ఇప్పుడు ప్రతి ఇల్లు ఈ కంపెనీ కారే కావాలంటోంది... 30 రోజుల్లో ఏకంగా 60 వేల కార్లు కొనేశారు

దేశీయ దిగ్గజ కార్ల తయారీ సంస్థ టాటా మోటార్స్ (Tata Motors) ఆటోమొబైల్ మార్కెట్లో సరికొత్త రికార్డులతో దూసుకుపోతుంది. తాజాగా ముగిసిన మే 2026 నెల టాటా కంపెనీకి ఒక మైలురాయిగా నిలిచిపోయింది. పెట్రోల్, డీజిల్ (ICE) కార్లతో పాటు ఎలక్ట్రికల్ వాహనాలకు (EV) మార్కెట్లో విపరీతమైన డిమాండ్ పెరగడంతో.. టాటా మోటార్స్ గత నెలలో ఏకంగా 59,790 ప్యాసింజర్ వాహనాలను విక్రయించి రికార్డ్ క్రియేట్ చేసింది. గతేడాదితో పోలిస్తే ఈసారి అమ్మకాల్లో భారీ వృద్ధి నమోదైంది. టాటా కార్ల అమ్మకాల పూర్తి వివరాలు, ఈవీ మార్కెట్లో సృష్టించిన సంచలనాల గురించి తెలుసుకుందాం.

టాటా సేల్స్‌లో 42 శాతం బంపర్ గ్రోత్
మే 2026 లో టాటా మోటార్స్ సాధించిన ఈ విజయం ఆటోమొబైల్ రంగాన్ని ఆశ్చర్యపరిచింది. వార్షిక ప్రాతిపదికన కంపెనీ కార్ల అమ్మకాల్లో ఏకంగా 42.22 శాతం భారీ వృద్ధి నమోదైంది. గతేడాది ఇదే నెలలో అంటే మే 2025 లో టాటా కంపెనీ మొత్తం 42,040 యూనిట్ల కార్లను మాత్రమే విక్రయించింది. కేవలం ఏడాది కాలంలోనే అదనంగా దాదాపు 17 వేలకు పైగా కార్లను అమ్మి టాటా తన బ్రాండ్ పవర్‌ను నిరూపించుకుంది.

సొంతగడ్డపై టాటా ఏకఛత్రాధిపత్యం
భారతీయ దేశీయ మార్కెట్ (Domestic Market) విషయానికి వస్తే టాటా మోటార్స్ హవా స్పష్టంగా కనిపిస్తోంది. దేశీయంగా కంపెనీ ఒంటరిగానే 59,090 ప్యాసింజర్ వాహనాలను విక్రయించింది. గతేడాది మే 2025 లో ఈ సంఖ్య 41,557 యూనిట్లుగా ఉండేది. అంటే దేశీయ అమ్మకాల్లోనే 42.19 శాతం గ్రోత్ కనిపించింది. అంతకుముందు నెల అయిన ఏప్రిల్ 2026 లో ఈ అమ్మకాలు 59,000 యూనిట్లుగా ఉన్నాయి. సాధారణంగా ఏప్రిల్‌తో పోలిస్తే మే నెలలో అమ్మకాలు పెరగడం కష్టమని భావిస్తారు, కానీ టాటా మోటార్స్ ఆ అంచనాలను తలకిందులు చేస్తూ నెలవారీగా కూడా వృద్ధిని సాధించింది.

ఎలక్ట్రిక్ కార్ల మార్కెట్లో సరికొత్త ఆల్-టైమ్ రికార్డ్
టాటా మోటార్స్ సాధించిన ఈ భారీ విజయానికి ప్రధాన కారణం ఆ కంపెనీకి ఉన్న బలమైన ఎలక్ట్రిక్ వాహనాల (EV) పోర్ట్‌ఫోలియో అని చెప్పాలి. మే 2026లో టాటా కంపెనీ దేశీయ, ఎగుమతులు కలిపి మొత్తం 10,517 ఎలక్ట్రిక్ కార్లను విక్రయించింది. గతేడాది మే 2025లో ఈ ఈవీ అమ్మకాల సంఖ్య కేవలం 5,685 యూనిట్లు మాత్రమే. అంటే ఎలక్ట్రిక్ కార్ల అమ్మకాల్లో ఏకంగా 85 శాతం అద్భుతమైన వృద్ధి నమోదైంది. టాటా మోటార్స్ చరిత్రలోనే ఒకే నెలలో ఈ స్థాయిలో ఈవీ కార్లు అమ్ముడవడం ఇదే తొలిసారి.

రిటైల్ రిజిస్ట్రేషన్‌లో దేశంలోనే నంబర్ 2
టాటా కంపెనీకి చెందిన ఎస్‌యూవీ (SUV) మోడల్స్ అయిన పంచ్, నెక్సాన్, హారియర్, టియాగో మరియు కర్వ్ వంటి కార్లకు మార్కెట్లో పిచ్చ క్రేజ్ ఉంది. కంపెనీ హోల్‌సేల్ అమ్మకాలు 42 శాతం పెరగ్గా, ప్రభుత్వ వాహన్ (VAHAN) పోర్టల్ డేటా ప్రకారం రిటైల్ రిజిస్ట్రేషన్లలో ఏకంగా 50 శాతం కంటే ఎక్కువ తండ్రి దూకుడు కనిపించింది. ఈ రిటైల్ రిజిస్ట్రేషన్ల పరంగా చూస్తే, టాటా మోటార్స్ మన దేశంలోనే రెండవ అతిపెద్ద ప్యాసింజర్ వాహనాల తయారీ సంస్థగా అవతరించింది.

విదేశీ మార్కెట్లలోనూ టాటా జెండా
సొంత దేశంలోనే కాకుండా విదేశీ మార్కెట్లలో కూడా టాటా మోటార్స్ కార్లు తమ ముద్రను గట్టిగా వేస్తున్నాయి. మే 2026 లో కంపెనీ మొత్తం ప్యాసింజర్ వాహనాల ఎగుమతులు 44.93 శాతం వృద్ధితో 700 యూనిట్లకు చేరుకున్నాయి. గతేడాది ఇదే మే నెలలో కేవలం 483 కార్లను మాత్రమే విదేశాలకు పంపించారు. ప్రస్తుతానికి టాటా మొత్తం అమ్మకాల్లో ఎగుమతుల వాటా చిన్నదే అయినప్పటికీ, భవిష్యత్తులో గ్లోబల్ మార్కెట్‌ను ఏలడానికి కంపెనీ వేగంగా అడుగులు వేస్తోందని ఈ గణాంకాలు చెబుతున్నాయి.