విడుదలకు సిద్ధమవుతున్న ఫోక్స్‌వ్యాగన్ టైగన్; లేటెస్ట్ స్పై చిత్రాలు

కంపెనీ ఈ మోడల్‌ను ఇప్పుడు భారత రోడ్లపై విస్తృతంగా పరీక్షిస్తోంది. ఈ పరీక్షలు తుది దశకు చేరుకున్నట్లుగా తెలుస్తోంది. భారత మార్కెట్ కోసం ఫోక్స్‌వ్యాగన్ మరియు స్కొడా కంపెనీలు సంయుక్తంగా చేపట్టిన ఇండియా 2.0 ప్రాజెక్ట్‌లో భాగంగా అనేక కార్లను ఇరు కంపెనీలు ప్రవేశపెట్టనున్నాయి.

ఈ ప్రాజెక్ట్‌లో భాగంగానే ఫోక్స్‌వ్యాగన్ టైగన్ కూడా రానుంది. ఈ ఎస్‌యూవీని తొలిసారిగా 2020 ఆటో ఎక్స్‌పోలో ప్రదర్శించారు. ఫోక్స్‌వ్యాగన్ టైగన్ ఎస్‌యూవీని కూడా ఎమ్‌క్యూబి ఏ0 ఐఎన్ ప్లాట్‌ఫామ్‌పైనే నిర్మించనున్నారు. ఇదే ప్లాట్‌ఫామ్‌పై స్కొడా కుషాక్ అనే ఎస్‌యూవీని కూడా అభివృద్ధి చేస్తున్న సంగతి తెలిసినదే.

ఈ నేపథ్యంలో, స్కొడా కుషాక్ మరియు ఫోక్స్‌వ్యాగన్ టైగన్ రెండు మోడళ్లలో అనేక పోలికలు ఉండొచ్చని అంచనా. అంతేకాకుండా, ఈ రెండు మోడళ్లలో ఉపయోగించే విడిభాగాలు మరియు పరికరాలు కూడా ఒకేలా ఉండే అవకాశం ఉంది. టైగన్ ధరను అందుబాటులో ఉంచేందుకు కంపెనీ ఈ మోడల్‌ను ఎక్కువ భాగం స్థానికంగానే తయారు చేయనుంది.

కొత్త ఫోక్స్‌వ్యాగన్ టైగన్‌లో ఇంటిగ్రేటెడ్ ఎల్ఈడి డిఆర్ఎల్‍‌లతో కూడిన ఎల్ఈడి హెడ్‌ల్యాంప్స్, క్రోమ్‌తో ఫినిష్ చేయబడిన ఫ్రంట్ గ్రిల్, 17ఇంచ్ డైమండ్-కట్ అల్లాయ్ వీల్స్, ఎల్ఈడి స్ట్రిప్ ద్వారా కనెక్ట్ చేయబడిన ఎల్ఈడి టెయిల్ లైట్స్, రూఫ్ స్టాప్ ల్యాంప్, సిల్వర్-ఫినిష్డ్ రూఫ్ రైల్స్, ఎలక్ట్రిక్ సన్‌రూఫ్, బంపర్‌లపై సిల్వర్ ఎలిమెంట్స్ మరియు ముందు, వెనుక రెండు వైపులా ఫాక్స్ స్కిడ్ ప్లేట్‌లతో కూడిన స్పాయిలర్ వంటి ఫీచర్లు ఉండే అవకాశం ఉంది.

అలాగే, ఇందులోని ఇంటీరియర్స్‌ను గమనిస్తే, బ్రాండ్ యొక్క లేటెస్ట్ కనెక్టింగ్ టెక్నాలజీతో కూడిన ఇన్ఫోటైన్‌మెంట్ సిస్టమ్‌తో పాటుగా అనేక ఇతర ఫీచర్లు మరియు పరికరాలు ఇందులో లభిస్తాయి. ఈ ఎస్‌యూవీలో ఆపిల్ కార్‌ప్లే మరియు ఆండ్రాయిడ్ ఆటోలతో కూడిన పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్, పూర్తి-డిజిటల్ ఇన్‌స్ట్రుమెంట్ క్లస్టర్, స్టీరింగ్-మౌంటెడ్ కంట్రోల్స్, వైర్‌లెస్ ఛార్జింగ్, స్పోర్టీ ఆల్-బ్లాక్ క్యాబిన్, సాఫ్ట్-టచ్ మెటీరియల్స్ మొదలైన ఫీచర్లు ఉండన్నాయి.

ఇక ఇంజన్ విషయానికి వస్తే, కొత్త ఫోక్స్‌వ్యాగన్ టైగన్ బ్రాండ్ యొక్క టిఎస్ఐ శ్రేణి పెట్రోల్ ఇంజన్లను కలిగి ఉంటుంది. ఇదే ఇంజన్లను ఇతర మోడళ్లలో కూడా ఉపయోగిస్తున్నారు. టైగన్ ఎస్‌యూవీలో 1.5-లీటర్ టిఎస్‌ఐ పెట్రోల్ ఇంజన్‌ను అమర్చనున్నట్లు సమాచారం. ఇది సిక్స్-స్పీడ్ మాన్యువల్ లేదా సెవన్-స్పీడ్ డిఎస్‌జి ఆటోమేటిక్ గేర్‌బాక్స్ ఆప్షన్లతో అందుబాటులోకి రానుంది.

ఫోక్స్‌వ్యాగన్ టైగన్ మిడ్-సైజ్ ఎస్‌యూవీ విభాగంలో విడుదల కానుంది. ఇది ఈ విభాగంలో ఇప్పటికే పాపులర్ అయిన హ్యుందాయ్ క్రెటా, కియా సెల్టోస్, నిస్సాన్ కిక్స్ వంటి మోడళ్లకు పోటీగా నిలుస్తుంది. ఈ మోడల్‌ని ఇప్పటికే కంపెనీ వెబ్‌సైట్‌లో అప్‌డేట్ చేశారు. మరికొద్ది నెలల్లోనే ఇది మార్కెట్లోకి వచ్చే అవకాశం ఉంది.