10 నెలలుగా ఇండియాలో జనాలు ఎక్కువగా కొంటున్న ఎలక్ట్రిక్ కారు ఇదే.. సగానికి పైగా పెరిగిన కంపెనీ సేల్స్

భారతదేశంలోని ఆటోమొబైల్ మార్కెట్‌లో తనకంటూ ప్రత్యేక స్థానం సంపాదించుకున్న ప్రముఖ కార్ల తయారీదారు JSW MG మోటార్ ఇండియా (Jsw Mg Motor India) మరోసారి తన అమ్మకాలతో హైలైట్ అవుతోంది. తాజాగా ఆగస్టు నెల ముగియగానే కంపెనీ అధికారికంగా తన విక్రయాల గణాంకాలను ప్రకటించింది. ఈ వివరాలు పరిశ్రమలో కొత్త ఉత్సాహాన్ని కలిగించేలా ఉన్నాయి. నివేదికల ప్రకారం, MG మోటార్ ఆగస్టు 2025లో మొత్తం 6,578 యూనిట్ల అమ్మకాలను నమోదు చేసింది. ఈ సంఖ్య కేవలం గణాంకం మాత్రమే కాదు, గత సంవత్సరం ఇదే కాలంలో అమ్ముడైన 4,323 యూనిట్లతో పోలిస్తే దాదాపు 52.16 శాతం వృద్ధిని సూచిస్తుంది. అంటే, కేవలం ఒక సంవత్సర కాలంలోనే MG బ్రాండ్ దేశీయ మార్కెట్లో తన ప్రాచుర్యం, డిమాండ్ ఎంతగానో పెరిగిందని ఇది నిరూపిస్తోంది.

అయితే, మరోవైపు నెలవారీ గణాంకాలు పరిశీలిస్తే, ఆగస్టు అమ్మకాలు జూలై 2025లో నమోదైన 6,678 యూనిట్లతో పోలిస్తే స్వల్పంగా తగ్గాయి. దీంతో కంపెనీకి నెలవారీ (MoM) ప్రాతిపదికన సుమారు 1.5 శాతం తగ్గుదల కనిపించింది. ఈ స్వల్ప పడిపోవడం ఉన్నప్పటికీ, వార్షిక స్థాయిలో సాధించిన భారీ వృద్ధి MG మోటార్ స్థిరమైన అభివృద్ధిని, వినియోగదారుల విశ్వాసాన్ని స్పష్టంగా ప్రతిబింబిస్తోంది. ఇది ఐసీఈతో పాటు ఎలక్ట్రిక్ వాహనాల పరంగా సేల్స్‌లో దూసుకుపోతుంది.

ప్రస్తుత పరిస్థితుల్లో ఎలక్ట్రిక్ వాహనాలు, SUV సెగ్మెంట్లలో పెరుగుతున్న పోటీని తట్టుకుని కూడా MG తన బలమైన ఉనికిని కొనసాగించడం గమనించదగ్గ విషయం. కంపెనీ కొత్త మోడళ్లతో పాటు ఫీచర్లలో చేసే అప్‌డేట్స్, ఆకర్షణీయమైన ధరలు, అలాగే కస్టమర్ సర్వీస్ మీద పెట్టే దృష్టి ఇవన్నీ ఈ విజయానికి ప్రధాన కారణాలుగా చెప్పవచ్చు. గత ఏడాదితో పోలిస్తే రికార్డు స్థాయిలో వృద్ధిని నమోదు చేయడం కంపెనీకి గొప్ప మైలురాయి.

అదే సమయంలో నెలవారీ స్వల్ప తగ్గుదల MG ముందున్న పోటీ సవాళ్లను గుర్తు చేస్తుంది. ఈసారి MG మోటార్ అమ్మకాలలో ప్రత్యేకంగా చెప్పుకోవలసిన విషయం ఏమిటంటే, ఎలక్ట్రిక్ కార్లే ప్రధానంగా ఎక్కువ వాటా సాధించాయి. దేశీయ మార్కెట్‌లో ఎలక్ట్రిక్ వాహనాలపై పెరుగుతున్న ఆసక్తిని ఇది స్పష్టంగా చూపిస్తోంది. జూలై 2025తో పోలిస్తే, MG విండ్సర్ EV రికార్డు స్థాయిలో 5 శాతం నెలవారీ వృద్ధిని నమోదు చేసింది.

ఈ పెరుగుదల చిన్నదిగా కనిపించినా, ప్రస్తుత ఆటోమొబైల్ పరిస్థితుల్లో ఇది ఎంతో గణనీయమైన అంశం. విండ్సర్ EVని అక్టోబర్ 2024లో భారత మార్కెట్లోకి ప్రవేశపెట్టినప్పటి నుంచి, ఎప్పటికప్పుడూ అంచనాలను మించి ప్రదర్శిస్తూ వచ్చింది. కేవలం తక్కువ సమయంలోనే ఇది దేశంలో అత్యధికంగా అమ్ముడైన ఎలక్ట్రిక్ కారు స్థాయికి చేరుకోవడం MGకి గర్వకారణం. అంతేకాదు, వరుసగా పది నెలలుగా అగ్రశ్రేణి EV స్థానాన్ని కాపాడుకోవడం విండ్సర్ EV విజయానికి నిలువెత్తు సాక్ష్యం.

ప్రస్తుతం MG మోటార్ ఇండియా పోర్ట్‌ఫోలియోలో ఎనిమిది మోడళ్లు ఉన్నాయి. వీటిలో ఐదు ఇంధనంతో నడిచే వాహనాలు కాగా, మిగిలినవి విద్యుత్ ఆధారిత వాహనాలు. ఈ రెండు విభాగాల్లోనూ డిమాండ్ ఉండటమే ఆగస్టు 2025 అమ్మకాల పెరుగుదలకు ప్రధాన కారణమైంది. వినియోగదారులు ఒకవైపు ఇంధన వాహనాలను ఎంపిక చేసుకుంటూ, మరోవైపు ప్రీమియం ఎలక్ట్రిక్ కార్లపై మరింత ఆసక్తి చూపించడం MG కి లాభంగా మారింది.

భారతదేశంలో పండుగ సీజన్ ప్రారంభం MG అమ్మకాలకు అదనపు బలాన్ని ఇచ్చింది. పండుగ సమయంలో కొత్త వాహనాలను కొనుగోలు చేసే వినియోగదారులు పెరగడంతో, కంపెనీకి కొత్త ఆర్డర్లు రికార్డు స్థాయిలో వచ్చాయి. ఈ సానుకూల వాతావరణాన్ని మరింతగా ఉపయోగించుకోవడానికి MG తన నెట్‌వర్క్ విస్తరణపై దృష్టి పెట్టింది. ఇదిలా ఉంటే ఆగస్టు 2025లో మాత్రమే MG మూడు కొత్త డీలర్‌షిప్‌లను ప్రారంభించింది. దేశవ్యాప్తంగా 90% పైగా మార్కెట్ కవరేజ్ సాధించింది.