వినాయక చవితికి గుడ్ న్యూస్.. ఈ 5-సీటర్ ఎస్‌యూవీపై భారీ తగ్గింపు.. రూ.6 లక్షలకే, 20 కి.మీ మైలేజ్!

వినాయక చవితి పండుగ సమీపిస్తోంది. ఈ పవిత్రమైన రోజున చాలామంది కొత్త వస్తువులు, ముఖ్యంగా కొత్త వాహనాలను కొనుగోలు చేయడానికి ఆసక్తి చూపిస్తుంటారు. అలాంటి వారికి గుడ్ న్యూస్. ఈ ఆగస్టు నెలలో ప్రముఖ కార్ల తయారీ సంస్థ నిస్సాన్ తమ మ్యాగ్నైట్ ఎస్‌యూవీపై భారీ డిస్కౌంట్‌లను ప్రకటించింది. ఈ బడ్జెట్-ఫ్రెండ్లీ కారు ఇప్పుడు మరింత సరసమైన ధరలో అందుబాటులో ఉంది. ఈ ఆఫర్ వివరాలు, కారు ప్రత్యేకతలు, మైలేజ్ వంటి పూర్తి సమాచారాన్ని ఈ వార్తలో తెలుసుకుందాం.

గణేశ చతుర్థిని పురస్కరించుకుని నిస్సాన్ కంపెనీ తమ మ్యాగ్నైట్ ఎస్‌యూవీపై భారీ తగ్గింపులను అందిస్తోంది. ఆగస్టు 2025లో కేరళ మినహా దక్షిణాది రాష్ట్రాలన్నింటిలోనూ తయారీ సంవత్సరం 2025 ఉన్న మ్యాగ్నైట్ మోడళ్లపై ఈ ఆఫర్లు వర్తిస్తాయి. వేరియంట్‌ను బట్టి రూ. 40,000 నుండి రూ. 91,000 వరకు ఆర్థిక ప్రయోజనాలు లభిస్తున్నాయి. ఇందులో నగదు తగ్గింపు, ఎక్స్ఛేంజ్ బోనస్ వంటివి ఉన్నాయి. ఈ ఆఫర్లు మధ్యతరగతి కస్టమర్లకు కొత్త కారు కొనుగోలు చేయడానికి మంచి అవకాశం.

నిస్సాన్ మ్యాగ్నైట్ ఎస్‌యూవీ ఎక్స్-షోరూమ్ ధర రూ. 6.14 లక్షల నుంచి రూ. 11.76 లక్షల మధ్య ఉంది. ఇది విసియా, విసియా ప్లస్, అసెంటా, ఎన్ కనెక్టా, టెక్నా, టెక్నా ప్లస్ వంటి వేరియంట్లలో అందుబాటులో ఉంది.

ఈ కారు LED హెడ్‌ల్యాంప్‌లు, LED DRLలు, టైల్ ల్యాంప్‌లు, డ్యుయల్-టోన్ అల్లాయ్ వీల్స్‌తో ఆకర్షణీయమైన డిజైన్‌ను కలిగి ఉంది. స్టార్మ్ వైట్, బ్లేడ్ సిల్వర్, సన్‌రైస్ కాపర్ ఆరెంజ్, ఫ్లేర్ గార్నెట్ రెడ్, ఓనిక్స్ బ్లాక్, వివిడ్ బ్లూ, మెటాలిక్ గ్రే వంటి రంగులలో లభిస్తుంది.

ఇది 5 సీటింగ్ కెపాసిటీతో కుటుంబ ప్రయాణాలకు అనుకూలంగా ఉంటుంది. ఇందులో 336 లీటర్ల బూట్ స్పేస్ లభిస్తుంది. ఈ కారు పొడవు 3994 మి.మీ, వెడల్పు 1758 మి.మీ, ఎత్తు 1572 మి.మీ. దీనికి 205 మి.మీ గ్రౌండ్ క్లియరెన్స్, 2500 మి.మీ వీల్‌బేస్ ఉన్నాయి.

నిస్సాన్ మ్యాగ్నైట్ రెండు ఇంజిన్ ఆప్షన్లతో లభిస్తుంది. 1-లీటర్ నాచురల్లీ ఆస్పిరేటెడ్ పెట్రోల్, 1-లీటర్ టర్బో పెట్రోల్ ఇంజిన్. ఈ కారు 5-స్పీడ్ మాన్యువల్, 5-స్పీడ్ ఆటోమేటిక్, CVT గేర్‌బాక్స్ ఆప్షన్లతో వస్తుంది. మ్యాగ్నైట్ మైలేజ్ లీటరుకు 17 నుండి 24 కి.మీ. వరకు ఉంటుంది. ఇందులో సీఎన్‌జీ కిట్ అమర్చడానికి కూడా అవకాశం ఉంది. ఈ కారులో 40 లీటర్ల ఇంధన ట్యాంక్ ఉంది.

ఈ కారులో 8-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, 7-అంగుళాల డిజిటల్ డ్రైవర్ డిస్‌ప్లే, ఆండ్రాయిడ్ ఆటో, ఆపిల్ కార్‌ప్లే, వైర్‌లెస్ ఫోన్ ఛార్జర్, ఆటోమేటిక్ క్లైమేట్ కంట్రోల్, 4-కలర్ ఆంబియంట్ లైటింగ్ వంటి అడ్వాన్సుడ్ ఫీచర్లు ఉన్నాయి.

భద్రత పరంగా నిస్సాన్ మ్యాగ్నైట్ గ్లోబల్ NCAP నుండి 5-స్టార్ సేఫ్టీ రేటింగ్‌ను పొందింది. ప్రయాణీకుల రక్షణ కోసం ఇందులో 6 ఎయిర్‌బ్యాగ్‌లు, యాంటీలాక్ బ్రేకింగ్ సిస్టమ్, ఎలక్ట్రానిక్ బ్రేక్‌ఫోర్స్ డిస్ట్రిబ్యూషన్, ఎలక్ట్రానిక్ స్టెబిలిటీ కంట్రోల్, టైర్ ప్రెజర్ మానిటరింగ్ సిస్టమ్, ఫ్రంట్, రేర్ పార్కింగ్ సెన్సార్‌లు ఉన్నాయి.

కొద్ది రోజుల క్రితం నిస్సాన్ మ్యాగ్నైట్ కురో ఎడిషన్ కూడా మార్కెట్‌లోకి వచ్చింది. దీని ఎక్స్-షోరూమ్ ధర రూ. 8.30 లక్షలు. దీని బుకింగ్‌లు ఇప్పటికే ప్రారంభమయ్యాయి. రూ. 11,000 ముందస్తు చెల్లింపుతో ఈ కారును ఆర్డర్ చేయవచ్చు. ఇది బ్లాక్ పెయింట్ స్కీమ్‌తో వస్తుంది.