కొత్త కార్ల జాతరకు రెడీగా ఉండండి.. ఏప్రిల్‌లో విడుదల కానున్న టాప్ 5 సరికొత్త మోడల్స్

భారత ఆటోమొబైల్ రంగంలో 2026 సంవత్సరం ఒక కొత్త ఉత్తేజంతో ప్రారంభం కాబోతోంది. ముఖ్యంగా ఏప్రిల్ నెల కార్ల ప్రేమికులకు పండగలా మారనుంది. మధ్యతరగతి కుటుంబాలకు నచ్చే బడ్జెట్ కార్ల నుంచి, ఎలైట్ క్లాస్ మెచ్చే లగ్జరీ ఎలక్ట్రిక్ వాహనాల వరకు ఐదు అదిరిపోయే మోడల్స్ మార్కెట్లోకి రాబోతున్నాయి. మారుతి సుజుకి, టయోటా, ఎంజీ వంటి దిగ్గజ సంస్థలు తమ అస్త్రాలను సిద్ధం చేశాయి. కొత్త కారు కొనాలనే ప్లాన్‌లో ఉన్నవారు ఒక్క నిమిషం ఆగి, వచ్చే నెల లాంచ్ కాబోతున్న ఈ కార్ల వివరాలను తెలుసుకుందాం.

1. 2026 మారుతి సుజుకి బ్రెజ్జా ఫేస్‌లిఫ్ట్ (Maruti Suzuki Brezza Facelift)
భారతదేశంలో అత్యధికంగా అమ్ముడవుతున్న కాంపాక్ట్ ఎస్‌యూవీలలో బ్రెజ్జా ఒకటి. 2026 ఏప్రిల్ నెలలో ఈ కారు సరికొత్త ఫేస్‌లిఫ్ట్ వెర్షన్‌లో రాబోతోంది. ఈ కొత్త అప్‌డేట్‌లో కారు వెలుపలి డిజైన్‌లో కీలక మార్పులు చేయడంతో పాటు, లోపల క్యాబిన్‌ను మరింత లగ్జరీగా మార్చబోతున్నారు. ముఖ్యంగా సీఎన్‌జీ (CNG) ప్రియుల కోసం మారుతి ఒక అద్భుతమైన టెక్నాలజీని తీసుకురాబోతోంది. సాధారణంగా సీఎన్‌జీ కార్లలో బూట్ స్పేస్ (డిక్కీ) ఉండదు, కానీ కొత్త బ్రెజ్జాలో అండర్ బాడీ సీఎన్‌జీ ట్యాంక్ టెక్నాలజీని వాడబోతున్నారు. దీనివల్ల గ్యాస్ సిలిండర్ కారు అడుగు భాగాన ఉండి, లగేజీ పెట్టుకోవడానికి పూర్తి స్థలం లభిస్తుంది. డ్రైవింగ్ అనుభవాన్ని మరింత మెరుగుపరచడానికి ఇందులో 6-స్పీడ్ మాన్యువల్ గేర్‌బాక్స్‌ను కూడా జోడించబోతున్నారు.

2. టయోటా అర్బన్ క్రూయిజర్ ఇబెలా (Toyota Urban Cruiser EBELLA)
టయోటా సంస్థ భారత్‌లో తన మొట్టమొదటి పూర్తిస్థాయి ఎలక్ట్రిక్ ఎస్‌యూవీ ఇబెలాను లాంచ్ చేయడానికి సిద్ధమైంది. ఇది మారుతి సుజుకికి చెందిన ఈ-విటారా (e-Vitara) ప్లాట్‌ఫామ్‌పై ఆధారపడి రూపొందింది. ఏప్రిల్ నెలలో దీని ధరల వివరాలను కంపెనీ అధికారికంగా వెల్లడించనుంది. ఈ కారులో 49 kWh, 61 kWh అనే రెండు రకాల బ్యాటరీ ప్యాక్ ఆప్షన్లు ఉండబోతున్నాయి. ఒక్కసారి ఛార్జింగ్ చేస్తే దాదాపు 543 కిలోమీటర్ల వరకు ప్రయాణించే అవకాశం ఉందని కంపెనీ పేర్కొంటోంది. అంటే నగరాల్లోనే కాకుండా దూర ప్రయాణాలకు కూడా ఈ ఈవీ అద్భుతంగా పనికివస్తుంది. టయోటా బ్రాండ్ వాల్యూ, ఎలక్ట్రిక్ పవర్ కలయికలో రాబోతున్న ఈ కారు మార్కెట్లో సంచలనం సృష్టించడం ఖాయం.

3. ఎంజీ మెజెస్టర్ (MG Majester)
లగ్జరీ కార్లను ఇష్టపడే వారి కోసం ఎంజీ మోటార్స్ మెజెస్టర్ పేరుతో ఒక భారీ ఎస్‌యూవీని తీసుకువస్తోంది. ఇది త్రీ-రో (ముడు వరుసల సీట్లు) కలిగిన ఫుల్-సైజ్ ఎస్‌యూవీ. ప్రస్తుతం ఉన్న ఎంజీ గ్లోస్టర్ కంటే ఇది మరింత ప్రీమియం, హై-ఎండ్ ఫీచర్లతో వస్తోంది. ఇప్పటికే రూ.41,000 టోకెన్ అమౌంట్‌తో ఈ కారు బుకింగ్స్ ప్రారంభమయ్యాయి. ఏప్రిల్ నెలలో దీని అధికారిక ధరలను ప్రకటించనున్నారు. లోపల అదిరిపోయే స్పేస్, క్వాలిటీ ఇంటీరియర్స్, అత్యాధునిక సేఫ్టీ ఫీచర్లతో రాబోతున్న మెజెస్టర్, ఫార్చ్యూనర్ వంటి కార్లకు గట్టి పోటీ ఇవ్వబోతోంది. ఎలైట్ లుక్, అడ్వాన్స్‌డ్ టెక్నాలజీ కోరుకునే వారికి ఇది బెస్ట్ ఛాయిస్.

4. ఫోక్స్‌వ్యాగన్ టైగూన్ ఫేస్‌లిఫ్ట్ (Volkswagen Taigun Facelift)
జర్మన్ ఇంజనీరింగ్, పటిష్టమైన బాడీ క్వాలిటీకి మారుపేరుగా నిలిచే ఫాక్స్‌వ్యాగన్ టైగూన్, ఏప్రిల్ 9, 2026న తన అప్‌డేటెడ్ వెర్షన్‌ను విడుదల చేయబోతోంది. ఈ కొత్త టైగూన్ డిజైన్ కంపెనీ గ్లోబల్ మార్కెట్లలో విక్రయిస్తున్న కార్ల నుంచి స్ఫూర్తి పొందింది. దీనివల్ల కారు గతంలో కంటే మరింత స్పోర్టీగా, స్టైలిష్‌గా కనిపిస్తుంది. క్యాబిన్ లోపల కొత్త టెక్నాలజీ, మెరుగైన ఏసీ కూలింగ్ సిస్టమ్, ప్రీమియం డ్యాష్‌బోర్డ్ ఫినిషింగ్ ఉండబోతున్నాయి. ఇంజిన్ పరంగా పెద్ద మార్పులు లేకపోయినా, పర్ఫార్మెన్స్ విషయంలో మాత్రం మరింత షార్ప్‌గా ఉంటుందని తెలుస్తోంది. సేఫ్టీ విషయంలో రాజీ పడని వారికి టైగూన్ ఎప్పుడూ మొదటి ప్రాధాన్యతే.

5. మెర్సిడెస్-బెంజ్ సీఎల్ఏ ఈవీ (Mercedes-Benz CLA EV)
లగ్జరీ ఎలక్ట్రిక్ కార్ల విభాగంలో మెర్సిడెస్-బెంజ్ ఒక అడుగు ముందుకేసి సరికొత్త సీఎల్ఏ ఈవీని లాంచ్ చేస్తోంది. ఇది భారత్‌లో ఉన్న ఏ-క్లాస్ సెడాన్, ఈక్యూబి మోడళ్ల స్థానాన్ని భర్తీ చేయనుంది. ఇందులో 85kWh సామర్థ్యం కలిగిన అత్యంత పవర్ఫుల్ బ్యాటరీ ప్యాక్ ఉండబోతోంది. ఇది రియర్ వీల్ డ్రైవ్ మోటార్‌తో వస్తుంది, దీనివల్ల డ్రైవింగ్ స్పీడ్, కంట్రోల్ అద్భుతంగా ఉంటుంది. ప్రీమియం డిజైన్, ఏరోడైనమిక్ బాడీ, భారీ రేంజ్‌తో ఈ కారు ఎలక్ట్రిక్ లగ్జరీ కార్ల మార్కెట్‌ను శాసించబోతోంది. ఏప్రిల్ నెలలో భారత రోడ్లపైకి రాబోతున్న అత్యంత ఖరీదైన, విలాసవంతమైన కారు ఇదే కానుంది.