ఇండియాలో రాబోయే టాప్ 5 ఫ్లెక్స్ ఫ్యూయల్ కార్లు! భవిష్యత్తులో జనాలు కొనేది ఈ ఇథనాల్ కార్లనే!

భారత ఆటోమొబైల్ రంగంలో ఫ్లెక్స్-ఫ్యూయల్ (Flex Fuel) కార్లకు క్రమంగా ప్రాధాన్యం పెరుగుతోంది. పెట్రోల్‌కు ప్రత్యామ్నాయంగా ఇథనాల్ ఆధారిత ఇంధన వినియోగాన్ని ప్రోత్సహించే దిశగా దేశంలో కీలక అడుగులు పడుతున్నాయి. ఇందులో భాగంగా దేశంలోనే తొలి E85 ఫ్యూయల్ డిస్పెన్సింగ్ స్టేషన్ ఇటీవల ఢిల్లీలో ప్రారంభమైంది. అదే సమయంలో మారుతి సుజుకి వ్యాగన్‌ఆర్ దేశంలోని తొలి ఫ్లెక్స్-ఫ్యూయల్ కారుగా గుర్తింపు పొందింది. ఇది పెట్రోల్‌తో పాటు అధిక శాతం ఇథనాల్ కలిగిన ఇంధనంతో కూడా నడుస్తుంది. ప్రస్తుతం ఈ టెక్నాలజీ ప్రారంభ దశలో ఉన్నప్పటికీ, రాబోయే రోజుల్లో మరిన్ని కంపెనీలు తమ ఫ్లెక్స్-ఫ్యూయల్ మోడళ్లను మార్కెట్లోకి తీసుకురానున్నాయి. దీంతో ఈ జాబితా మరింత విస్తరించే అవకాశం ఉంది. త్వరలో రానున్న ఫ్లెక్స్-ఫ్యూయల్ కార్లు ఏవో తెలుసుకుందాం.

మారుతి సుజుకి వ్యాగన్ఆర్: ఈ జాబితాలో ముందుగా చెప్పుకోవాల్సింది మారుతి సుజుకి వ్యాగన్ఆర్ ఫ్లెక్స్-ఫ్యూయల్. భారతదేశపు తొలి ఫ్లెక్స్-ఫ్యూయల్ ప్యాసింజర్ కారుగా గుర్తింపు పొందిన ఈ మోడల్, E20 నుంచి E85 వరకు ఇథనాల్-పెట్రోల్ మిశ్రమాలతో పాటు స్వచ్ఛమైన ఇథనాల్‌పై కూడా నడిచే సామర్థ్యాన్ని కలిగి ఉంది. 100 శాతం ఇథనాల్‌తో పనిచేసేలా రూపొందించిన తొలి ప్యాసింజర్ కారు కూడా ఇదే కావడం విశేషం.

ఇన్నోవా హైక్రాస్: టయోటా విషయానికి వస్తే, కంపెనీ ఇన్నోవా హైక్రాస్ ఫ్లెక్స్-ఫ్యూయల్ ప్రోటోటైప్‌ను 2023లో ఆవిష్కరించింది. ఇందులో 2.0-లీటర్ అట్కిన్సన్ సైకిల్ పెట్రోల్ ఇంజిన్‌కు ఎలక్ట్రిక్ మోటార్‌ను జత చేశారు. అధిక ఇథనాల్ వినియోగానికి అనుగుణంగా ఇంజిన్‌లోని కీలక భాగాలను తుప్పు నిరోధకంగా మార్చడంతో పాటు ప్రత్యేక స్పార్క్ ప్లగ్‌లు, పిస్టన్ రింగులు, వాల్వ్ సీల్స్ వంటి భాగాలను ఉపయోగించారు.

హ్యుందాయ్ క్రెటా: హ్యుందాయ్ కూడా ఈ రంగంలో తన సన్నద్ధతను చాటుకునేందుకు ఆటో ఎక్స్‌పో 2025లో క్రెటా ఫ్లెక్స్-ఫ్యూయల్ వెర్షన్‌ను ప్రదర్శించింది. ఇందులోని 1.0-లీటర్ టర్బో పెట్రోల్ ఇంజిన్‌ను E100 ఇథనాల్‌కు అనుగుణంగా రూపొందించారు. ఈ ఇంజిన్ 120 హెచ్‌పీ పవర్, 172 ఎన్ఎమ్ టార్క్‌ను ఉత్పత్తి చేస్తూ 6-స్పీడ్ ఆటోమేటిక్ గేర్‌బాక్స్‌తో జత చేయబడింది.

టయోటా కొరోలా: అదే విధంగా టయోటా కొరోలా ఫ్లెక్స్-ఫ్యూయల్ హైబ్రిడ్ కూడా కంపెనీ సాంకేతిక సామర్థ్యాన్ని చాటిచెప్పే మోడల్‌గా నిలిచింది. 1.8-లీటర్ పెట్రోల్ ఇంజిన్‌తో పాటు స్ట్రాంగ్ హైబ్రిడ్ సిస్టమ్‌ను కలిగి ఉన్న ఈ సెడాన్, E100 ఇథనాల్‌తో కూడా నడిచే సామర్థ్యాన్ని కలిగి ఉంది. ఇప్పటికే ఈ టెక్నాలజీని అభివృద్ధి చేసిన టయోటా, భవిష్యత్తులో దీనిని భారత మార్కెట్లో ప్రవేశపెట్టే అవకాశాలు ఉన్నట్లు తెలుస్తోంది.

టాటా పంచ్: టాటా మోటార్స్ కూడా తన తొలి ఫ్లెక్స్-ఫ్యూయల్ వాహనంగా పంచ్‌ను ప్రదర్శించింది. ఇందులో ఉన్న 1.2-లీటర్ పెట్రోల్ ఇంజిన్ E85 వరకు ఇథనాల్ మిశ్రమాలతో పనిచేయగలదు. వివిధ ఇంధన మిశ్రమాలకు అనుగుణంగా పనితీరు అందించేందుకు ECU సాఫ్ట్‌వేర్, ఫ్యూయల్ ఇంజెక్టర్లు, ఎగ్జాస్ట్ సిస్టమ్‌లలో ప్రత్యేక మార్పులు చేశారు. దీనిని కంపెనీ అతి త్వరలో తీసుకొచ్చే అవకాశం ఉంది.

ఇలా చూస్తే, భారత ఆటోమొబైల్ రంగం క్రమంగా ఇథనాల్ వైపు వేగంగా అడుగులు వేస్తోంది. దేశంలో పెరుగుతున్న ఇంధన అవసరాలు, ముడి చమురు దిగుమతులపై అధిక ఆధారపడటం, అలాగే కాలుష్య నియంత్రణ వంటి అంశాలను దృష్టిలో ఉంచుకుని కేంద్ర ప్రభుత్వం కూడా ఇథనాల్ వినియోగాన్ని ప్రోత్సహిస్తోంది. ఈ నేపథ్యంలో మారుతి సుజుకి, హ్యుందాయ్, టాటా మోటార్స్, టయోటా వంటి ప్రముఖ కంపెనీలు ఫ్లెక్స్-ఫ్యూయల్ టెక్నాలజీతో కూడిన వాహనాలను అభివృద్ధి చేస్తున్నాయి.