ఏంటి ఆఫర్ ఇస్తున్నారా ? లేక కారే ఫ్రీగా ఇస్తున్నారా ? ఎంజీ ఆఫర్ల దెబ్బకు ప్రత్యర్థి కంపెనీల మైండ్ బ్లాక్

కార్ల ప్రేమికులకు ఇది నిజంగా పండగ లాంటి వార్త. ప్రముఖ వాహన తయారీ సంస్థ ఎంజీ మోటర్ ఇండియా (MG Motor India) ఏప్రిల్ 2026 నెలకు సంబంధించి అదిరిపోయే ఆఫర్లను ప్రకటించింది. కొత్త కారు కొనాలనే ప్లాన్‌లో ఉన్నవారికి ఇది సరైన సమయం. ఎలక్ట్రిక్ కార్ల నుంచి పవర్‌ఫుల్ ఎస్‌యూవీల వరకు దాదాపు అన్ని మోడళ్లపై భారీ డిస్కౌంట్లు అందుబాటులో ఉన్నాయి. ముఖ్యంగా కొన్ని మోడళ్లపై ఏకంగా రూ.3.5 లక్షల వరకు ఆదా చేసుకునే అవకాశం ఉంది.

సాధారణంగా కొత్త ఆర్థిక సంవత్సరం ప్రారంభంలో కార్ల ధరలు పెరుగుతుంటాయి. కానీ ఎంజీ మోటర్స్ మాత్రం తన కస్టమర్లకు షాక్ ఇవ్వకుండా భారీ ఆఫర్లతో సర్‌ప్రైజ్ చేసింది. ఎంజీ పోర్ట్‌ఫోలియోలోని విండ్సర్, జెడ్ఎస్ ఈవీ, హెక్టార్, ఆస్టర్, గ్లోస్టర్ వంటి పాపులర్ కార్లపై ఈ నెలలో అదిరిపోయే బెనిఫిట్స్ ఉన్నాయి.

1. ఎంజీ గ్లోస్టర్ (MG Gloster):
ఈ ఏప్రిల్ నెలలో ఎంజీ నుంచి వస్తున్న అతిపెద్ద ఆఫర్ ఇదే. కంపెనీ తన ఫ్లాగ్‌షిప్ ఎస్‌యూవీ అయిన గ్లోస్టర్ పై కళ్లు చెదిరే డిస్కౌంట్లు ఇస్తోంది. గ్లోస్టర్‌పై ఏకంగా రూ. 3.5 లక్షల వరకు క్యాష్ డిస్కౌంట్ లభిస్తోంది. దీనికి అదనంగా మరో రూ. 20,000 ఎక్స్ఛేంజ్ బోనస్ కూడా పొందవచ్చు. అంటే పాత కారు ఇచ్చి కొత్త గ్లోస్టర్ తీసుకుంటే భారీగా ఆదా అవుతుంది. ఇందులో 2.0 లీటర్ టర్బో-డీజిల్ ఇంజిన్ ఉంటుంది. ఇది 161 పీఎస్ పవర్, 373.5 ఎన్ఎమ్ టార్క్‌ను ఇస్తుంది. 8-స్పీడ్ ఆటోమేటిక్ ట్రాన్స్‌మిషన్‌తో వచ్చే ఈ కారు ఒక లగ్జరీ ప్యాలెస్ లాంటిది.

2. ఎంజీ హెక్టార్ (MG Hector):
ఎస్‌యూవీ సెగ్మెంట్‌లో ఎంజీకి మంచి పేరు తెచ్చిపెట్టిన మోడల్ హెక్టార్. మార్కెట్లో ఇతర కార్ల ధరలు రూ. 30 వేల వరకు పెరిగినప్పటికీ, ఎంజీ మాత్రం తన హెక్టార్ బేస్ ప్రైస్‌ను రూ. 11.99 లక్షల వద్దే స్థిరంగా ఉంచడం విశేషం. ఇందులో 1.5 లీటర్ పెట్రోల్ ఇంజిన్ (143 HP), 2.0 లీటర్ డీజిల్ ఇంజిన్ (170 HP) ఆప్షన్లు ఉన్నాయి. మ్యాన్యువల్, సీవీటి గేర్ బాక్స్ ఎంపికలతో ఇది అందుబాటులో ఉంది. ఫ్యామిలీతో కలిసి ప్రయాణించే వారికి ఇది ది బెస్ట్ ఛాయిస్.

3. ఎంజీ విండ్సర్ ఈవీ (MG Windsor EV):
సిటీ డ్రైవింగ్‌కు సూపర్ కూల్‌గా ఉండే విండ్సర్ ఈవీపై కూడా ఎంజీ ఆఫర్లు ప్రకటించింది.ఈ కారుపై రూ. 20,000 క్యాష్ డిస్కౌంట్, రూ. 20,000 ఎక్స్ఛేంజ్ బోనస్ లభిస్తున్నాయి. మొత్తంగా రూ. 40,000 వరకు లాభం పొందవచ్చు. ఇది రెండు బ్యాటరీ ప్యాక్ ఆప్షన్లలో (38 kWh, 52.9 kWh) వస్తుంది. పెద్ద బ్యాటరీ ఉన్న మోడల్ ఒక్కసారి ఛార్జ్ చేస్తే 449 కిలోమీటర్ల వరకు ప్రయాణిస్తుంది.

4. ఎంజీ జెడ్ఎస్ ఈవీ (MG ZS EV):
ఎలక్ట్రిక్ కార్ల విభాగంలో ఎంజీ జెడ్ఎస్ ఈవీకి ఒక ప్రత్యేక క్రేజ్ ఉంది. మంచి పవర్, రేంజ్ కావాలనుకునే వారు దీనిని ఎంచుకోవచ్చు. దీనిపై కూడా విండ్సర్ లాగే రూ. 20,000 నగదు తగ్గింపు, రూ. 20,000 ఎక్స్ఛేంజ్ బోనస్ కలిపి మొత్తం రూ. 40,000 వరకు ప్రయోజనం ఉంటుంది. ఇందులో 50.3 kWh బ్యాటరీ ఉంది. ఇది 461 కిలోమీటర్ల రేంజ్ ఇస్తుందని కంపెనీ క్లెయిమ్ చేస్తోంది.

5. ఎంజీ ఆస్టర్ (MG Astor):
ఆర్టిఫిషియల్ ఇంటెలిజెన్స్ (AI) ఫీచర్లతో వచ్చిన ఆస్టర్ కారు యువతను బాగా ఆకట్టుకుంటోంది. ఈ ఏప్రిల్‌లో ఆస్టర్ కొంటే రూ. 20,000 క్యాష్ డిస్కౌంట్, రూ. 25,000 ఎక్స్ఛేంజ్ బోనస్ కలిపి మొత్తం రూ. 45,000 బెనిఫిట్ పొందవచ్చు. ఇందులో 1.5 లీటర్ పెట్రోల్, 1.3 లీటర్ టర్బో పెట్రోల్ ఆప్షన్లు ఉన్నాయి.

6. ఎంజీ కామెట్ ఈవీ (MG Comet EV):
సిటీలో ట్రాఫిక్ చిక్కులు లేకుండా తిరగడానికి కామెట్ ఈవీ ది బెస్ట్. ఏప్రిల్‌లో దీనిపై రూ. 30,000 వరకు క్యాష్ డిస్కౌంట్ ఇస్తున్నారు. ఒక్క ఛార్జ్‌తో ఇది 230 కిలోమీటర్లు వెళ్తుంది.