క్లచ్ నొక్కిన పనిలేదు.. గేర్లు మార్చక్కర్లేదు.. ట్రాఫిక్‎లో ఇక టెన్షన్ వద్దు.. బెస్ట్ ఆటోమేటిక్ కార్లు ఇవే

భారతదేశంలో కార్ల మార్కెట్ ముఖచిత్రం వేగంగా మారిపోతోంది. ఒకప్పుడు ఆటోమేటిక్ కార్లు అంటే కేవలం ధనవంతులకు మాత్రమే పరిమితం అనే భావన ఉండేది. కానీ, నేడు ట్రాఫిక్ కష్టాలు పెరగడంతో మధ్యతరగతి ప్రజలు కూడా క్లచ్ తలనొప్పి లేని ఆటోమేటిక్ కార్ల వైపు మొగ్గు చూపుతున్నారు. ముఖ్యంగా ఎస్‌యూవీ (SUV) మోజు పెరగడంతో, తక్కువ ధరలో లభించే ఆటోమేటిక్ ఎస్‌యూవీలకు డిమాండ్ విపరీతంగా పెరిగింది. మరి ప్రస్తుతం ఇండియాలో అత్యంత తక్కువ ధరకు లభిస్తున్న టాప్-5 ఆటోమేటిక్ ఎస్‌యూవీలేంటో, వాటి ప్రత్యేకతలేంటో వివరంగా తెలుసుకుందాం.

1. నిస్సాన్ మాగ్నైట్ (Nissan Magnite)
భారత మార్కెట్లో ప్రస్తుతం అత్యంత చౌకైన ఆటోమేటిక్ ఎస్‌యూవీ ఏదైనా ఉందంటే అది నిస్సాన్ మాగ్నైట్ మాత్రమే. దీని ప్రారంభ ధర కేవలం రూ.6.21 లక్షలు (ఎక్స్-షోరూమ్) మాత్రమే. మాగ్నైట్ లోని EZ-SHIFT VISIA వేరియంట్ ఈ ధరకు లభిస్తుంది. ఇందులో 1.0-లీటర్ పెట్రోల్ ఇంజిన్ ఉంటుంది. ఇది 71bhp పవర్, 96Nm టార్క్‌ను ఉత్పత్తి చేస్తుంది. దీనికి 5-స్పీడ్ AMT గేర్ బాక్స్‌ను జత చేశారు. తక్కువ బడ్జెట్ లో మంచి లుక్, కంఫర్ట్ కోరుకునే వారికి ఇది బెస్ట్ ఆప్షన్. ఒకవేళ మీకు మరింత పవర్ కావాలనుకుంటే ఇందులో టర్బో పెట్రోల్ ఇంజిన్‌తో కూడిన CVT ఆప్షన్ కూడా ఉంది, కానీ దాని ధర రూ. 9.25 లక్షల నుండి ప్రారంభమవుతుంది.

2. హ్యుందాయ్ ఎక్స్టర్ (Hyundai Exter)
హ్యుందాయ్ నుంచి వచ్చిన మైక్రో ఎస్‌యూవీ ఎక్స్టర్ తక్కువ కాలంలోనే మంచి గుర్తింపు తెచ్చుకుంది. ఇందులో ఆటోమేటిక్ ఆప్షన్ రూ.6.91 లక్షల (ఎక్స్-షోరూమ్) వద్ద ప్రారంభమవుతుంది. దీని HX3 AMT వేరియంట్ అత్యంత చౌకైనది. ఎక్స్టర్ లో 1.2-లీటర్ పెట్రోల్ ఇంజిన్ ఉంటుంది. ఇది 81.9bhp పవర్, 113.8Nm టార్క్‌ను ఇస్తుంది. దీనికి 5-స్పీడ్ స్మార్ట్ ఆటో AMT గేర్ బాక్స్ ఉంది. హ్యుందాయ్ బ్రాండ్ వాల్యూ, సన్‌రూఫ్ వంటి లేటెస్ట్ ఫీచర్లు, 6 ఎయిర్‌బ్యాగ్స్ వంటి సేఫ్టీ ఫీచర్లు ఈ కారుకు అదనపు బలాన్ని ఇస్తున్నాయి.

3. రెనాల్ట్ కైగర్ (Renault Kiger)
నిస్సాన్ మాగ్నైట్ ప్లాట్‌ఫారమ్‌పైనే తయారైన రెనాల్ట్ కైగర్ కూడా ఆటోమేటిక్ విభాగంలో గట్టి పోటీనిస్తోంది. దీని Evolution AMT వేరియంట్ ధర రూ.6.95 లక్షల (ఎక్స్-షోరూమ్) నుంచి మొదలవుతుంది. మాగ్నైట్ తరహాలోనే ఇందులో కూడా 1.0-లీటర్ నేచురల్లీ ఆస్పిరేటెడ్ ఇంజిన్ ఉంటుంది. ఇది 71bhp, 96Nm టార్క్‌ను అందిస్తుంది. దీనికి 5-స్పీడ్ AMT గేర్ బాక్స్‌ను అమర్చారు. కైగర్ చూడటానికి చాలా స్పోర్టీగా ఉంటుంది. దీని బూట్ స్పేస్ (డిక్కీ) కూడా చాలా పెద్దదిగా ఉండటం వల్ల ఫ్యామిలీతో ప్రయాణించే వారికి ఇది ఎంతో అనుకూలంగా ఉంటుంది.

4. టాటా పంచ్ (Tata Punch)
ఇండియాలో అత్యధికంగా అమ్ముడవుతున్న మైక్రో ఎస్‌యూవీలలో టాటా పంచ్ మొదటి వరుసలో ఉంటుంది. దీని Pure+ Automatic వేరియంట్ ధర రూ. 7.55 లక్షల (ఎక్స్-షోరూమ్) వద్ద ప్రారంభమవుతుంది. ఇందులో 1.2-లీటర్ పెట్రోల్ ఇంజిన్ ఉంటుంది. ఇది 86.6bhp పవర్, 115Nm టార్క్‌ను ఉత్పత్తి చేస్తుంది. 5-స్పీడ్ AMT గేర్ బాక్స్‌తో ఇది లభిస్తుంది. టాటా పంచ్ అనగానే గుర్తొచ్చేది దాని 5-స్టార్ సేఫ్టీ రేటింగ్. గరుకు రోడ్లపై కూడా దూసుకుపోయే దీని గ్రౌండ్ క్లియరెన్స్, పటిష్టమైన బాడీ స్ట్రక్చర్ దీనికి భారీ క్రేజ్ తెచ్చిపెట్టాయి.

5. మారుతి సుజుకి ఫ్రాంక్స్ (Maruti Suzuki Fronx)
మారుతి సుజుకి నెక్సా షోరూమ్‌ల ద్వారా లభించే ఫ్రాంక్స్ ఒక ప్రీమియం సబ్-4 మీటర్ ఎస్‌యూవీ. దీని ఆటోమేటిక్ వెర్షన్ Delta AGS వేరియంట్ ధర రూ. 8.15 లక్షల (ఎక్స్-షోరూమ్) వద్ద మొదలవుతుంది. ఇందులో 1.2-లీటర్ కె-సిరీస్ పెట్రోల్ ఇంజిన్ ఉంటుంది. ఇది 88.5bhp పవర్, 113Nm టార్క్‌ను ఇస్తుంది. దీనికి 5-స్పీడ్ ఆటో గేర్ షిఫ్ట్ (AGS) టెక్నాలజీ ఉంది. మారుతి కార్లు అంటేనే మైలేజీకి పెట్టింది పేరు. ఫ్రాంక్స్ మంచి మైలేజీతో పాటు ప్రీమియం ఇంటీరియర్స్, బ్రహ్మాండమైన రీసేల్ వాల్యూను అందిస్తుంది.

ట్రాఫిక్ ఎక్కువగా ఉండే నగరాల్లో ఆటోమేటిక్ కార్లు ఒక వరమనే చెప్పాలి. పైన పేర్కొన్న ఐదు కార్లు వాటి ధరలో బెస్ట్ పర్ఫార్మెన్స్ అందిస్తున్నాయి. మీకు సేఫ్టీ ముఖ్యం అనుకుంటే టాటా పంచ్, మైలేజీ, తక్కువ మెయింటెనెన్స్ కావాలనుకుంటే మారుతి ఫ్రాంక్స్, ధర ఇంకా తక్కువగా ఉండాలంటే నిస్సాన్ మాగ్నైట్ ను ఎంచుకోవచ్చు. మరిన్ని ఫీచర్లు కావాలనుకుంటే హ్యుందాయ్ ఎక్స్టర్ సరైన ఛాయిస్ అవుతుంది.