కారు కొంటే మరొక కారు ఫ్రీ.. ప్రపంచంలోనే ఇలాంటి ఆఫర్ లేదు.. షోరూం దగ్గర ఎగబడుతున్న జనం

ఆటోమొబైల్ రంగంలో ఎప్పుడూ లేనంత భారీ ఆఫర్‌తో ఒక కార్ల డీలర్ షిప్ వార్తల్లో నిలిచింది. షాపుల్లో బట్టలు కొన్నప్పుడు బై వన్ గెట్ వన్(ఒకటి కొంటే ఒకటి ఫ్రీ) ఆఫర్ చూడటం మనకు అలవాటే. కానీ ఒక కారు కొంటే ఏకంగా మరో కారును ఫ్రీగా ఇచ్చే ఆఫర్ విన్నారా? వినడానికి నమ్మశక్యంగా లేకపోయినా ఇది నిజం. తమిళనాడులోని కోయంబత్తూరుకు చెందిన SGA సిట్రోయెన్ (Citroen) డీలర్ షిప్ ఈ సంచలన ఆఫర్‌ను ప్రకటించింది. వారి వద్ద ప్రీమియం SUV అయిన సిట్రోయెన్ C5 ఎయిర్‌క్రాస్ కొనుగోలు చేస్తే మరొక కారును ఫ్రీగా ఇస్తామని ప్రకటించి అందరినీ ఆశ్చర్యపరిచారు.

కోయంబత్తూరులోని ఈ డీలర్ షిప్ వద్ద సిట్రోయెన్ కంపెనీకి చెందిన ఫ్లాగ్‌షిప్ మోడల్ C5 Aircross (దీని ధర సుమారు రూ.37.4 లక్షల ఎక్స్-షోరూమ్) కొనుగోలు చేసిన వారికి, Citroen C3 X అనే మరో కారును పూర్తిగా ఉచితంగా ఇస్తామని డీలర్ షిప్ వారు సోషల్ మీడియా వేదికగా ప్రకటించారు. ఈ వార్త తెలియగానే కారు కొనాలనుకునే వారు షోరూం వద్ద క్యూ కడుతున్నారు. అయితే ఈ ఆఫర్ స్టాక్ ఉన్నంత వరకు మాత్రమే అందుబాటులో ఉంటుందని వారు స్పష్టం చేశారు.

సిట్రోయెన్ C5 ఎయిర్‌క్రాస్
ఈ ఆఫర్‌లో ప్రధానమైన కారు సిట్రోయెన్ C5 ఎయిర్‌క్రాస్. ఇది మార్కెట్లో ఉన్న జీప్ కంపాస్, హ్యుందాయ్ టక్సన్ వంటి ప్రీమియం కార్లకు గట్టి పోటీ ఇస్తుంది. దీని ప్రత్యేకతలు చూస్తే.. ఇందులో 2.0-లీటర్ డీజిల్ ఇంజిన్ ఉంటుంది. ఇది 177 hp పవర్, 400 Nm టార్క్‌ను ఉత్పత్తి చేస్తుంది. 8-స్పీడ్ ఆటోమేటిక్ గేర్‌బాక్స్ ప్రయాణాన్ని చాలా స్మూత్‌గా చేస్తుంది.

సిట్రోయెన్ బ్రాండ్ ప్రత్యేకత ఫ్లయింగ్ కార్పెట్ రైడ్. దీని హైడ్రాలిక్ సస్పెన్షన్ సిస్టమ్ రోడ్డుపై ఉన్న గుంతలను అసలు లోపలికి తెలియనివ్వదు. ఇందులో 10-అంగుళాల టచ్‌స్క్రీన్, 12.3-అంగుళాల డిజిటల్ డ్రైవర్ డిస్ప్లే, డ్యూయల్ జోన్ క్లైమేట్ కంట్రోల్, పనోరమిక్ సన్‌రూఫ్, 6 ఎయిర్‌బ్యాగ్‌లు ఉన్నాయి. అలాగే 580 లీటర్ల భారీ బూట్ స్పేస్ దీని సొంతం.

ఫ్రీగా వచ్చే సిట్రోయెన్ C3 X ఎలా ఉంటుంది?
ఆగస్టు 2025లో లాంచ్ అయిన ఈ కారు ఒక కాంపాక్ట్ క్రాస్ ఓవర్. దీని ధర సుమారు రూ.8 లక్షల నుంచి రూ.14 లక్షల వరకు ఉంటుంది. ఫ్రీగా ఇస్తున్నప్పటికీ ఇందులో ఫీచర్లకు కొదవ లేదు. ఇందులో 1.2 లీటర్ టర్బో పెట్రోల్ ఇంజిన్ ఉంది. ఇది మంచి మైలేజీని (సుమారు 19.3 kmpl) ఇస్తుంది. 10.25-అంగుళాల టచ్‌స్క్రీన్, 360-డిగ్రీ కెమెరా, వైర్‌లెస్ కనెక్టివిటీ వంటి ఆధునిక ఫీచర్లు ఇందులో ఉన్నాయి. 6 ఎయిర్‌బ్యాగులు, ఎలక్ట్రానిక్ స్టెబిలిటీ కంట్రోల్ వంటి భద్రతా ప్రమాణాలు ఇందులో పాటిస్తున్నారు.

ఎందుకు ఈ ఆఫర్?
వాహన రంగ నిపుణుల ప్రకారం.. సిట్రోయెన్ C5 ఎయిర్‌క్రాస్ మోడల్ అమ్మకాలు గత కొన్ని నెలలుగా తగ్గాయి. స్టాక్‌ను క్లియర్ చేయడానికి, బ్రాండ్‌ను ప్రజల్లోకి తీసుకెళ్లడానికి డీలర్ షిప్ ఈ రకమైన క్రియేటివ్ ఆఫర్‌ను ఎంచుకుంది. 37 లక్షల కారుపై 8 నుంచి 10 లక్షల డిస్కౌంట్ ఇచ్చే బదులు, ఏకంగా ఒక కారునే ఫ్రీగా ఇవ్వడం వల్ల కస్టమర్లు ఎక్కువగా ఆకర్షితులవుతారని డీలర్ భావిస్తున్నారు.

ఒకే ఇంట్లో రెండు కార్లు కావాలనుకునే వారికి ఇది నిజంగా అద్భుతమైన అవకాశం. అయితే డీలర్ షిప్ దగ్గర ఏ వేరియంట్ ఫ్రీగా ఇస్తున్నారు? రిజిస్ట్రేషన్ ఛార్జీలు ఎలా ఉంటాయి? వంటి పూర్తి వివరాలు షోరూమ్‌లో తెలుసుకోవడం మంచిది.