కారు కొనే ప్లాన్ ఉందా? అయితే ఈ నెలాఖరు వరకే ఛాన్స్.. జూలై 1 నుంచి పెరగనున్న టాటా కార్ల ధరలు

సొంత కారు కొనాలని ప్లాన్ చేస్తున్న మధ్య తరగతి, ప్రీమియం కస్టమర్లకు ప్రముఖ వాహన తయారీ దిగ్గజం టాటా మోటార్స్ (Tata Motors) గట్టి జలక్ ఇచ్చింది. తన వాహన శ్రేణి అంతటా ధరలను పెంచుతున్నట్లు కంపెనీ అధికారికంగా ప్రకటించింది. వచ్చే నెల, అంటే జూలై 1, 2026 నుంచి ఈ కొత్త ధరలు అమలులోకి రానున్నాయి. వాహనాల తయారీకి అయ్యే ముడిసరుకుల ధరలు (Commodity Prices), ఇతర ఇన్పుట్ ఖర్చులు విపరీతంగా పెరగడం వల్లే ఈ భారాన్ని ఆంశికంగా కస్టమర్లపై వేయక తప్పడం లేదని కంపెనీ స్పష్టం చేసింది.

ప్యాసింజర్ కార్లతో పాటు కమర్షియల్ వాహనాలకూ షాక్
టాటా మోటార్స్ కేవలం మనం రోజూ వాడే ప్యాసింజర్ కార్ల ధరలనే కాకుండా.. వ్యాపార అవసరాలకు వాడే కమర్షియల్ వాహనాల (Commercial Vehicles) రేట్లను కూడా పెంచుతున్నట్లు తెలిపింది. కంపెనీ ఇచ్చిన సమాచారం ప్రకారం.. కమర్షియల్ వాహనాల శ్రేణిపై సుమారు 2.5 శాతం వరకు ధరల పెంపు ఉండబోతోంది.

అంతకుముందే ప్యాసింజర్ కార్ల విభాగంలో వేర్వేరు మోడల్స్, వేరియంట్లను బట్టి దాదాపు 1.5 శాతం వరకు రేట్లను పెంచుతున్నట్లు సంస్థ ప్రకటించిన సంగతి తెలిసిందే. ఈ పెరిగిన ధరలు జూలై మొదటి తేదీ నుంచి ఆటోమేటిక్‌గా అప్లై అవుతాయి.

పెట్రోల్, డీజిల్, ఈవీ మోడల్స్‌పై ప్రభావం
ఈ సరికొత్త ధరల పెంపు ప్రభావం టాటా మోటార్స్ విక్రయిస్తున్న అన్ని రకాల సాంప్రదాయ ఇంధన (ICE) బండ్లతో పాటు ఎలక్ట్రిక్ వాహనాల (EV) పైనా పడనుంది. టాటా బ్రాండ్ లో అత్యంత పాపులర్ అయిన టియాగో, టిగోర్, ఆల్ట్రోజ్, పంచ్, నెక్సాన్, కర్వ్, హారియర్, సఫారీ, సరికొత్త సియెర్రా వంటి ఐసీఈ మోడల్స్ ధరలు పెరగనున్నాయి. వీటితో పాటే మార్కెట్లో దూసుకుపోతున్న టాటా ఎలక్ట్రిక్ కార్ల పోర్ట్‌ఫోలియోలోని టియాగో ఈవీ, పంచ్ ఈవీ, కర్వ్ ఈవీ, నెక్సాన్ ఈవీ, హారియర్ ఈవీల రేట్లు కూడా మోడల్ ని బట్టి పెరగబోతున్నాయి.

ఈ ఏడాదిలోనే కార్ల ధరలు పెరగడం ఇది రెండోసారి
ఆటోమొబైల్ పరిశ్రమ ప్రస్తుతం ముడిసరుకుల రవాణా ఖర్చులు, ద్రవ్యోల్బణం (Inflation) వంటి తీవ్రమైన సవాళ్లను ఎదుర్కొంటోంది. ఈ క్రమంలో టాటా మోటార్స్ ఈ ఏడాది కార్ల ధరలను పెంచడం ఇది రెండోసారి కావడం గమనార్హం.

కంపెనీ తన లాభాలను కాపాడుకుంటూనే, వినియోగదారులకు నాణ్యమైన వాహనాలను అందించేందుకే ఈ నిర్ణయం తీసుకున్నట్లు వెల్లడించింది. ఏ మోడల్, వేరియంట్‌పై ఎంతెంత ధర పెరుగుతుందనే పూర్తి లిస్ట్‌ను కంపెనీ త్వరలోనే డీలర్‌షిప్‌ల ద్వారా అధికారికంగా విడుదల చేయనుంది.

కొత్త కార్ల లాంచ్‌ల హంగామా.. జూన్ లోనే కొంటే బెస్ట్
టాటా మోటార్స్ 2026 ప్రారంభం నుంచి భారత మార్కెట్లో వరుస పెట్టి కొత్త వాహనాలను లాంచ్ చేస్తోంది. సఫారీ పెట్రోల్, హారియర్ పెట్రోల్, పంచ్ ఫేస్‌లిఫ్ట్, టియాగో ఫేస్‌లిఫ్ట్‌లతో పాటు పలు సరికొత్త ఈవీ మోడల్స్‌ను కూడా అప్‌డేట్ చేసింది.

అంతేకాదు, జూన్ 30న కంపెనీ తన ప్రతిష్టాత్మక సియెర్రా ఈవీ (Sierra EV)ని కూడా మార్కెట్లోకి గ్రాండ్‌గా పరిచయం చేయబోతోంది. అందువల్ల ఎవరైనా టాటా కారును సొంతం చేసుకోవాలని భావిస్తే.. జూన్ నెలలో మిగిలి ఉన్న రోజుల్లోనే కారు కొనుగోలు చేయడం లేదా బుక్ చేసుకోవడం చాలా మంచిది. దీనివల్ల పెరిగే అదనపు భారం నుంచి తప్పించుకోవచ్చు.