34 నిమిషాల్లోనే 15 వేల ఆర్డర్లు.. సింగిల్ చార్జ్‎తో 902 కిమీ రేంజ్.. కార్ల మార్కెట్లో చైనా సంచలనం

స్మార్ట్‌ఫోన్ల తయారీలో ప్రపంచ ప్రసిద్ధి చెందిన షియోమీ (Xiaomi), ఇప్పుడు ఆటోమొబైల్ రంగంలోనూ తన జెండా పాతేసింది. కంపెనీ ప్రతిష్టాత్మకంగా తీసుకొచ్చిన 2026 Xiaomi SU7 ఎలక్ట్రిక్ కార్ ఇప్పుడు చైనా వీధుల్లో సందడి చేస్తోంది. మార్చి 19న లాంచ్ అయిన ఈ కారుకు వినియోగదారుల నుంచి ఊహించని స్పందన లభించింది. విక్రయాలు ప్రారంభమైన కేవలం 34 నిమిషాల వ్యవధిలోనే ఏకంగా 15,000 ఆర్డర్లు రావడం గమనార్హం. దీనిని బట్టి చూస్తుంటే టెస్లా వంటి అగ్రశ్రేణి కంపెనీలకు షియోమీ గట్టి పోటీని ఇస్తోందని అర్థమవుతోంది. కేవలం వారం రోజుల్లోనే 5 వేల యూనిట్లను డెలివరీ చేసి షియోమీ సీఈఓ లే జున్ (Lei Jun) అందరినీ ఆశ్చర్యపరిచారు.

కళ్లు చెదిరే లుక్.. అబ్బురపరిచే డిజైన్
Xiaomi SU7 కేవలం ఫీచర్ల పరంగానే కాదు, లుక్ పరంగానూ అదిరిపోయేలా ఉంది. దీని ఫాస్ట్‌బ్యాక్ సిల్హౌట్ డిజైన్ కారుకు ఒక స్పోర్టీ లుక్‌ను ఇస్తుంది. కారు ముందు భాగంలో ఉండే వాటర్‌డ్రాప్ హెడ్‌లైట్లు ప్రత్యేక ఆకర్షణగా నిలుస్తాయి. ఇవి రాత్రిపూట 400 మీటర్ల దూరం వరకు వెలుతురును ప్రసరింపజేస్తాయి. ఈ కారు మొత్తం 9 రంగుల్లో అందుబాటులో ఉంది. ముఖ్యంగా క్యాబ్రియోలెట్ బ్లూ, క్రిమ్సన్ రెడ్, ఇండిగో గ్రీన్ రంగులు యువతను అమితంగా ఆకట్టుకుంటున్నాయి. 20 ఇంచుల భారీ వీల్స్, ఎలక్ట్రికల్ గా తెరుచుకునే వెనుక స్పోయిలర్ ఈ కారుకు ఒక లగ్జరీ టచ్ ఇస్తాయి.

ఇది కారు కాదు, సూపర్ కంప్యూటర్
కారు లోపలికి వెళ్తే మనకు ఒక అడ్వాన్స్‌డ్ ప్రపంచం కనిపిస్తుంది. ఇందులో 16.1 ఇంచుల 3K డిస్‌ప్లే, డ్రైవర్ కోసం 56 ఇంచుల హెడ్-అప్ డిస్‌ప్లే ఉన్నాయి. అంతేకాకుండా 7.1 ఇంచుల రొటేటింగ్ ఇన్‌స్ట్రుమెంట్ ప్యానెల్ డ్రైవింగ్ అనుభూతిని మరో స్థాయికి తీసుకెళ్తుంది. వెనుక కూర్చునే ప్రయాణికుల కోసం కూడా ప్రత్యేక స్క్రీన్లు, కంట్రోల్ ప్యానెల్స్ అమర్చారు. షియోమీ ఇన్‌-కార్ అసిస్టెంట్ ద్వారా వాయిస్ కమాండ్లతో కారులోని 95 శాతం ఫంక్షన్లను నియంత్రించవచ్చు. సీట్ల విషయానికి వస్తే, ఇందులో 18 రకాల అడ్జస్ట్‌మెంట్లు, హీటింగ్, 10-పాయింట్ మసాజ్ సౌకర్యం కూడా ఉంది. ప్రయాణం ఎంత దూరమైనా అలసట లేకుండా ఉండేలా జీరో-గ్రావిటీ సీట్లను రూపొందించారు.

రేంజ్ అదుర్స్.. 15 నిమిషాల ఛార్జింగ్‌తో 670 కి.మీ
ఎలక్ట్రిక్ కార్లలో ప్రధానమైనది బ్యాటరీ, రేంజ్. షియోమీ ఈ విషయంలో రాజీ పడలేదు. SU7 మోడల్‌లో మూడు వేరియంట్లు ఉన్నాయి: స్టాండర్డ్, ప్రో, మ్యాక్స్. టాప్ ఎండ్ వేరియంట్ అయిన మ్యాక్స్ వేరియంట్ 897V ఆర్కిటెక్చర్‌ను ఉపయోగిస్తుంది. ఒక్కసారి పూర్తి ఛార్జింగ్ చేస్తే ఏకంగా 902 కిలోమీటర్ల వరకు ప్రయాణించవచ్చు. మరీ ముఖ్యంగా, కేవలం 15 నిమిషాల ఫాస్ట్ ఛార్జింగ్‌తో 670 కిలోమీటర్ల రేంజ్ పొందవచ్చు. ఇది సుదూర ప్రయాణాలు చేసే వారికి ఒక గొప్ప వరం లాంటిది. పర్ఫార్మెన్స్ పరంగా చూస్తే, ఇందులోని V6s మోటార్ కారును క్షణాల్లో వేగాన్ని అందుకోవడానికి సహకరిస్తుంది.

భవిష్యత్తు ప్రణాళికలు, డెలివరీ వేగం
ఆర్డర్లు వెల్లువెత్తుతుండటంతో కస్టమర్లకు త్వరగా కారును అందించడంపై షియోమీ దృష్టి సారించింది. ఇందుకోసం అడ్వాన్స్‌డ్ ప్రొడక్షన్ సిస్టమ్స్, రెడీ-టు-స్టాక్ విధానాన్ని అనుసరిస్తోంది. ఇప్పటికే ఉన్న ప్లాంట్ల సామర్థ్యాన్ని పెంచి, వెయిటింగ్ పీరియడ్‌ను తగ్గించే ప్రయత్నం చేస్తోంది. ప్రపంచవ్యాప్తంగా ఎలక్ట్రిక్ వాహనాలకు డిమాండ్ పెరుగుతున్న తరుణంలో, షియోమీ సులభమైన టెక్నాలజీ, విలాసవంతమైన ఫీచర్లతో మధ్యతరగతి, సంపన్న వర్గాలను ఏకకాలంలో ఆకట్టుకుంటోంది. త్వరలోనే ఈ కారు ఇతర దేశాల మార్కెట్లలోకి కూడా ప్రవేశించే అవకాశం ఉంది.