డ్రైవర్ల కోసం బెస్ట్ కార్లు ఇవే.. రూ.10 లక్షల లోపే 6-స్పీడ్ మాన్యువల్ గేర్‌బాక్స్‌తో వచ్చే కార్లు ఇవే

ఈ రోజుల్లో ఆటోమేటిక్ కార్ల పాపులారిటీ బాగా పెరిగిపోతోంది. ఎందుకంటే వీటిని నడపడం చాలా సులభం. పైగా కొన్ని ఆటోమేటిక్ మోడల్స్ మంచి మైలేజీ కూడా ఇస్తున్నాయి. ఇంట్లో మహిళలు కూడా నడపడానికి సులభంగా ఉంటుందని చాలా మంది ఆటోమేటిక్ కార్లనే కొంటున్నారు. అయితే, ఇప్పటికీ కొంతమందికి ముఖ్యంగా పురుషులకు, మాన్యువల్ కార్లు అంటేనే ఇష్టం. క్లచ్ నొక్కుతూ, గేర్లు మారుస్తూ ప్రయాణించడంలో వారికి ఒక ప్రత్యేకమైన ఆనందం ఉంటుంది.

గతంలో కార్లలో 4-స్పీడ్ గేర్‌బాక్స్‌లు ఎక్కువగా ఉండేవి.. తర్వాత 5-స్పీడ్‌కు మారాయి. ఈ మధ్య వరకు చాలా కార్లలో 5-స్పీడ్ గేర్లు ఉండేవి. కానీ ఇప్పుడు కొత్త ట్రెండ్ మొదలైంది. అదే, 6-స్పీడ్ గేర్‌బాక్స్‌. హైవేల మీద ప్రయాణించేటప్పుడు ఇది మంచి మైలేజీని ఇస్తుంది. మరి రూ. 10 లక్షల బడ్జెట్‌లో 6-స్పీడ్ గేర్‌బాక్స్‌ ఉన్న కార్లు ఏంటో చూద్దాం.

1. టాటా నెక్సాన్ : టాటా మోటార్స్ నుండి ఎక్కువగా అమ్ముడయ్యే మోడళ్లలో నెక్సాన్ ఒకటి. నిజానికి, టాటా సంస్థకు ఈ కాంపాక్ట్ ఎస్‌యూవీ అమ్మకాలే వెన్నెముక అని చెప్పొచ్చు. పెట్రోల్, డీజిల్, సీఎన్‌జీ, ఎలక్ట్రిక్ వంటి వివిధ రకాల పవర్ ట్రైన్ ఆప్షన్లలో నెక్సాన్ అందుబాటులో ఉంది. ఈ కారు 6-స్పీడ్ మాన్యువల్ గేర్‌బాక్స్ ఆప్షన్ ఉన్న బడ్జెట్-ఫ్రెండ్లీ ఎస్‌యూవీలలో ఒకటి.

నెక్సాన్ స్మార్ట్, స్మార్ట్ ప్లస్, ప్యూర్, క్రియేటివ్ వేరియంట్లలో ఈ 6-స్పీడ్ మాన్యువల్ గేర్‌బాక్స్ లభిస్తుంది. దీని ధర రూ. 9 లక్షల నుండి ప్రారంభమవుతుంది. మీరు 6-స్పీడ్ గేర్‌బాక్స్ ఉన్న కారు కోసం చూస్తున్నట్లయితే ఇది ఒక మంచి ఎంపిక.

2. హ్యుందాయ్ వెన్యూ : హ్యుందాయ్ వెన్యూలో 6-స్పీడ్ ఇంటెలిజెంట్ మాన్యువల్ గేర్‌బాక్స్ (iMT) ఆప్షన్ ఉంది. iMT అంటే క్లచ్ అవసరం లేకుండా గేర్లు మార్చవచ్చు. ఇది కేవలం 1.0 లీటర్ టర్బో పెట్రోల్ ఇంజిన్‌తో మాత్రమే లభిస్తుంది. ఈ వెన్యూ కారు ధర రూ. 10 లక్షల లోపే ఉంది. కాబట్టి, క్లచ్ నొక్కకుండా గేర్లు మార్చే సౌకర్యం కావాలనుకునే వారికి ఇది ఒక ఆకర్షణీయమైన డీల్ అవుతుంది. వెన్యూ మంచి డిజైన్ మరియు అధునాతన ఫీచర్లతో వచ్చింది.

3. స్కోడా కుషాక్ : చెక్ రిపబ్లిక్ కార్ల తయారీ సంస్థ స్కోడా ఎంట్రీ-లెవల్ ఎస్‌యూవీ అయిన కుషాక్‌లో కూడా 6-స్పీడ్ మాన్యువల్ గేర్‌బాక్స్ ఉంది. డ్రైవింగ్ ఇష్టపడేవారికి ఇది ఒక సంతోషకరమైన విషయం. ఈ కారు కూడా రూ. 10 లక్షల లోపు ధరలో లభిస్తుంది. దీని 1.0 లీటర్ టీఎస్ఐ ఇంజిన్‌తో కుషాక్ నడపడానికి చాలా సరదాగా ఉంటుంది. ఇది బలమైన పెర్ఫార్మెన్స్, అద్భుతమైన రైడింగ్ అనుభవాన్ని అందిస్తుంది.

4. హ్యుందాయ్ ఐ20 : హ్యుందాయ్ వెన్యూ మాదిరిగానే, ఐ20 ప్రీమియం హ్యాచ్‌బ్యాక్‌లో కూడా 6-స్పీడ్ ఇంటెలిజెంట్ మాన్యువల్ గేర్‌బాక్స్ (iMT) ఆప్షన్ అందుబాటులో ఉంది. iMT ట్రాన్స్‌మిషన్‌తో వచ్చే వేరియంట్‌ల ధర రూ.8.80 లక్షల నుండి రూ.9.90 లక్షల వరకు ఉంది. ఈ iMT సిస్టమ్ టర్బో పెట్రోల్ ఇంజిన్‌తో మాత్రమే లభిస్తుంది. ఈ కారు ఇతర మోడల్స్‌లో 5-స్పీడ్ మాన్యువల్ గేర్‌బాక్స్ స్టాండర్డ్‌గా వస్తుంది. ఐ20 దాని స్టైలిష్ లుక్, ఫీచర్లతో యూత్‎ను ఆకట్టుకుంటుంది.