రెట్రో లుక్, మోడ్రన్ ఫీచర్స్.. సింగిల్ ఛార్జ్‎‎తో ఏకంగా 500 కిమీ.. త్వరలో మార్కెట్లోకి మూడు ఎలక్ట్రిక్ SUVలు

భారతదేశంలో ఎలక్ట్రిక్ వాహనాలకు (EVs) డిమాండ్, ఆదరణ రోజురోజుకూ విపరీతంగా పెరుగుతోంది. పర్యావరణ పరిరక్షణతో పాటు పెరుగుతున్న ఇంధన ధరలకు ప్రత్యామ్నాయంగా కస్టమర్లు ఈవీల వైపు మొగ్గు చూపుతున్నారు. ఈ తరుణంలో ప్రముఖ అంతర్జాతీయ ఆటోమొబైల్ దిగ్గజం విన్‌ఫాస్ట్ (VinFast) ఇండియన్ ఆటో మార్కెట్లోకి అట్టహాసంగా అడుగుపెట్టడానికి సర్వం సిద్ధం చేసుకుంది.

దేశీయ వినియోగదారుల విభిన్న అవసరాలు, బడ్జెట్లను దృష్టిలో ఉంచుకుని విభిన్న సెగ్మెంట్లలో మూడు సరికొత్త ఎలక్ట్రిక్ ఎస్‌యూవీలను (eSUVs) లాంచ్ చేయడానికి కంపెనీ భారీ ప్రణాళికలను సిద్ధం చేసింది. ఇందులో మైక్రో ఎస్‌యూవీ వీఎఫ్3 (VF3), సబ్-4 మీటర్ ఎస్‌యూవీ వీఎఫ్5 (VF5), ప్రీమియం మోడల్ వీఎఫ్8 (VF8) ఉన్నాయి. రాబోయే రోజుల్లో సరికొత్త ఎలక్ట్రిక్ కారు కొనాలని ఆలోచించే వారికి విన్‌ఫాస్ట్ లైనప్ ఒక అద్భుతమైన ఆప్షన్‌గా మారనుంది.

500 కిలోమీటర్ల భారీ రేంజ్‌తో ప్రీమియం విన్‌ఫాస్ట్ VF8
కంపెనీ తన ప్రీమియం, అత్యంత ప్రతిష్టాత్మక మోడల్ అయిన విన్‌ఫాస్ట్ వీఎఫ్8 (VinFast VF8) తదుపరి తరం అప్‌డేటెడ్ వెర్షన్ డిజైన్ పేటెంట్‌ను ఇటీవల భారతదేశంలో అధికారికంగా ఫైల్ చేసింది. కస్టమర్ల నుంచి అందుతున్న సమాచారం ప్రకారం, రాబోయే కొద్ది నెలల్లోనే ఈ కారు భారత రోడ్లపైకి రానుంది. ఈ భారీ ఎస్‌యూవీలో పవర్‌ఫుల్ 60.13 kWh బ్యాటరీ ప్యాక్‌ను అమర్చారు.

ఇది గరిష్టంగా 228 bhp పవర్‌ను, 330Nm టార్క్‌ను ఉత్పత్తి చేస్తుంది. ఒక్కసారి ఫుల్ ఛార్జ్ చేస్తే ఈ కారు ఏకంగా 500 కిలోమీటర్ల వరకు నడుస్తుందని కంపెనీ క్లెయిమ్ చేస్తోంది. 4,701 మిమీ పొడవు, 1,872 మిమీ వెడల్పు, 1,670 మిమీ ఎత్తుతో పాటు 19-ఇంచుల భారీ అలాయ్ వీల్స్, 170 మిమీ గ్రౌండ్ క్లియరెన్స్‌తో ఈ కారు రోడ్డుపై అత్యంత విలాసవంతమైన, పవర్‌ఫుల్ లుక్‌ను ఇస్తుంది. దీని వీల్‌బేస్ 2,840 మిమీగా ఉండటం వల్ల క్యాబిన్ లోపల ప్రయాణికులకు అద్భుతమైన లెగ్‌స్పేస్ లభిస్తుంది.

టాటా నెక్సాన్ ఈవీకి గట్టి పోటీగా విన్‌ఫాస్ట్ వీఎఫ్5
భారతదేశంలో అత్యంత ప్రజాదరణ పొందిన మధ్యతరగతి ఈవీ మార్కెట్‌ను టార్గెట్ చేస్తూ విన్‌ఫాస్ట్ తీసుకొస్తున్న సబ్-4 మీటర్ ఎలక్ట్రిక్ ఎస్‌యూవీ వీఎఫ్5(VF5). ఇది మార్కెట్లోకి వస్తే ప్రస్తుతం హాట్ కేకుల్లా అమ్ముడవుతున్న టాటా నెక్సాన్ ఈవీ (Tata Nexon.ev), మహీంద్రా ఎక్స్‌యూవీ400, ఎంజీ విండ్సర్ ఈవీలకు నేరుగా సవాల్ విసరనుంది. ఈ కారును వినియోగదారుల సౌకర్యార్థం రెండు బ్యాటరీ ప్యాక్ ఆప్షన్లతో ప్రవేశపెట్టే అవకాశం ఉంది.

ఇందులో బేసిక్ 29.6 kWh బ్యాటరీ ప్యాక్ దాదాపు 268 కిలోమీటర్ల రేంజ్ ఇస్తుండగా, పెద్దదైన 37.23 kWh బ్యాటరీ ప్యాక్ సుమారు 326 కిలోమీటర్ల క్లెయిమ్డ్ రేంజ్ అందిస్తుంది. ఫీచర్ల విషయానికొస్తే.. వీఎఫ్5 మోడల్‌లో 7-ఇంచుల డిజిటల్ ఇన్‌స్ట్రుమెంట్ క్లస్టర్, 8-ఇంచుల టచ్‌స్క్రీన్ ఇన్ఫోటైన్‌మెంట్ సిస్టమ్, వైర్‌లెస్ యాపిల్ కార్ ప్లే, ఆండ్రాయిడ్ ఆటో, పీఎం 2.5 ఎయిర్ ఫిల్టర్, వాయిస్ కమాండ్, కీ‌లెస్ ఎంట్రీ, ఆటోమేటిక్ హెడ్‌ల్యాంప్స్, అట్రాక్టివ్ సన్‌రూఫ్ వంటి అధునాతన ప్రీమియం ఫీచర్లు ఉండనున్నాయి.

సిటీ ట్రాఫిక్ కోసం బడ్జెట్ మైక్రో ఎస్‌యూవీ వీఎఫ్3
ఇక సాధారణ సామాన్య ఈవీ ప్రియులకు అందుబాటులో ఉండే అత్యంత చౌకైన, బడ్జెట్ ఫ్రెండ్లీ మోడల్‌గా 'విన్‌ఫాస్ట్ వీఎఫ్3' (VF3) నిలవనుంది. ఇది ఒక మైక్రో ఎస్‌యూవీ అయినప్పటికీ, దీని బాడీ డిజైన్‌ను పాతకాలపు రెట్రో కార్ల శైలిలో చాలా అగ్రెసివ్‌గా రూపొందించారు. కేవలం నగరాల భీభత్సమైన ట్రాఫిక్, చిన్న చిన్న గల్లీలలో చాలా సులభంగా నడపడానికి, పార్కింగ్ చేయడానికి వీలుగా దీని కాంపాక్ట్ సైజును డిజైన్ చేశారు.

సాంకేతికంగా ఇది చిన్న హ్యాచ్‌బ్యాక్ అయినప్పటికీ, దీని ఎస్‌యూవీ తరహా లుక్ దీనికి మార్కెట్లో ప్రత్యేక గుర్తింపును తెచ్చిపెట్టింది. అంతర్జాతీయంగా ఇది 18.64 kWh బ్యాటరీతో (210 కిమీ రేంజ్) లభిస్తుండగా, దీని టాప్ వేరియంట్లు (29.6 kWh, 37.2 kWh) గరిష్టంగా 326 కిలోమీటర్ల వరకు రేంజ్ ఇస్తాయి. అయితే భారతదేశంలో ఏ బ్యాటరీ వేరియంట్‌ను ముందుగా లాంచ్ చేస్తారనే దానిపై కంపెనీ నుంచి ఇంకా అధికారిక స్పష్టత రావాల్సి ఉంది. విన్‌ఫాస్ట్ రాకతో భారత ఈవీ రంగంలో పోటీ మరింత ఆసక్తికరంగా మారనుంది.