కస్టమర్లు లేక షోరూమ్‌లకే పరిమితమైన కారు..స్టాక్ క్లియర్ చేయలేక తలపట్టుకుంటున్న ఉద్యోగులు

భారతదేశ ఆటోమొబైల్ రంగంలో హ్యుందాయ్ అంటే ఒక తిరుగులేని బ్రాండ్. ముఖ్యంగా క్రెటా, వెన్యూ వంటి మోడళ్లతో ఎస్‌యూవీ సెగ్మెంట్‌లో ఈ కంపెనీ రారాజుగా వెలుగుతోంది. అయితే అదే హ్యుందాయ్ నుంచి వచ్చిన ఒక అత్యంత ఖరీదైన, అత్యాధునిక ఎలక్ట్రిక్ కారు మాత్రం ఇప్పుడు కస్టమర్లు లేక వెలవెలబోతుంది. టెక్నాలజీ పరంగా ఎన్నో అవార్డులు గెలుచుకున్న ఆ కారును కొనేందుకు ప్రస్తుతం ఎవరూ ముందుకు రాకపోవడం మార్కెట్ వర్గాలను విస్మయానికి గురిచేస్తోంది.

హ్యుందాయ్ మోటార్స్ విడుదల చేసిన మార్చి 2026 సేల్స్ రిపోర్ట్ ప్రకారం.. కంపెనీ అత్యంత గర్వంగా చెప్పుకునే అయానిక్ 5 పరిస్థితి అత్యంత దారుణంగా ఉంది. ఈ ఏడాది (2026) ఇప్పటివరకు కేవలం 2 యూనిట్లు మాత్రమే అమ్ముడయ్యాయి. ఆ రెండు కూడా జనవరి నెలలో విక్రయించినవే. ఫిబ్రవరి, మార్చి నెలల్లో ఈ కారు ఒక్కటంటే ఒక్కటి కూడా సేల్ కాలేదు. గత ఏడాది డిసెంబర్ 2025లో 69 మంది కస్టమర్లను ఆకట్టుకున్న ఈ కారు, కొత్త ఏడాదిలో అట్టడుగు స్థానానికి పడిపోయింది. విచిత్రమేమిటంటే, ఇదే సమయంలో హ్యుందాయ్ క్రెటా 17,838 యూనిట్ల అమ్మకాలతో దుమ్మురేపింది.

అమ్ముడుపోకుండా షోరూమ్‌లలో మిగిలిపోయిన స్టాక్‌ను వదిలించుకునేందుకు హ్యుందాయ్ ఏకంగా రూ.10 లక్షల వరకు బెనిఫిట్స్ ప్రకటిస్తోంది. ఒక కారుపై పది లక్షల రూపాయల తగ్గింపు అంటే అది చిన్న విషయం కాదు. సాధారణంగా లగ్జరీ కార్లపై కూడా ఇంత భారీ ఆఫర్లు ఉండవు. అయినప్పటికీ కస్టమర్లు ఈ కారు వైపు చూడటం లేదు. దీని ధర ఎక్స్-షోరూమ్ వద్ద దాదాపు రూ.46.30 లక్షలుగా ఉంది. ఇంత ఖరీదు పెట్టి ఈవీని కొనే బదులు, అదే ధరలో వోల్వో ఎక్స్ఈ30 లేదా బీఎండబ్ల్యూ వంటి బ్రాండ్ల వైపు ప్రజలు మొగ్గు చూపుతున్నారా అనే అనుమానం కలుగుతోంది.

అయానిక్ 5 ఫీచర్ల పరంగా రాజీ పడలేదు. దీనిలో 72.6kWh భారీ బ్యాటరీ ప్యాక్ ఉంది, ఇది ఒక్కసారి ఛార్జ్ చేస్తే 631 కిలోమీటర్ల రేంజ్ (ARAI సర్టిఫైడ్) ఇస్తుంది. 800 వాట్ల సూపర్ ఫాస్ట్ ఛార్జింగ్ సదుపాయం ఉండటంతో కేవలం 18 నిమిషాల్లోనే 10 నుండి 80 శాతం వరకు ఛార్జ్ అవుతుంది. లోపల 12.3 అంగుళాల డ్యూయల్ స్క్రీన్‌లు, లెవల్ 2 ADAS సేఫ్టీ ఫీచర్లు, 6 ఎయిర్‌బ్యాగ్‌లు వంటి అత్యాధునిక హంగులు ఉన్నాయి. ఇంటీరియర్ కూడా ఎకో-ఫ్రెండ్లీ మెటీరియల్‌తో చాలా రిచ్‌గా ఉంటుంది. ఇంత ఉన్నా, ఈ సెగ్మెంట్‌లో పెరుగుతున్న పోటీ, ఎలక్ట్రిక్ ఇన్ఫ్రాస్ట్రక్చర్ సమస్యలు దీని అమ్మకాలను దెబ్బతీస్తున్నాయి.

ప్రస్తుతం మార్కెట్లో అయానిక్ 5 కు గట్టి పోటీ ఎదురవుతోంది. ముఖ్యంగా బీవైడీ (BYD) సీలయన్ 7, అట్టో 3 వంటి మోడళ్లు తక్కువ ధరలో ఎక్కువ ఫీచర్లతో వస్తున్నాయి. మరోవైపు వోల్వో, బిఎండబ్ల్యూ తమ ఎంట్రీ లెవల్ ఈవీలను అదే ధర శ్రేణిలో లాంచ్ చేశాయి. వీటితో పాటు టాటా సార్లెట్ (మినీ సియెర్రా), మహీంద్రా బిఇ 6 వంటి స్వదేశీ మోడళ్లు కూడా కస్టమర్ల దృష్టిని మరల్చుతున్నాయి. హ్యుందాయ్ సర్వీస్ నెట్‌వర్క్ బాగున్నప్పటికీ, లగ్జరీ ఈవీ విభాగంలో కస్టమర్లు బ్రాండ్ వాల్యూకు ఇచ్చే ప్రాధాన్యత అయానిక్ 5 కి శాపంగా మారింది.

అమ్మకాలు లేని ఈ పరిస్థితిని చక్కదిద్దేందుకు హ్యుందాయ్ తన మార్కెటింగ్ వ్యూహాన్ని మార్చాల్సి ఉంది. భారీ డిస్కౌంట్లను ప్రజల్లోకి బలంగా తీసుకెళ్లడంతో పాటు, అయానిక్ 5 యూనిక్ ఫీచర్లను (ముఖ్యంగా రేంజ్, ఫాస్ట్ ఛార్జింగ్) హైలైట్ చేయాల్సి ఉంటుంది. హ్యుందాయ్ క్రెటా, వెన్యూ, ఎక్స్టర్ వంటి పెట్రోల్ కార్ల అమ్మకాలతో లాభాల్లో ఉన్నప్పటికీ, ఎలక్ట్రిక్ విభాగంలో పట్టు కోల్పోకుండా ఉండాలంటే అయానిక్ 5 వంటి ఫ్లాగ్‌షిప్ మోడళ్లకు కస్టమర్ల మద్దతు అవసరం. రాబోయే పండుగ సీజన్ కైనా ఈ ఐరన్ లెగ్ ముద్రను చెరిపేసుకుని అయానిక్ 5 ఖాతా తెరుస్తుందో లేదో చూడాలి.