Diesel Cars : డీజిల్ కార్లకు కౌంట్‌డౌన్ మొదలైందా?.. BS7తో SUV మార్కెట్‌లో భారీ కలకలం!

Diesel Cars : భారత ఆటోమొబైల్ మార్కెట్‌లో డీజిల్ కార్ల(Diesel Cars) హవా పూర్తిగా తగ్గిపోయిందనుకుంటున్న సమయంలో మరోసారి ఈ సెగ్మెంట్ చర్చనీయాంశంగా మారింది. ముఖ్యంగా స్కార్పియో, థార్(Thar), ఫార్చ్యూనర్ వంటి SUVలను ఇష్టపడే వారి మధ్య ఇప్పుడు ఒకే చర్చ నడుస్తోంది.. BS7 నిబంధనలు వస్తే డీజిల్ కార్ల(Diesel Cars) భవిష్యత్తు ఏమవుతుంది? అనే ప్రశ్న. ఒకవైపు ఎలక్ట్రిక్ కార్లు(Electric Cars) వేగంగా పెరుగుతున్నా.. మరోవైపు లాంగ్ డ్రైవ్స్, హైవే ప్రయాణాలు చేసే వారు ఇప్పటికీ డీజిల్‌కే పెద్దపీట వేస్తున్నారు.

డీజిల్ కార్లు అంతమవుతున్నాయా?
కొన్ని సంవత్సరాల క్రితం వరకు భారతదేశంలో డీజిల్ కార్లకు భారీ డిమాండ్ ఉండేది. ముఖ్యంగా ఎక్కువ మైలేజీ, తక్కువ రన్నింగ్ ఖర్చు కారణంగా మధ్యతరగతి కుటుంబాలు డీజిల్ కార్ల(Diesel Cars)నే ఎక్కువగా కొనుగోలు చేసేవి. కానీ కాలుష్య నియంత్రణ నిబంధనలు కఠినతరం కావడంతో పరిస్థితి పూర్తిగా మారిపోయింది.

BS6 నిబంధనలు వచ్చిన తర్వాత చాలా కంపెనీలు చిన్న డీజిల్ కార్లను మార్కెట్ నుంచి తీసేశాయి. ఇప్పుడు BS7 ఎమిషన్ నార్మ్స్ అమల్లోకి వస్తే పరిస్థితి మరింత కఠినంగా మారే అవకాశం ఉందని ఆటో రంగ నిపుణులు చెబుతున్నారు.

BS7 ఎఫెక్ట్.. ధరలు భారీగా పెరగొచ్చు!
ప్రస్తుతం మార్కెట్లో వినిపిస్తున్న అంచనాల ప్రకారం.. BS7 నిబంధనల కారణంగా డీజిల్ వాహనాల తయారీ ఖర్చులు భారీగా పెరిగే అవకాశం ఉంది. ఒక్కో వాహనంపై రూ.30 వేల నుంచి లక్ష రూపాయల వరకు అదనపు భారం పడొచ్చని ఇండస్ట్రీ వర్గాలు చెబుతున్నాయి. ఇప్పటికే SUV సెగ్మెంట్‌లో కార్ల ధరలు భారీగా పెరిగిపోయాయి. ఇప్పుడు BS7 కారణంగా మరోసారి ధరలు పెరిగితే సామాన్యుడికి డీజిల్ SUV కొనడం మరింత కష్టంగా మారే పరిస్థితి కనిపిస్తోంది.

అయినా డీజిల్‌కే ఎందుకింత క్రేజ్?
డీజిల్ కార్లకు డిమాండ్ తగ్గిపోయిందని అనుకునే సమయంలో కూడా SUV మార్కెట్‌లో డీజిల్ వాటా ఇంకా దాదాపు 18 శాతంగా ఉండటం గమనార్హం. ముఖ్యంగా గ్రామీణ ప్రాంతాలు, హైవే డ్రైవర్స్, లాంగ్ ట్రిప్స్ చేసే వారు ఇప్పటికీ డీజిల్ ఇంజిన్‌కే ప్రాధాన్యం ఇస్తున్నారు. దీనికి ప్రధాన కారణం టార్క్. డీజిల్ ఇంజిన్ తక్కువ RPMలలోనే ఎక్కువ పవర్ ఇస్తుంది. అందుకే బరువైన SUVలు, ఆఫ్‌రోడ్ వాహనాలకు డీజిల్ ఇంజిన్లు ఇంకా బెస్ట్ ఆప్షన్‌గా భావిస్తున్నారు.

టెన్షన్‌లో స్కార్పియో, థార్, ఫార్చ్యూనర్ ఫ్యాన్స్
భారత మార్కెట్లో మహీంద్రా స్కార్పియో(Mahindra Scorpio), థార్, బొలెరో, టయోటా ఫార్చ్యూనర్ వంటి SUVలకు భారీ ఫ్యాన్ బేస్ ఉంది. ముఖ్యంగా గ్రామీణ ప్రాంతాల్లో, రాజకీయ నాయకులు, వ్యాపారులు, రైతులు ఎక్కువగా ఈ వాహనాలనే ఇష్టపడుతున్నారు.

అయితే BS7 అమల్లోకి వచ్చిన తర్వాత ఈ వాహనాల ధరలు మరింత పెరిగే అవకాశం ఉందనే వార్తలు ఇప్పుడు కొనుగోలుదారులను టెన్షన్ పెడుతున్నాయి. ఇప్పటికే 20 లక్షల లోపు ఉన్న కొన్ని SUVలు మరింత ఖరీదైనవిగా మారే అవకాశముంది.

EVలు వస్తున్నా.. డీజిల్‌ను మర్చిపోలేకపోతున్న జనాలు
ఎలక్ట్రిక్ కార్లు మార్కెట్లోకి పెద్ద ఎత్తున వస్తున్నా.. ఇంకా చాలా మంది SUV కొనుగోలుదారులు డీజిల్‌కే ఓటు వేస్తున్నారు. ముఖ్యంగా ఒకసారి ట్యాంక్ ఫుల్ చేస్తే వందల కిలోమీటర్లు ప్రయాణించగలగడం, హైవేలో స్థిరమైన పనితీరు, ఎక్కువ లోడ్‌తో సులభంగా ప్రయాణించడం వంటి అంశాలు డీజిల్‌కు ప్లస్ అవుతున్నాయి. పెట్రోల్ ఇంజిన్‌లతో పోలిస్తే డీజిల్ ఇంజిన్‌లు ఎక్కువకాలం మన్నికగా ఉంటాయని చాలామంది నమ్మకం కూడా ఈ డిమాండ్‌కు కారణమవుతోంది.

చిన్న డీజిల్ కార్లు పూర్తిగా మాయం అవుతాయా?
BS7 నిబంధనలు అమల్లోకి వచ్చిన తర్వాత చిన్న డీజిల్ కార్ల(Diesel Cars) తయారీ కంపెనీలకు లాభదాయకంగా ఉండకపోవచ్చని విశ్లేషకులు చెబుతున్నారు. అందుకే భవిష్యత్తులో డీజిల్ టెక్నాలజీ ప్రధానంగా పెద్ద SUVలు, లగ్జరీ వాహనాలకే పరిమితం అయ్యే అవకాశముందని భావిస్తున్నారు. అంటే సామాన్యుడి బడ్జెట్‌లో ఉండే చిన్న డీజిల్ కార్లు మార్కెట్ నుంచి పూర్తిగా కనుమరుగయ్యే పరిస్థితి రావొచ్చని ఆటో రంగం అంచనా వేస్తోంది.

ఇప్పుడు డీజిల్ SUV కొనాలా వద్దా?
రోజూ ఎక్కువ దూరం ప్రయాణించే వారు, గ్రామీణ ప్రాంతాల్లో ఉండేవారు, తరచూ హైవే ట్రిప్స్ చేసే వారికి ఇప్పటికీ డీజిల్ SUV మంచి ఎంపికగానే నిపుణులు చెబుతున్నారు. కానీ నగరాల్లో తక్కువ వినియోగం ఉన్నవారు మాత్రం పెట్రోల్, హైబ్రిడ్ లేదా EV ఆప్షన్లను కూడా పరిశీలించాలని సూచిస్తున్నారు.

మొత్తానికి BS7 నిబంధనలు భారత ఆటోమొబైల్ మార్కెట్‌ను మరోసారి పెద్ద మార్పు దిశగా తీసుకెళ్లే అవకాశం కనిపిస్తోంది. డీజిల్ SUVల హవా కొనసాగుతుందా? లేక EVలు పూర్తిగా ఆధిపత్యం చెలాయిస్తాయా? అన్నది వచ్చే రెండేళ్లలో క్లియర్ కానుంది.