దేశీయ మార్కెట్లో టాటా నానో వైఫల్యానికి కారణాలు!

వాస్తవానికి టాటా మోటార్స్ ఈ కారును పశ్చిమ బెంగాల్‌లోని సింగూర్ ప్లాంటు నుండి విడుదల చేసి ఉంటే, ఇది ప్రజల్లోకి మరింత చొచ్చుకొనిపోయి ఉండేదదేమో. ఈ చిన్న కారు ప్లాంటును సింగూర్ నుండి గుజరాత్‌లోని సనంద్‌కు మార్చడం, మళ్లీ కొత్తగా ప్లాంటు నిర్మించుకోవడంలో ఏర్పడిన జాప్యం కూడా టాటా నానో వైఫల్యానికి కారణాలు కావచ్చు.

ఈ జాప్యం కారణంగా, భారత ఆటోమొబైల్ మార్కెట్లో ఎన్నో చిన్న కార్లు ప్రవేశించాయి. 2009లో టాటా నానో దేశీయ మార్కెట్లో విడుదలైంది. అయితే, ఈ రెండేళ్ల కాలంలో టాటా నానోకు ధీటుగా అనేక గ్లోబల్ కంపెనీలు తమ చిన్న కార్లను ప్రవేశపెట్టాయి. మరోవైపు, తొలుత లక్ష రూపాయల ధరకే కారును అందించాలనుకున్న టాటా మోటార్స్, ఆ తర్వాత ఉత్పత్తి వ్యయం పెరిగిన కారణంగా దీని ధరను రూ.1.50 లక్షల వరకూ పెంచింది.

టాటా నానో ఆన్-రోడ్ మీదకు వచ్చే సరికి ధర సుమారు రెండు లక్షల రూపాయలు అవుతోంది. లక్ష రూపాయల కారు కాస్తా రెండు లక్షల రూపాయలు కావడంతో కొనుగోలుదారులు అదే ధరల శ్రేణిలో ఉండే ఇతర పోటీదారులను ఆశ్రయిస్తున్నారు. మరోవైపు నానో కార్లలో మంటలు చెలరేగుతుండటం కూడా ఈ బుజ్జి కారు వైఫల్యానికి మరో ప్రధాన కారణం.

ఈ సంఘటనలతో ఓవైపు కొనుగోలుదాలుకు టాటా నానో కారంటే.. నో.. నో.. అంటుంటే, మరోవైపు ప్రస్తుతం ఈ చిన్న కారును ఉపయోగిస్తున్న వినియోగదారుల గుండెల్లో 'నానో'లు పరిగెత్తుతున్నాయి. గత కొద్ది నెలలుగా సద్దుమణిగిన టాటా నానో ఫైర్ కేసులు తాజాగా గుజరాత్ మరియు శ్రీలంకలలో నమోదు కావడం ఈ మోడల్‌ సేఫ్టీ మరిన్ని అనుమాలను రేకెత్తిస్తున్నాయి.