ఎలక్ట్రిక్ హడావుడి అయిపోయింది.. మళ్లీ త్వరలో 3 కొత్త పెట్రోల్, డీజిల్ కార్ల మీద ఫోకస్ పెట్టిన మహీంద్రా

భారతీయ ఆటోమొబైల్ దిగ్గజం మహీంద్రా అండ్ మహీంద్రా గత కొంతకాలంగా దేశీయ మార్కెట్లో తన ఎలక్ట్రిక్ వాహనాలతో విపరీతమైన హైప్ క్రియేట్ చేస్తూ వార్తల్లో నిలిచింది. అయితే కేవలం ఈవీలకే పరిమితం కాకుండా మహీంద్రా మళ్లీ తన అసలైన సాంప్రదాయ శైలిలోకి వచ్చేస్తోంది. రాబోయే 9 నెలల కాలంలో మార్కెట్లోకి సరికొత్త పెట్రోల్, డీజిల్ (ICE) ఇంజన్లతో కూడిన మూడు సరికొత్త ఎస్‌యూవీ కార్లను లాంచ్ చేయడానికి కంపెనీ లైన్ క్లియర్ చేసింది. ఇందులో ఇప్పటికే మార్కెట్లో సెన్సేషన్ సృష్టించిన పాపులర్ మోడల్స్ స్కార్పియో-ఎన్, థార్ సరికొత్త ఫేస్‌లిఫ్ట్ వెర్షన్లతో పాటు, ఒక సరికొత్త కాంపాక్ట్ కార్ కూడా లైన్అప్‌లో చేరబోతోంది. ఆ మూడు మోడళ్ల ప్రత్యేకతలు ఏంటో తెలుసుకుందాం.

1. న్యూ మహీంద్రా స్కార్పియో-ఎన్ ఫేస్‌లిఫ్ట్ (New Mahindra Scorpio-N Facelift)
మహీంద్రా సంస్థ తన మోస్ట్ సక్సెస్‌ఫుల్ మోడల్ అయిన స్కార్పియో-ఎన్‎ను ఈ ఏడాది మూడో త్రైమాసికంలో సరికొత్త మేకోవర్‌తో మార్కెట్లోకి తీసుకురాబోతోంది. జూన్ 2022లో ఈ కారు లాంచ్ అయిన తర్వాత, దీనికి ఇస్తున్న మొదటి మేజర్ అప్‌డేట్ ఇదే కావడం గమనార్హం. ఇటీవల లీకైన సమాచారం ప్రకారం, ఈ సరికొత్త ఫేస్‌లిఫ్ట్ వెర్షన్ బంపర్, హెడ్‌లైట్లు, టెయిల్‌లైట్ల డిజైన్లలో కంపెనీ భారీ మార్పులు చేసింది.

దీనికి సరికొత్త రేడియేటర్ గ్రిల్‌తో పాటు మెరిసే 18-ఇంచుల అలాయ్ వీల్స్‌ను జతచేశారు. కారు లోపలి భాగంలో డ్యాష్‌బోర్డ్‌ను మరింత మోడరన్‌గా మారుస్తూ.. 10.25-ఇంచుల పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, డిజిటల్ కీ వంటి అడ్వాన్స్‌డ్ ఫీచర్లను అందించనున్నారు. అయితే దీని ఇంజన్ పర్ఫార్మెన్స్‌లో మాత్రం ఎలాంటి మార్పులు చేయడం లేదు.

2. మహీంద్రా థార్ ఫేస్‌లిఫ్ట్ (Mahindra Thar Facelift)
స్కార్పియో-ఎన్ అప్‌డేట్ వెర్షన్ మార్కెట్లోకి వచ్చిన వెంటనే, మహీంద్రా తన ఐకానిక్ ఆఫ్-రోడ్ ఎస్‌యూవీ థార్ సరికొత్త అవతారాన్ని లాంచ్ చేయనుంది. టెస్టింగ్ సమయంలో దొరికిన ఫోటోల ఆధారంగా, ఈ కొత్త థార్ లుక్ ఇటీవల మార్కెట్లోకి వచ్చిన థార్ రాక్స్ (Thar ROXX) తరహాలోనే ఉండేలా డిజైన్ చేశారు.

ఇందులో సి-షేప్ (C-Shape) డే-టైమ్ రన్నింగ్ లైట్లు (DRLs), సరికొత్త ఎల్‌ఈడీ హెడ్‌లైట్లు, పెద్దవైన 19-ఇంచుల అలాయ్ వీల్స్ ప్రత్యేక ఆకర్షణగా నిలవనున్నాయి. కారు లోపల మరింత లగ్జరీ ఫీలింగ్ ఇచ్చేలా వెంటిలేటెడ్ సీట్లు, ఆటో-డిమ్మింగ్ ఐఆర్వీఎమ్ (IRVM) అద్దాలు, కీలెస్ ఎంట్రీ (కీ లేకుండా కార్లోకి ప్రవేశించే టెక్నాలజీ) వంటి ప్రీమియం ఫీచర్లను జోడిస్తున్నారు.

3. మహీంద్రా విజన్.ఎస్ ప్రొడక్షన్ మోడల్ (Mahindra Vision.S Production Model)
రాబోయే 2027 సంవత్సరం ప్రారంభంలో మహీంద్రా కంపెనీ ఒక సరికొత్త కాంపాక్ట్ ఎస్‌యూవీ కారును ఇండియన్ మార్కెట్లోకి తీసుకురావడానికి ప్లాన్ చేస్తోంది. ఇది కంపెనీ ప్రదర్శించిన విజన్.ఎస్ (Vision.S) కాన్సెప్ట్ ఆధారంగా రూపొందుతోంది.

ప్రస్తుతం మహీంద్రా లైనప్‌లో ఉన్న XUV 3XO, థార్ కార్ల మధ్య ఉన్న సైజ్ గ్యాప్‌ను భర్తీ చేయడానికి ఈ కారును డిజైన్ చేశారు. దీని లుక్ చాలా మస్కులర్‌గా, బాక్స్ షేప్‌లో ఉంటూ ప్రాపర్ ఎస్‌యూవీ ఫీలింగ్ ఇస్తుంది. ఇందులో మంచి గ్రౌండ్ క్లియరెన్స్‌తో పాటు క్యాబిన్‌ను నిటారుగా, మోడరన్‌గా రూపొందించారు. ఈ సరికొత్త కారులో కస్టమర్ల కోసం 1.2-లీటర్ పెట్రోల్, 1.5-లీటర్ డీజిల్ ఇంజన్ ఆప్షన్లను మహీంద్రా ఆఫర్ చేయబోతోంది.