22కిమీ మైలేజ్ ఇచ్చే కారు ఇప్పుడు ఎలక్ట్రిక్ వెర్షన్లో ఎంట్రీ ఇచ్చింది.. దీని రేంజ్ చూస్తే మైండ్ బ్లాకే

ఫోక్స్‌వ్యాగన్ పోలో.. ఈ పేరు వినగానే కారు లవర్స్‎కు ఒక రకమైన జోష్ వస్తుంది. స్టైలిష్ లుక్, అదిరిపోయే పర్ఫార్మెన్స్‌తో హ్యాచ్‌బ్యాక్ సెగ్మెంట్లో రారాజుగా వెలిగిన పోలో, ఇప్పుడు తన పాత వైభవాన్ని కొత్త రూపంలోకి మార్చుకుంది.

అవును, ఫోక్స్‌వ్యాగన్ తన ఐకానిక్ పోలో కారును ఎలక్ట్రిక్ అవతారంలో ID Polo పేరుతో ప్రపంచానికి పరిచయం చేసింది. అదిరిపోయే రేంజ్, మెరుపు వేగంతో ఛార్జ్ అయ్యే బ్యాటరీ, కారు లోపల లగ్జరీ ఫీచర్లతో ఈ ఎలక్ట్రిక్ పోలో ఇప్పుడు ఆటోమొబైల్ మార్కెట్లో సెన్సేషన్ క్రియేట్ చేస్తోంది.

ఫాక్స్‌వ్యాగన్ ఐడీ పోలోను చూస్తే మీరు మొదటి చూపులోనే ప్రేమలో పడిపోవడం ఖాయం. ఇది ఫోక్స్‌వ్యాగన్ గ్రూప్ MEB+ ప్లాట్‌ఫామ్‌పై ఆధారపడి రూపొందించబడింది. దీని పొడవు 4,053 మిమీ, వెడల్పు 1,816 మిమీ, ఎత్తు 1,530 మిమీ ఉంటుంది. దీని వీల్‌బేస్ 2,600 మిమీ ఉండటం వల్ల కారు లోపల చాలా విశాలంగా ఉంటుంది.

ముందు భాగంలో ఐలిడ్ లాంటి డీఆర్ఎల్స్ (DRLs), కనెక్ట్ చేయబడిన ఎల్ఈడీ హెడ్‌లైట్స్ కారుకు ఒక హైటెక్ లుక్ ఇస్తున్నాయి. కారు మధ్యలో వెలిగే ఫాక్స్‌వ్యాగన్ లోగో ప్రత్యేక ఆకర్షణ. 19-అంగుళాల అల్లాయ్ వీల్స్ ఈ హ్యాచ్‌బ్యాక్‌కు ఒక స్పోర్టీ ఎస్‌యూవీ ఫీల్‌ను ఇస్తాయి.

ఐడీ పోలో లోపలికి అడుగుపెడితే ఏదో లగ్జరీ కారులో కూర్చున్న అనుభూతి కలుగుతుంది. డ్యాష్‌బోర్డ్ మధ్యలో 13-అంగుళాల భారీ టచ్‌స్క్రీన్ ఇన్ఫోటైన్‌మెంట్ సిస్టమ్ ఉంటుంది. ఇది వైర్‌లెస్ ఆపిల్ కార్ ప్లే, ఆండ్రాయిడ్ ఆటోను సపోర్ట్ చేస్తుంది. డ్రైవర్ కోసం 10-అంగుళాల డిజిటల్ డిస్‌ప్లే ఉంది.

ఇక మ్యూజిక్ లవర్స్ కోసం హర్మాన్ కార్డాన్ (Harman Kardon) వారి 10-స్పీకర్ల సౌండ్ సిస్టమ్‌ను కంపెనీ ఇచ్చింది. 12 రకాలుగా అడ్జస్ట్ చేసుకునే మెమరీ, మసాజ్ ఫంక్షన్ ఉన్న సీట్లు ఈ కారులో ఉండటం విశేషం. మీరు ఫ్యామిలీతో ట్రిప్ వెళ్లాలనుకుంటే.. ఇందులో 441 లీటర్ల బూట్ స్పేస్ ఉంది, సీట్లు ఫోల్డ్ చేస్తే అది 1,243 లీటర్ల వరకు పెరుగుతుంది.

ఐడీ పోలో పవర్ విషయంలో ఎక్కడా తగ్గలేదు. ఇది 37kWh, 52kWh అనే రెండు బ్యాటరీ ప్యాక్ ఆప్షన్లతో వస్తుంది.
37kWh బ్యాటరీ: ఇది ఒక్కసారి ఛార్జ్ చేస్తే 329 కిలోమీటర్ల రేంజ్‌ను ఇస్తుంది. దీని పవర్ 116hp నుంచి 135hp వరకు ఉంటుంది.
52kWh బ్యాటరీ: ఇది టాప్ ఎండ్ వెర్షన్. ఇది ఏకంగా 454 కిలోమీటర్ల భారీ రేంజ్‌ను అందిస్తుంది. ఇది 211 హార్స్‌పవర్ (HP) శక్తిని విడుదల చేస్తుంది.

మరో ముఖ్యమైన విషయం ఏమిటంటే, ఫాక్స్‌వ్యాగన్ దీనిలో GTI వెర్షన్‌ను కూడా ప్లాన్ చేస్తోంది, ఇది ఏకంగా 226 హార్స్‌పవర్ పవర్‌తో రోడ్లపై చిరుతపులిలా పరిగెడుతుంది. ఎలక్ట్రిక్ కార్లు అంటే ఛార్జింగ్ కావడానికి గంటలు గంటలు పడుతుందని అందరూ అనుకుంటారు. కానీ ఐడీ పోలో ఆ అపోహను చెరిపేసింది.

దీనిలోని పెద్ద బ్యాటరీ (52kWh) కేవలం 24 నిమిషాల్లో 10 శాతం నుంచి 80 శాతం వరకు ఛార్జ్ అయిపోతుంది. దీని కోసం కంపెనీ 105kW డీసీ ఫాస్ట్ ఛార్జర్ సదుపాయాన్ని కల్పిస్తోంది. అంటే మీరు ఏదైనా హోటల్ దగ్గర కారు ఆపి టిఫిన్ చేసేలోపు మీ కారు ప్రయాణానికి మళ్ళీ సిద్ధమైపోతుంది. ఇక చిన్న బ్యాటరీ వేరియంట్ అయితే 23 నిమిషాల్లోనే ఛార్జ్ అవుతుంది.

అంతర్జాతీయ మార్కెట్లో ఐడీ పోలో ధర €25,000 కంటే తక్కువగా ఉంటుందని అంచనా. అంటే మన ఇండియన్ కరెన్సీలో సుమారు రూ.22 లక్షల నుంచి రూ.28 లక్షల మధ్య ఉండవచ్చు. ఫాక్స్‌వ్యాగన్ తన ఐడీ సిరీస్ కార్లను భారత్‌లోకి తీసుకురావాలని ఎప్పటి నుంచో యోచిస్తోంది.

ఇప్పటికే ఐడీ.4 (ID.4) పరీక్షలు జరుగుతున్నాయి. కనుక 2026 చివరి నాటికి లేదా 2027 ఆరంభంలో ఈ ఎలక్ట్రిక్ పోలో భారత రోడ్లపై కనిపించే అవకాశం ఉంది. ప్రీమియం హ్యాచ్‌బ్యాక్ ఇష్టపడే వారికి, పర్యావరణ హితంగా ప్రయాణించాలనుకునే వారికి ఇది ఒక బెస్ట్ ఆప్షన్.