రూ.10 లక్షల బడ్జెట్‌లో పవర్‌ఫుల్ డీజిల్ SUVs.. ఇప్పుడు ఇండియాలో వీటికే డిమాండ్ ఎక్కువ

కార్ల మార్కెట్లో ఎన్ని పెట్రోల్, ఈవీ కార్లు వచ్చినా డీజిల్ ఇంజన్ ఇచ్చే పవర్, లాంగ్ డ్రైవ్స్‎లో వచ్చే ఆ కిక్కే వేరు. ముఖ్యంగా కొండ ప్రాంతాల్లో ప్రయాణించేటప్పుడు, ఎక్కువ మంది ప్రయాణికులతో వెళ్లేటప్పుడు డీజిల్ ఇంజన్ల టార్క్ పర్ఫార్మెన్స్ అద్భుతంగా ఉంటుంది. ప్రస్తుతం మార్కెట్లో డీజిల్ కార్ల ఆప్షన్లు తగ్గుతున్నప్పటికీ, రూ.9 లక్షల నుంచి రూ.16 లక్షల బడ్జెట్ పరిధిలో కస్టమర్లను విపరీతంగా ఆకట్టుకుంటున్న 5 అత్యుత్తమ కాంపాక్ట్ డీజిల్ SUV కార్ల వివరాలు తెలుసుకుందాం.

1. టాటా నెక్సాన్ (Tata Nexon Diesel)
టాటా మోటార్స్ నుంచి వచ్చిన అత్యంత సురక్షితమైన, పాపులర్ SUV నెక్సాన్. దీని డీజిల్ వేరియంట్ ధర సుమారు రూ.10.65 లక్షల నుంచి రూ.14.02 లక్షల (ఎక్స్-షోరూమ్) మధ్య అందుబాటులో ఉంది. ఈ కారులో 115 హార్స్‌పవర్ ఇచ్చే శక్తివంతమైన 1.5 లీటర్ డీజిల్ ఇంజన్ ఉంది. ఇది 6-స్పీడ్ AMT గేర్‌బాక్స్‌తో వస్తుంది.

నెక్సాన్ కారు రోడ్డుపై వెళ్తుంటే రగ్గ్‌డ్‌గా అనిపిస్తుంది. మిడ్-రేంజ్ వేగంలో ఈ కారు పర్ఫార్మెన్స్ అద్భుతంగా ఉంటుంది. కారు లోపల క్యాబిన్ చాలా విశాలంగా ఉంటుంది, ఫ్యామిలీతో ప్రయాణించడానికి ఇది పర్ఫెక్ట్ ఛాయిస్. అయితే, దీని AMT గేర్‌బాక్స్ సిటీ ట్రాఫిక్‌లో కొందరికి కొంచెం లాగ్ (నెమ్మదిగా) అనిపించవచ్చు. అయినప్పటికీ గ్లోబల్ NCAP సేఫ్టీ రేటింగ్‌లో 5 స్టార్స్ సాధించిన కారు కాబట్టి సేఫ్టీకి తిరుగులేదు.

2. కియా సోనెట్ (Kia Sonet Diesel)
స్టైలిష్ లుక్స్, అదిరిపోయే ఫీచర్లు ఇష్టపడేవారికి కియా సోనెట్ మొదటి ఛాయిస్. దీని డీజిల్ మోడల్ ధర సుమారు రూ.9.80 లక్షల నుంచి రూ.14.17 లక్షల వరకు ఉంది. ఇందులో 116 హార్స్‌పవర్ జనరేట్ చేసే 1.5 లీటర్ డీజిల్ ఇంజన్, అధునాతన 6-స్పీడ్ టార్క్ కన్వర్టర్ ఆటోమేటిక్ గేర్‌బాక్స్ ఉన్నాయి.

ఈ కారు ఇంజన్ చాలా సైలెంట్ గా ఉంటుంది. సిటీలోనైనా, హైవే పైనైనా స్మూత్ గా దూసుకుపోతుంది. మైలేజ్ విషయంలో కూడా ఇది బెస్ట్ అనిపించుకుంది. ఇంటీరియర్ చూస్తే లగ్జరీ కార్ల ఫీలింగ్ వస్తుంది, బోస్ సౌండ్ సిస్టమ్, పెద్ద టచ్ స్క్రీన్ వంటి హంగులు ఉన్నాయి. కానీ, వెనుక సీట్లో కూర్చునే వారికి లెగ్‌రూమ్ (కాలి స్థలం) కొంచెం తక్కువగా అనిపిస్తుంది. ముగ్గురు పెద్దవాళ్ళు వెనుక కూర్చోవడం కాస్త ఇబ్బందే.

3. హ్యుందాయ్ వెన్యూ (Hyundai Venue Diesel)
హ్యుందాయ్ వెన్యూ నమ్మకానికి, రీసేల్ వాల్యూకి పెట్టింది పేరు. దీని డీజిల్ కార్ల ధరలు సుమారు రూ.11.81 లక్షల నుంచి రూ.15.64 లక్షల మధ్య ఉన్నాయి. కియా సోనెట్ లాగే ఇందులో కూడా 1.5 లీటర్ స్మూత్ డీజిల్ ఇంజన్ లభిస్తుంది.

లాంగ్ డ్రైవ్స్ వెళ్లాలనుకునే వారికి వెన్యూ చాలా కంఫర్టబుల్ గా ఉంటుంది. సోనెట్‌తో పోలిస్తే దీని వెనుక సీట్లలో స్పేస్ కొంచెం ఎక్కువగా ఉంటుంది. ఫ్యామిలీ కారుగా ఇది చాలా బాగుంటుంది. హ్యుందాయ్ బ్రాండ్ సర్వీస్ నెట్‌వర్క్ కూడా చాలా పెద్దది. అయితే, దీని టాప్-ఎండ్ మోడల్ ధరలు సోనెట్ కంటే కొంచెం ఎక్కువగా ఉండటం ఒక చిన్న మైనస్ పాయింట్.

4. మహీంద్రా XUV 3XO (Mahindra XUV 3XO Diesel)
మహీంద్రా సంస్థ ఈ కారును పాత XUV300కి అప్‌గ్రేడెడ్ వెర్షన్‌గా సరికొత్త డిజైన్‌తో లాంచ్ చేసింది. దీని ధర రూ.9.22 లక్షల నుంచి రూ.13.90 లక్షల మధ్య ఉంటుంది. ఈ కారులో 117 హార్స్‌పవర్ ఇచ్చే 1.5-లీటర్ డీజిల్ ఇంజన్ ఉంది.

ఈ సెగ్మెంట్‌లోనే అత్యధికంగా 300 Nm టార్క్‌ను ఈ కారు అందిస్తుంది. అంటే ఎక్సలరేటర్ తొక్కగానే కారు రాకెట్‌లా దూసుకుపోతుంది. 6-స్పీడ్ ఆటోమేటిక్ ట్రాన్స్‌మిషన్‌తో వచ్చే ఈ SUVలో వెనుక సీటు చాలా వెడల్పుగా ఉంటుంది, ముగ్గురు హ్యాపీగా కూర్చోవచ్చు. అయితే, దీని క్యాబిన్ స్పేస్ పెంచడం వల్ల బూట్ స్పేస్ చాలా తగ్గిపోయింది. ఎక్కువ లగేజ్ తీసుకెళ్లడానికి ఇది అంతగా అనుకూలించదు.

5. కియా సిరోస్ (Kia Syros Diesel)
ఈ లిస్టులో సరికొత్తగా చేరిన కారు కియా సిరోస్. దీని యూనిక్, బాక్సీ డిజైన్ రోడ్డుపై అందరి దృష్టిని ఆకర్షిస్తోంది. దీని ధర రూ.12.73 లక్షల నుంచి రూ.15.80 లక్షల మధ్య ఉంటుంది. ఇందులో కూడా హ్యుందాయ్-కియా గ్రూప్ కి చెందిన నమ్మకమైన 116 హార్స్‌పవర్ 1.5-లీటర్ డీజిల్ ఇంజన్ ఉపయోగించారు.

సిరోస్ కారు లోపల స్పేస్ చాలా అద్భుతంగా ఉంటుంది. హెడ్‌రూమ్, లెగ్‌రూమ్ విషయంలో ఈ సెగ్మెంట్‌లోనే ఇది బెస్ట్ అని చెప్పొచ్చు. ఫీచర్లు, ఇంటీరియర్ క్వాలిటీ పరంగా వెన్యూ, సోనెట్‌లకు గట్టి పోటీ ఇస్తుంది. కాకపోతే, క్యాబిన్ లోపలికి వచ్చే ఇంజన్ శబ్దం (NVH లెవెల్స్) మిగతా కార్ల కంటే కొంచెం ఎక్కువగా ఉన్నట్లు అనిపిస్తుంది.

మీకు సేఫ్టీ, స్ట్రాంగ్ బాడీ కావాలంటే టాటా నెక్సాన్, ఫీచర్లు మరియు స్మూత్‌నెస్ కావాలంటే కియా సోనెట్, ఫ్యామిలీ కంఫర్ట్ కోసం హ్యుందాయ్ వెన్యూ, ప్యూర్ పవర్ అండ్ టార్క్ కావాలంటే మహీంద్రా XUV 3XO, ఇక డిఫరెంట్ లుక్ మరియు ఎక్కువ స్పేస్ కావాలంటే కియా సిరోస్ బెస్ట్ ఆప్షన్లు అవుతాయి.