షోరూమ్‌కు వచ్చేవారిలో ఎక్కువ మంది ఈ కారునే అడుగుతున్నారు.. జూలైలో MG నయా రికార్డు

ఇటీవలి కాలంలో JSW-MG మోటార్ బ్రాండ్ భారతీయ ఆటోమొబైల్ రంగంలో తనకు తానుగా నిలుస్తోంది. JSW గ్రూప్, బ్రిటన్‌కు చెందిన MG మోటార్ మధ్య జరిగిన భాగస్వామ్యంతో, కంపెనీ భారత మార్కెట్‌పై మరింత దృష్టి సారించింది. ఈ భాగస్వామ్యం తర్వాత MG బ్రాండ్ వేగాన్ని అందుకుంది. మార్కెట్‌లో తన ఉనికిని బలపరచడమే కాకుండా, అమ్మకాల పరంగా కూడా కొత్త మైలురాళ్లను చేరుకుంటోంది. దీనికి నిదర్శనంగా జూలై 2025లో MG మోటార్ అద్భుతమైన సేల్స్ గణాంకాలను నమోదు చేసింది. ఒక్క నెలలోనే 6,678 కార్లను విక్రయించి, భారత మార్కెట్‌లో తన శక్తిని మరింతగా చాటింది. ఇది MG మోటార్‌కు దేశవ్యాప్తంగా ఒక నెలలో నమోదైన అత్యధిక అమ్మకాలలో ఒకటి కావడం గమనార్హం.

గత ఏడాది ఇదే నెలలో అమ్ముడైన 4,575 కార్లతో పోల్చితే, ఈ ఏడాది MG మొత్తం 6,678 కార్లను విక్రయించి, 2,103 యూనిట్ల వృద్ధిని నమోదు చేసింది. ఇది ఏడాదికి ఏకంగా 46 శాతానికి పైగా వృద్ధిగా భావించవచ్చు, అద్భుతమైన మార్కెట్ గ్రోత్‌కు ఇది ఓ నిదర్శనం. ఈ పెరుగుదల వెనుక MG తీసుకున్న వ్యూహాత్మక నిర్ణయాలు, ప్రీమియం సెగ్మెంట్‌లోకి అడుగుపెట్టడం ముఖ్య పాత్ర పోషించాయి.

MG మోటార్‌కు ఇప్పటివరకు ఉన్న అత్యధిక నెలవారీ అమ్మకాల రికార్డు ఈ నెలలోనే నమోదైంది. జూన్‌లో తక్కువగా ఉన్నా, మొత్తంగా చూస్తే రెండు నెలల్లోనూ వచ్చిన స్థిరమైన పెరుగుదల కంపెనీ పై ఉన్న వినియోగదారుల నమ్మకాన్ని, మార్కెట్ డిమాండ్‌ను స్పష్టంగా తెలియజేస్తోంది. MG మోడళ్లలోని స్టైలింగ్, టెక్నాలజీ, భద్రతా ఫీచర్లు, ఇంకా ఎలక్ట్రిక్ వేరియంట్లపై ఎక్కువ దృష్టి పెట్టడం కూడా ఈ వృద్ధికి దోహదపడింది.

MG మోటార్‌ జూన్ 2025లో 5,829 యూనిట్లు విక్రయించగా, జూలైలో ఈ సంఖ్య 6,678 యూనిట్లకు చేరింది, దీని వల్ల 14.57 శాతం నెలవారీ వృద్ధి నమోదైంది. కేవలం ఒక్క నెలలోనే 849 యూనిట్ల వాల్యూమ్ గ్రోత్‌ను సాధించడంలో కంపెనీ మార్కెటింగ్ వ్యూహాలు, ఉత్పత్తులు కీలక పాత్ర పోషించాయి. ప్రస్తుతం MG భారత మార్కెట్‌లో విండ్సర్ EV, కామెట్ EV, హెక్టర్, గ్లోస్టర్, ఆస్టర్ వంటి పలు మోడళ్లను విక్రయిస్తుంది.

ఈ మోడళ్లన్నీ తమదైన ప్రత్యేకత, టెక్నాలజీ, డిజైన్‌తో వినియోగదారులను ఆకట్టుకుంటున్నాయి. వీటిలో విండ్సర్ EV ప్రస్తుతం భారతదేశంలో అత్యధికంగా అమ్ముడవుతున్న ఎలక్ట్రిక్ వెహికల్ కావడం గమనార్హం. ఇది MG బ్రాండ్‌కు గ్రీన్ మోబిలిటీ విభాగంలో మరింత స్థిరతను అందిస్తోంది. కంపెనీ త్వరలో మెజెస్టర్ అనే కొత్త SUVని మార్కెట్లోకి తీసుకురానుంది. ఇది ప్రీమియం సెగ్మెంట్‌ను లక్ష్యంగా చేసుకొని ఉండే అవకాశముంది. కొత్త లాంచ్‌ల ద్వారా కస్టమర్లకు చేరాలని కంపెనీ చూస్తోంది.

ఇంతకుముందు MG M9, సైబర్‌స్టర్ కార్లను విడుదల చేయడం గమనార్హం. ఈ మోడళ్ల ద్వారా MG బ్రాండ్ తన ప్రత్యేకతను, ఫ్యూచరిస్టిక్ డిజైన్‌ను, అత్యాధునిక టెక్నాలజీని ముందుకు తెచ్చింది. ఈ కార్ల లాంచ్ మాత్రమే కాకుండా, JSW భాగస్వామ్యం తర్వాత కంపెనీ ఉత్పత్తి సామర్థ్యాన్ని, డీలర్ నెట్‌వర్క్‌ను విస్తరించింది. అందుకు ఫలితంగా, జూలై 2025లో వచ్చిన అమ్మకాలు MG మోటార్‌కి ఇప్పటిదాకా జరిగిన మొత్తం అమ్మకాలలో అత్యుత్తమ మైలురాయిగా నిలిచాయి.