మన దేశం.. మన కార్లు.. మే నెలలో ఏకంగా 58 వేల కార్లను విక్రయించిన మహీంద్రా.. SUV సేల్స్‎లో ఇదే తోపు

భారత ఆటోమొబైల్ మార్కెట్ గతిని మార్చేస్తూ దేశీయ దిగ్గజ కార్ల తయారీ సంస్థ మహీంద్రా అండ్ మహీంద్రా (M&M) సరికొత్త చరిత్ర సృష్టించింది. ఈ ఏడాది మే 2026 నెల మహీంద్రా కంపెనీకి లాభాల పంట పండించింది. దేశీయ మార్కెట్‌లో మహీంద్రా ఎస్‌యూవీ (SUV) మోడళ్లకు విపరీతమైన క్రేజ్ పెరగడంతో కార్ల అమ్మకాలు భారీగా పుంజుకున్నాయి.

కేవలం మే నెలలోనే ఏకంగా 58 వేలకు పైగా మహీంద్రా ఎస్‌యూవీలు భారతీయ ఇళ్లలోకి చేరి సరికొత్త రికార్డును నమోదు చేశాయి. ఎగుమతులను కూడా కలుపుకుంటే ఈ సంఖ్య మరింతగా పెరిగింది. మహీంద్రా కార్ల విక్రయాలు ఈ రేంజ్‌లో దూసుకుపోవడానికి గల కారణాలు, ఏ విభాగంలో ఎంత శాతం వృద్ధి నమోదైందనే వివరాలు చూద్దాం.

మొత్తం అమ్మకాల్లో 20 శాతం వార్షిక వృద్ధి
మహీంద్రా కంపెనీ గడిచిన మే నెలలో దేశీయ అమ్మకాలతో పాటు విదేశీ ఎగుమతులను (Exports) కలుపుకుని మొత్తం 99,636 వాహనాలను విక్రయించినట్లు అధికారికంగా వెల్లడించింది. గత ఏడాది మే నెలతో పోల్చి చూస్తే కంపెనీ మొత్తం అమ్మకాలలో ఏకంగా 20 శాతం వార్షిక వృద్ధి (Year-on-Year Growth) నమోదైంది. ఎప్పటిలాగే మహీంద్రా బలాన్ని పెంచడంలో వాటి యుటిలిటీ వెహికల్స్ (UV) అంటే ఎస్‌యూవీ కార్ల విభాగమే కీలక పాత్ర పోషించడం విశేషం.

ఎస్‌యూవీ మార్కెట్‌పై మహీంద్రా గుత్తాధిపత్యం
ప్రస్తుతం మహీంద్రా ప్యాసింజర్ వెహికల్ సెగ్మెంట్ పూర్తిగా ఎస్‌యూవీ కార్ల అమ్మకాలపైనే ఆధారపడి నడుస్తోంది. కంపెనీ గత నెలలో కేవలం ఇండియాలోనే 58,021 ఎస్‌యూవీలను విక్రయించింది. ఇక విదేశీ ఎగుమతులను కూడా ఇందులో యాడ్ చేస్తే మొత్తం ఎస్‌యూవీల విక్రయాల సంఖ్య 59,573 యూనిట్లకు చేరింది. గత ఏడాది అంటే మే 2025 లో మహీంద్రా భారత్‌లో 52,431 ఎస్‌యూవీలను మాత్రమే అమ్మగలిగింది. దీనిబట్టి చూస్తే కేవలం ఎస్‌యూవీ కార్ల విభాగంలోనే కంపెనీ 11 శాతం వృద్ధిని సాధించింది.

కొత్త ఆర్థిక సంవత్సరంలో సరికొత్త జోరు
కొత్త ఆర్థిక సంవత్సరం (FY27) ప్రారంభమైన మొదటి రెండు నెలల్లోనే మహీంద్రా తన సేల్స్ స్పీడ్‌ను మరింత పెంచింది. ఈ ఏడాది ఏప్రిల్, మే 2026 రెండు నెలల అమ్మకాలను పరిశీలిస్తే.. కంపెనీ దేశీయంగా మొత్తం 1,14,352 ప్యాసింజర్ వెహికల్స్ (కార్లు) విక్రయించి మార్కెట్లో తన తిరుగులేని స్థానాన్ని మరోసారి నిరూపించుకుంది.

త్రీ-వీలర్ విభాగంలో 89 శాతం బంపర్ గ్రోత్
కార్లతో పాటు మహీంద్రా కమర్షియల్ వెహికల్స్ (CV), త్రీ-వీలర్ బిజినెస్ కూడా ఈ నెలలో ఊహించని రేంజ్‌లో దూసుకుపోయాయి. ముఖ్యంగా ఎలక్ట్రిక్ వేరియంట్లతో కలిపి మహీంద్రా ఈసారి మొత్తం 12,536 త్రీ-వీలర్లను విక్రయించింది. గత ఏడాది మే నెలలో కేవలం 6,635 త్రీ-వీలర్లు మాత్రమే అమ్ముడయ్యాయి.

అంటే త్రీ-వీలర్ విభాగంలో కంపెనీ ఏకంగా 89 శాతం భారీ వార్షిక వృద్ధిని సొంతం చేసుకుని అందరినీ ఆశ్చర్యపరిచింది. అదేవిధంగా లైట్ కమర్షియల్ వెహికల్స్ (2 టన్నుల లోపు) విభాగం 35 శాతం వృద్ధితో 3,490 యూనిట్లు, 2 నుండి 3.5 టన్నుల విభాగం 16 శాతం వృద్ధితో 20,589 యూనిట్ల అమ్మకాలను నమోదు చేశాయి.

విదేశీ మార్కెట్లలోనూ మహీంద్రా క్రేజ్
ఇండియాలోనే కాకుండా ప్రపంచ దేశాల్లోనూ మహీంద్రా బ్రాండ్ ఇమేజ్ వేగంగా విస్తరిస్తోంది. మే 2026 లో కంపెనీ మొత్తం విదేశీ ఎగుమతులు 37 శాతం పెరిగి 5,000 యూనిట్లకు చేరుకున్నాయి. గత ఏడాది ఇదే నెలలో రికార్డైన 3,646 యూనిట్ల కంటే ఇది చాలా ఎక్కువ. ఇక ప్రస్తుత ఆర్థిక సంవత్సరం మొదటి రెండు నెలల్లో (ఏప్రిల్-మే 2026) మహీంద్రా మొత్తం 9,970 వాహనాలను విదేశాలకు ఎగుమతి చేసి గ్లోబల్ లెవెల్లో తన పట్టును పెంచుకుంటోంది.

సప్లై చైన్ సమస్యలున్నా సరే సక్సెస్
మహీంద్రా అండ్ మహీంద్రా ఆటోమోటివ్ డివిజన్ సీఈఓ నళినికాంత్ గొలగుంట కంపెనీ సాధించిన ఈ భారీ విజయంపై స్పందించారు. తమ కార్ల లైనప్‌కు మార్కెట్లో కస్టమర్ల నుంచి అద్భుతమైన డిమాండ్ వస్తోందని ఆయన ఆనందం వ్యక్తం చేశారు.

అయితే కొంతమంది సప్లయర్ల దగ్గర మ్యాన్‌పవర్ కొరత ఉండటం వల్ల సప్లై చైన్ పరంగా కొన్ని చిన్న చిన్న సవాళ్లు ఎదురవుతున్నాయని ఆయన అంగీకరించారు. అయినప్పటికీ వాటన్నింటినీ అధిగమించి ప్రతి నెల 58,000 కి పైగా ఎస్‌యూవీలను డెలివరీ చేస్తూ సరికొత్త రికార్డులు క్రియేట్ చేస్తున్నామని వివరించారు.