానికి వస్తే, ఎబెల్లాను మొదటిసారి చూసిన వెంటనే ఆకట్టుకునేలా రూపొందించారు. టయోటా ఈ కారును పూర్తిగా మోడ్రన్, ఫ్యూచరిస్టిక్ లుక్‌తో డిజైన్ చేసింది. ముందు భాగంలో బలమైన బంపర్లు ఉండటం వల్ల ఈ SUVకి ఒక రగ్డ్ మరియు ప్రీమియం రోడ్ ప్రెజెన్స్ కనిపిస్తుంది. సిటీ రోడ్లలోనే కాకుండా హైవేలపై కూడా ఈ కారు వెళ్తున్నప్పుడు వెంటనే చూపును ఆకర్షించేలా ఉంటుంది.

ఎబెల్లా పూర్తిగా LED సెటప్‌తో వస్తుంది. స్లీక్‌గా డిజైన్ చేసిన LED హెడ్‌లైట్లు రాత్రి సమయంలో విజిబిలిటీని అందిస్తాయి. వాటికి తోడుగా ఉండే LED DRLలు, వెనుక భాగంలో ఉన్న LED టెయిల్ లైట్లు కూడా స్టైలిష్‌గా డిజైన్ చేయబడి, రాత్రి వేళల్లో కారుకు మరింత ప్రీమియం టచ్‌ను ఇస్తాయి. పెద్ద సైజ్‌లో ఉన్న 18-అంగుళాల అల్లాయ్ వీల్స్ ఈ SUVకి మరింత స్పోర్టీ, స్ట్రాంగ్ స్టాన్స్‌ను అందిస్తున్నాయి.

ఈ ఎలక్ట్రిక్ SUV 5 సీట్ల ఎంపికను కలిగి ఉంది. ప్రయాణీకులు సులభంగా ప్రయాణించవచ్చు. లగేజీని తీసుకెళ్లడానికి 310 లీటర్ల బూట్ స్పేస్ ఉండనుంది. దీని పనితీరు చూసినట్లయితే, ఎబెల్లా EV రెండు LFP (లిథియం ఫెరో ఫాస్ఫేట్) బ్యాటరీ ప్యాక్ ఎంపికలతో అందుబాటులోకి రానుంది. ఇందులో ఒకటి 49 kWh బ్యాటరీ, మరొకటి 61 kWh బ్యాటరీ ప్యాక్. ఈ రెండు వేరియంట్లలోనూ ఒకే ఎలక్ట్రిక్ మోటార్‌ను ఉపయోగించారు.

చిన్న బ్యాటరీ వేరియంట్ 142 bhp పవర్, 189 Nm టార్క్‌ను ఉత్పత్తి చేస్తుండగా, పెద్ద బ్యాటరీ ప్యాక్ వేరియంట్ 172 bhp పవర్, అదే 189 Nm టార్క్‌ను అందిస్తుంది. ఒకసారి ఫుల్ ఛార్జ్ చేస్తే 543 కిలోమీటర్లు ప్రయాణించగలదు. ఈ కారులో డజన్ల కొద్ది ఫీచర్స్ ఉన్నాయి. లోపల 10.25-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఆండ్రాయిడ్ ఆటో, ఆపిల్ కార్‌ప్లే, 10.1-అంగుళాల డిజిటల్ డ్రైవర్ డిస్ప్లే ఉన్నాయి.

అలాగే పనోరమిక్ సన్‌రూఫ్, వెంటిలేటెడ్ ఫ్రంట్ సీట్లు, 12-రంగుల యాంబియంట్ లైటింగ్, JBL సౌండ్ సిస్టమ్, ఆటోమేటిక్ క్లైమేట్ కంట్రోల్, సేఫ్టీ కోసం 7 ఎయిర్‌బ్యాగులు, ABS (యాంటీలాక్ బ్రేకింగ్ సిస్టమ్), EBD (ఎలక్ట్రానిక్ బ్రేక్‌ఫోర్స్ డిస్ట్రిబ్యూషన్), లెవల్-2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్), ESC (ఎలక్ట్రానిక్ స్టెబిలిటీ కంట్రోల్), TPMS (టైర్ ప్రెజర్ మానిటరింగ్ సిస్టమ్), 360-డిగ్రీ కెమెరా ఉన్నాయి.