ఈ కారులో ప్రయాణం ఇక సురక్షితం.. ఫుల్ 5-స్టార్ సేఫ్టీ రేటింగ్! సేఫ్టీలో టాటాకు సవాలు

వియత్నాం దేశానికి చెందిన ప్రముఖ కార్ల తయారీ సంస్థ విన్‌ఫాస్ట్ (VinFast) భారత ఆటోమొబైల్ మార్కెట్‌లో అడుగుపెట్టిన తక్కువ సమయంలోనే తనకంటూ ఒక ప్రత్యేక గుర్తింపును ఏర్పరుచుకుంటోంది. కొత్త బ్రాండ్ అయినప్పటికీ, ఆధునిక టెక్నాలజీని వినియోగించడం, ఎలక్ట్రిక్ మొబిలిటీపై స్పష్టమైన విజన్ కలిగి ఉండటం, ముఖ్యంగా భద్రతకు అత్యధిక ప్రాధాన్యం ఇవ్వడం వంటి అంశాలు భారతీయ వినియోగదారులను ఆకర్షిస్తున్నాయి. ఈ కారణంగానే విన్‌ఫాస్ట్ మోడళ్లపై దేశవ్యాప్తంగా ఆసక్తి క్రమంగా పెరుగుతోంది. ఈ నేపథ్యంలో విన్‌ఫాస్ట్ నుంచి వచ్చిన VF 6 ఎలక్ట్రిక్ SUV తాజాగా ఒక కీలకమైన మైలురాయిని సాధించి అందరి దృష్టిని ఆకర్షించింది. ఈ SUVను భారత్ న్యూ కార్ అసెస్‌మెంట్ ప్రోగ్రామ్(Bharat NCAP) కఠిన భద్రతా పరీక్షలకు గురి చేయగా, అత్యున్నతమైన 5-స్టార్ సేఫ్టీ రేటింగ్‌ను దక్కించుకుంది.

ఇది ఈ కారు ప్రయాణికుల భద్రత విషయంలో ఎంత బలంగా, డిజైన్ చేయబడిందో స్పష్టంగా తెలియజేస్తోంది. భారత్ NCAP పరీక్షల్లో విన్‌ఫాస్ట్ VF 6 ప్రదర్శన విశేషంగా ఉంది. వయోజన ప్రయాణికుల రక్షణను అంచనా వేసే పెద్దల విభాగంలో మొత్తం 32 పాయింట్లకు గాను 27.13 పాయింట్లు సాధించింది. ఇది ముందు, పక్క నుంచి జరిగే ఢీకొన్న ప్రమాదాల్లో డ్రైవర్‌తో పాటు ప్రయాణికులకు అధిక స్థాయి రక్షణ లభిస్తుందని సూచిస్తోంది.

అదే సమయంలో, కుటుంబాలతో ప్రయాణించే వారికి అత్యంత కీలకమైన పిల్లల విభాగంలో కూడా ఈ SUV అద్భుతమైన ఫలితాలను నమోదు చేసింది. మొత్తం 49 పాయింట్లకు గాను 44.41 పాయింట్లు సాధించడం ద్వారా పిల్లల భద్రత విషయంలో కూడా ఎలాంటి రాజీ పడలేదని విన్‌ఫాస్ట్ మరోసారి నిరూపించింది. ఈ స్కోర్లు కేవలం సంఖ్యలే కాదు, వాస్తవ జీవితంలో ప్రమాదకర పరిస్థితుల్లో ప్రయాణికుల ప్రాణాలను రక్షించే సామర్థ్యానికి ప్రతీకలుగా నిలుస్తాయి.

కొత్త బ్రాండ్ అయినప్పటికీ, భారత మార్కెట్‌లో ఇప్పటికే భద్రత విషయంలో బలమైన ఇమేజ్‌ను సంపాదించుకున్న విన్‌ఫాస్ట్‌కు ఈ 5-స్టార్ రేటింగ్ మరింత నమ్మకాన్ని తీసుకురానుంది. మొత్తంగా చూస్తే, ఆధునిక ఎలక్ట్రిక్ టెక్నాలజీ, ఆకర్షణీయమైన SUV డిజైన్, అంతర్జాతీయ ప్రమాణాలకు సరిపడే భద్రతా స్థాయి అన్నీ కలిపి VinFast VF 6 ఎలక్ట్రిక్ SUV భారతీయ వినియోగదారులకు ఒక సురక్షితమైన, భవిష్యత్‌కు సిద్ధంగా ఉన్న వాహనంగా నిలుస్తోంది.

ప్రమాదం సంభవించినప్పుడు ప్రయాణికులపై ప్రభావాన్ని తగ్గించేలా ఇందులో మొత్తం 7 ఎయిర్‌బ్యాగులు ఏర్పాటు చేయడం ద్వారా, డ్రైవర్‌తో పాటు కారులో ఉన్న ప్రతి వ్యక్తికి రక్షణను అందిస్తోంది. బ్రేకింగ్, స్టెబిలిటీ విషయంలో కూడా ఈ SUV ఎలాంటి రాజీ పడదు. అత్యవసర పరిస్థితుల్లో చక్రాలు లాక్ అవకుండా నియంత్రించే ABS, బ్రేకింగ్ ఫోర్స్‌ను చక్రాల మధ్య సమతుల్యంగా పంపిణీ చేసే EBD కలిసి పనిచేసి కారు నియంత్రణలో ఉండేలా సహాయపడతాయి.

అలాగే స్కిడ్ అవ్వకుండా, కఠినమైన మలుపులలోనూ వాహనాన్ని స్థిరంగా ఉంచే ESC (ఎలక్ట్రానిక్ స్టెబిలిటీ కంట్రోల్) డ్రైవింగ్ భద్రతను మరింత పెంచుతుంది. ఈ SUVలో అందించిన లెవల్-2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్స్) ఫీచర్లు, ప్రమాదాలు జరగకుండా ముందే నివారించే దిశగా పనిచేస్తాయి. ట్రాఫిక్ పరిస్థితులను గమనిస్తూ డ్రైవర్‌కు సహాయపడే ఈ సిస్టమ్స్ వల్ల లాంగ్ డ్రైవ్స్‌లో అలసట కూడా తగ్గుతుంది.

అదే విధంగా, టైర్లలో గాలి ఒత్తిడి సరిగా ఉందో లేదో నిరంతరం గమనించే TPMS (టైర్ ప్రెజర్ మానిటరింగ్ సిస్టమ్) డ్రైవింగ్ సమయంలో అదనపు భద్రతను అందిస్తుంది. అంతేకాదు, ఆధునిక ఎలక్ట్రానిక్ పార్కింగ్ బ్రేక్ వలన పార్కింగ్ సమయంలో కారు అనుకోకుండా కదిలే ప్రమాదం ఉండదు. అన్ని చక్రాలకూ డిస్క్ బ్రేక్‌లు ఉండటం వల్ల బ్రేకింగ్ పనితీరు మరింత మెరుగ్గా ఉంటుంది.

VinFast VF 6 ఎలక్ట్రిక్ SUV భారతీయ వినియోగదారులకు ధర రూ. 16.49 లక్షలు, గరిష్ట ధర రూ. 18.29 లక్షలు (ఎక్స్-షోరూమ్)కు లభిస్తుంది. ఇది ఎర్త్, విండ్, విండ్ ఇన్ఫినిటీ అనే 3 వేరియంట్లలో కూడా అందుబాటులో ఉంది. దీనికి 59.6 కిలోవాట్ (kWh) బ్యాటరీ ప్యాక్ ఉంది. ఇది పూర్తిగా ఛార్జ్ చేస్తే 470 కిలోమీటర్ల వరకు పరిధిని అందిస్తుంది.