రైతులకు డబుల్ ధమాకా.. కరెంట్ పోవడంతో పొలంలో మోటార్లు నడిపిస్తున్న ఈవీలు.. టెక్నాలజీ అదుర్స్ కదూ

ఎలక్ట్రిక్ వెహికల్ కొనేటప్పుడు ప్రతి ఒక్కరు ఇంధన ఖర్చులను సాధ్యమైనంత వరకు తగ్గించుకోవాలని అనుకుంటారు. కానీ, ఈవీలు కొంటే ఇంకా ఎన్నో లాభాలు ఉన్నాయి. మీ కరెంట్ కారును ఉపయోగించి మరో ఎలక్ట్రానిక్ వస్తువులను కూడా నడపగలరు. ఏంటి నమ్మడం లేదా.. కానీ ఇది నిజం. ఇదే V2L టెక్నాలజీ. ఈ సిస్టమ్ ద్వారా మీరు కారులోని బ్యాటరీ నుంచి ఇతర వస్తువులకు కరెంటు తీసుకోవచ్చు.

దేశంలో అగ్రగామి ఆటోమొబైల్ సంస్థ టాటా కంపెనీ మొదట నెక్సాన్ ఈవీలో ఈ ఫీచర్‌ని ప్రవేశపెట్టింది. ఇప్పుడు ఇది కర్వ్ ఈవీలో కూడా అందుబాటులో ఉంది. ఇటీవల సోషల్ మీడియాలో ఒక ఫోటో వైరల్ అవుతోంది. అందులో ఒక టాటా కర్వ్ ఈవీ నుండి V2L టెక్నాలజీ ద్వారా వాటర్ పంప్‌ను నడుపుతున్నారు. ఒక పొలంలో నీటిని పంప్ చేయడానికి ఈ టాటా కర్వ్ ఫీచర్‌ను ఉపయోగించారు.

ఇలా చాలా మంది ఈవీ ఓనర్స్ తమ కార్లలోని ఈ ఫీచర్లను వాడుకోవడం మనం చూసే ఉంటాం. V2V టెక్నాలజీ (Vehicle to Vehicle) అంటే, ఒక వాహనం బ్యాటరీ పవర్‌ను ఉపయోగించి మరో ఎలక్ట్రిక్ వాహనాన్ని ఛార్జ్ చేయగలిగే సిస్టమ్. ఈ V2L, V2V రెండు సిస్టమ్స్ ఉన్న కొన్ని వాహనాలను భారత మార్కెట్‌లో మీరు కొనవచ్చు. మీ దగ్గర ఉన్నఈవీలు లేదా మీరు కొనాలనుకుంటున్న ఈవీలు ఇందులో ఉండొచ్చు.

టాటా కర్వ్ ఈవీ రెండు బ్యాటరీ ఆప్షన్లతో వస్తుంది. 45kWh మోడల్ 150 బీహెచ్‌పీ పవర్‌ను, గరిష్టంగా 215 ఎన్ఎమ్ టార్క్‌ను ఉత్పత్తి చేయగలదు. ఈ కారు 15A సాకెట్లు, 72kW AC వాల్ బాక్స్‌లు, DC ఫాస్ట్ ఛార్జర్‌లతో సహా పలు ఛార్జింగ్ ఆప్షన్‌లకు సపోర్ట్ చేస్తుంది.

55kWh మోడల్ వేరియంట్ 167 బీహెచ్‌పీ పవర్‌ను, 215 ఎన్ఎమ్ టార్క్‌ను అందిస్తుంది. దీని ప్రత్యేకత ఏమిటంటే, 70kW ఛార్జర్‌ని ఉపయోగించి కేవలం 40 నిమిషాల్లో 10% నుండి 80% వరకు ఛార్జ్ చేయగలదు. అంతేకాకుండా, ఈ 55kWh మోడల్ బై-డైరెక్షనల్ ఛార్జింగ్‌ను కూడా సపోర్ట్ చేస్తుంది. అంటే, ఇది వెహికల్-టు-వెహికల్, వెహికల్-టు-లోడ్ ఛార్జింగ్ కెపాసిటీలను కలిగి ఉంది.

ఈ V2L, V2V ఫీచర్లు ఉన్న ఇతర వాహనాల విషయానికి వస్తే ఎంజీ కంపెనీకి చెందిన విండ్సర్ ఈవీ తాజా మోడల్ విండ్సర్ ఈవీ ప్రో ప్రధానమైనది. దేశంలోనే మొదటి క్రాస్ఓవర్ యుటిలిటీ ఎలక్ట్రిక్ వాహనంలో ఇది టాప్-ఎండ్ వేరియంట్‌గా వస్తుంది. దీనికి 52.9 kWh బ్యాటరీ ప్యాక్ ఉంది.

ఒక్కసారి ఛార్జ్ చేస్తే 449 కిలోమీటర్ల వరకు వెళ్లగలదు. మునుపటి వెర్షన్ కంటే రేంజ్ పెరిగింది అనేది గమనించదగిన విషయం. బ్యాటరీ కెపాసిటీ పెరిగినప్పటికీ, విండ్సర్ ఈవీ ప్రో పవర్, టార్క్ అవుట్‌పుట్‌లు వరుసగా 136 బీహెచ్‌పీ, 200 ఎన్ఎమ్ వద్ద మారకుండా ఉన్నాయి. ఈ వాహనం ఫ్రంట్-వీల్ డ్రైవ్ సెటప్‌తో మార్కెట్‌లో ఉంది.

ఛార్జింగ్ విషయానికొస్తే, విండ్సర్ ఈవీ ప్రోలో కంపెనీ 7.4kWh AC ఛార్జర్‌ను అందించింది. బ్యాటరీని పూర్తిగా ఛార్జ్ చేయడానికి సుమారు 9.5 గంటల సమయం పడుతుంది. ఈ V2L, V2V టెక్నాలజీలు EVలను కేవలం ప్రయాణ సాధనాలుగా కాకుండా, ఎమర్జెన్సీ సమయాల్లో లేదా ఇంట్లో కరెంట్ లేని సమయంలో పవర్ సోర్స్‌లుగా కూడా ఉపయోగపడేలా చేస్తున్నాయి.