హెల్మెట్ ధరించకుండా కారు నడిపినందుకు ఫైన్ వేసిన పోలీస్

కారులో సీట్ బెల్ట్ పెట్టుకుని ప్రయాణించాల్సిన వ్యక్తి హెల్మెట్ ఎందుకు ధరించాడనేది మీ ప్రశ్న కదా... మా ప్రశ్న కూడా ఇదే. మొత్తానికి కారులో అలా హెల్మెట్‌తో డ్రైవింగ్ చేయడానికి ఉన్న అసలు కారణమేంటో చూద్దాం రండి.

రాజస్థాన్‌లోని భరత్‌పూర్ ప్రాంతానికి చెందిన విష్ణు శర్మ తన మారుతి ఓమిని కారులో ప్రయాణిస్తున్నపుడు హెల్మెట్ ధరించలేదని పోలీసులకు అతనికి జరిమానా విధించారు.

అవును, మీరు చదివింది అక్షరాలా నిజమే! డిసెంబర్ 1, 2017 విష్ణు శర్మ మారుతి సుజుకి ఓమిని కారులో వెళుతుండగా ఉత్తరప్రదేశ్-రాజస్థాన్ సరిహద్దులో ఉన్న ఉంచా అవుట్ పోస్ట్ పోలీసులు రాజస్థాన్ సరిహద్దులో గస్తీ నిర్వహిస్తూ అతని వాహనాన్ని ఆపారు.

తనిఖీ నిర్వహిస్తున్న సమయంలో, పోలీస్ కానిస్టేబుల్ ప్రహ్లాద్ సింగ్ హెల్మెట్ లేకుండా వాహనాన్ని నడుపుతున్నాడనే కారణంతో రూ. 200 లు జరిమానా విధించాడు. ఈ ఘటన అనంతరం శర్మ ఇక మీదట ఎలాంటి జరిమానాలు పడకుండా ఉండేందుకు ఓ కొత్త హెల్మెట్ కొనుక్కుని వాహనాన్ని నడుపుతున్నాడు.

దీనిపై కానిస్టేబుల్ స్పందిస్తూ, సీట్ బెల్ట్ ధరించలేదు అని రాయడానికి బదులుగా పొరబాటున హెల్మెట్ ధరించలేదని రాసినట్లు తెలిపాడు. కానీ, పోలీసులు ఆపినపుడు నేను సీట్ బెల్ట్ ధరించాను. అంతే కాకుండా చలానాలో టూ వీలర్ అని రాశాడు. అయితే, వెహికల్ నెంబర్ మరియు పేరు కరెక్టుగా రాసినట్లు తెలిపాడు.

పోలీసులు ఇలా అంసంభందమైన చలానాలు ఇవ్వడం ఇది ఫస్ట్ టైమ్ కాదు. గతంలో గోవాలో ఓ మోటార్ సైకిల్ రైడర్ సీట్ బెల్ట్ ధరించలేదని కూడా జరిమానా విధించారు. అక్కడ కూడా కానిస్టేబుల్ పొరబాటు బయటపడింది. నిబంధనల ప్రకారం, కారులో సీట్ బెల్ట్ మరియు బైకు మీద హెల్మెట్ ఖచ్చితం అని మాత్రమే ఉంది. కానీ బైకు మీద సీట్ బెల్ట్ కారులో హెల్మెట్ తప్పనిసరి అని ఎక్కడా లేదు.

డ్రైవ్‌స్పార్క్ తెలుగు అభిప్రాయం!

అకారణంగా పోలీసులు చలానా జారీ చేశారు. నిజానికి ఆ డ్రైవర్ సీట్ బెల్ట్ ధరించినా కూడా హెల్మెట్ లేదనే కారణం చేత జరిమానా విధించడంతో ఇది కూడా రూల్ అనుకుని ఆ డ్రైవర్ అప్పటి నుండి హెల్మెట్ ధరించి వాహనాన్ని నడుపుతున్నాడు.

అనివార్యమైణ కారణాలకు జరిమానాలు విధించకుండా పోలీసులు ప్రజలకు భద్రతా పరమైన అవగాహన కల్పించాలి. ఏయే వాహనాలలో ఎలాంటి భద్రతను పాటించాలనే విషయాలు తెలియజేయాలి.