కార్ల తయారీలో సరికొత్త విప్లవం.. ఎంజీ మోటార్స్ నుంచి దేశంలోనే మొదటి మల్టీ ఎనర్జీ ప్లాట్‌ఫామ్ ADAPT

భారత ఆటోమొబైల్ రంగంలో పర్యావరణ అనుకూల వాహనాలకు (న్యూ ఎనర్జీ వెహికల్స్ - NEV) ఆదరణ రోజురోజుకూ పెరుగుతోంది. దీనిని దృష్టిలో ఉంచుకుని ప్రముఖ కార్ల తయారీ సంస్థ జేఎస్‌డబ్ల్యూ ఎంజీ మోటార్ ఇండియా (JSW MG Motor India) దేశంలోనే మొట్టమొదటి మల్టీ-ఎనర్జీ ప్లాట్‌ఫామ్ MG ADAPT (Advance Drive Architecture Platform Technology)ను గురుగ్రామ్ వేదికగా జూలై 16, 2026న ఘనంగా ఆవిష్కరించింది.

ఇది కేవలం ఒక కొత్త కారు లాంచ్ కాదు, భవిష్యత్తులో రాబోయే కార్ల తయారీ విధానాన్నే మార్చేసే సరికొత్త సాంకేతిక వేదిక. ఒకే ప్లాట్‌ఫామ్‌పై సాధారణ ఈవీతో పాటు వివిధ రకాల హైబ్రిడ్ టెక్నాలజీలను తయారు చేసే వీలును ఈ సాంకేతికత కల్పిస్తుంది. ఈ సరికొత్త MG ADAPT ప్లాట్‌ఫామ్ చాలా సింపుల్, మోడ్రన్ డిజైన్‌తో రూపొందించబడింది. ఇది నాలుగు విభిన్న రకాల సరికొత్త ఇంజన్ టెక్నాలజీలను ఒకే ఫ్రేమ్‌వర్క్‌లో సపోర్ట్ చేస్తుంది. అవి:

* ఎలక్ట్రిక్ వెహికల్ (EV): పూర్తి బ్యాటరీతో నడిచే వాహనాలు.
* హైబ్రిడ్ ఎలక్ట్రిక్ వెహికల్ (HEV): పెట్రోల్ ఇంజన్, బ్యాటరీ కలయికతో నడిచేవి.
* ప్లగ్-ఇన్ హైబ్రిడ్ ఎలక్ట్రిక్ వెహికల్ (PHEV): బయట కూడా ఛార్జింగ్ చేసుకునే వీలున్న హైబ్రిడ్ కార్లు.
* రేంజ్ ఎక్స్టెండర్ ఎలక్ట్రిక్ వెహికల్ (REEV): బ్యాటరీ అయిపోతే పెట్రోల్ సాయంతో రేంజ్ పెంచే వాహనాలు.
ఈ విధమైన మల్టీ టెక్నాలజీ అందుబాటులోకి రావడం వల్ల మధ్యతరగతి కొనుగోలుదారులకు తమ బడ్జెట్, రోజువారీ అవసరాలకు తగినట్లుగా సరైన కారును ఎంచుకునే స్వేచ్ఛ లభిస్తుంది.

ఈ సరికొత్త ప్లాట్‌ఫామ్ ఆధారంగా జేఎస్‌డబ్ల్యూ ఎంజీ మోటార్ ఇండియా తన రాబోయే తరం కార్లను తయారు చేయనుంది. ఆర్థిక సంవత్సరం 2026-27 నాటికి ఈ ప్లాట్‌ఫామ్‌పై రూపొందించిన ఒక సరికొత్త పూర్తి ఎలక్ట్రిక్ కారును (EV), అలాగే ఒక ప్లగ్-ఇన్ హైబ్రిడ్ కారును (PHEV) మార్కెట్లోకి ప్రవేశపెట్టనున్నట్లు సంస్థ ప్రకటించింది. ఈ సరికొత్త ప్లాట్‌ఫామ్ వల్ల కొత్త మోడల్ కార్ల అభివృద్ధి చాలా వేగంగా జరుగుతుంది.

అంతేకాకుండా కార్ల డ్రైవింగ్ రేంజ్ పెరగడం, ఫాస్ట్ ఛార్జింగ్ సామర్థ్యం మెరుగుపడటం, గరిష్ట భద్రత, అత్యంత విలాసవంతమైన డ్రైవింగ్ అనుభూతిని పొందడం సాధ్యమవుతుంది. ఈ MG ADAPT ప్లాట్‌ఫామ్‎లో అమర్చిన స్మార్ట్ ఎనర్జీ మేనేజ్‌మెంట్ సిస్టమ్ డ్రైవింగ్ పరిస్థితులను నిరంతరం గమనిస్తూ, కారు మైలేజ్, పర్ఫార్మెన్స్‌ను పెంచడానికి నాలుగు ఆటోమేటిక్ డ్రైవ్ మోడ్స్‌ను ఎంపిక చేసుకుంటుంది.

* ప్యూర్ ఎలక్ట్రిక్ డ్రైవ్: నగరాల్లో నిశ్శబ్దంగా, ఎలాంటి కాలుష్యం లేకుండా కేవలం బ్యాటరీ పవర్‌తో నడపడానికి.
* సిరీస్ హైబ్రిడ్ డ్రైవ్: ఇంజన్ కేవలం విద్యుత్‌ను తయారు చేస్తుంటే, మోటార్ చక్రాలను తిప్పుతుంది.
* ప్యారలల్ హైబ్రిడ్ డ్రైవ్: ఎక్కువ పర్ఫార్మెన్స్ కావాల్సి వచ్చినప్పుడు ఇంజన్, మోటార్ రెండూ కలిసి పనిచేస్తాయి.
* ఇంజిన్ డైరెక్ట్ డ్రైవ్: హైవేలపై వేగంగా ప్రయాణించేటప్పుడు ఎక్కువ మైలేజ్ వచ్చేలా ఇంజన్ మాత్రమే రన్ అవుతుంది.

ఎలక్ట్రిక్ కార్లు కొనే చాలామందికి మధ్యలో ఛార్జింగ్ అయిపోతే ఏంటనే భయం ఉంటుంది. దీనికి పరిష్కారంగా ఈ ప్లాట్‌ఫామ్ రేంజ్ ఎక్స్టెండర్ ఎలక్ట్రిక్ వెహికల్ (REEV) టెక్నాలజీని కూడా సపోర్ట్ చేస్తుంది. ఈ పద్ధతిలో వీల్స్ ఎప్పుడూ ఎలక్ట్రిక్ మోటార్ ద్వారానే తిరుగుతాయి. కానీ బ్యాటరీ చార్జ్ తగ్గినప్పుడు, కారులో ఉండే ఒక చిన్న పెట్రోల్ ఇంజన్ కేవలం జనరేటర్ లాగా పనిచేసి బ్యాటరీని చార్జ్ చేస్తుంది. దీనివల్ల ప్రయాణికులకు పూర్తి ఎలక్ట్రిక్ కారు అనుభూతిని ఇస్తూనే, సుదూర ప్రాంతాలకు ప్రయాణించేటప్పుడు మైలేజ్ పెంచి కొండంత ధైర్యాన్ని ఇస్తుంది.

ఈ ప్లాట్‌ఫామ్‌లో సరికొత్త హైబ్రిడ్ ఇంజన్, అధునాతన బ్యాటరీ సిస్టమ్, భారతదేశంలోనే మొదటిసారిగా ప్రవేశపెట్టిన 10-ఇన్-1 ఇంటెలిజెంట్ ఎలక్ట్రిక్ డ్రైవ్ యూనిట్, ప్రపంచంలోనే మొదటిదైన ఎలక్ట్రోమాగ్నెటిక్ డెడికేటెడ్ హైబ్రిడ్ ట్రాన్స్‌మిషన్ వంటి అద్భుతమైన ఫీచర్లను చేర్చారు. ఎంజీ మోటార్ ఇండియా తెచ్చిన ఈ సరికొత్త టెక్నాలజీ భారతీయ వాహన రంగ రూపురేఖలను మార్చడమే కాకుండా పర్యావరణ పరిరక్షణకు ఎంతగానో దోహదపడనుంది.