టెస్లాకి పోటీగా వచ్చిన బిఎమ్‌డబ్ల్యూ ఐ4 ఎలక్ట్రిక్ స్పోర్ట్ సెడాన్

బిఎమ్‌డబ్ల్యూ 2023 నాటికి ప్రపంచవ్యాప్తంగా 12 ఆల్-ఎలక్ట్రిక్ వాహనాలను విక్రయించాలనే లక్ష్యంతో ఉంది. బిఎమ్‌బ్ల్యూ ఎలక్ట్రిక్ ప్రోడక్ట్ పోర్ట్‌ఫోలియోలో స్పోర్ట్ సెడాన్ రూపంలో వస్తున్న మొదటి కార్ ఈ సరికొత్త 2022 బిఎమ్‌డబ్ల్యూ ఐ4 సెడాన్. అంతేకాకుండా, బ్రాండ్ యొక్క ఐడ్రైవ్ 8 టెక్నాలజీని కలిగిన మొట్టమొదటి కారు కూడా ఇదే.

బిఎమ్‌డబ్ల్యూ ఐ4 వివిధ రేంజ్ ఆప్షన్లతో లభ్యం కానుంది. వరల్డ్‌వైడ్ హార్మోనైజ్డ్ లైట్ వెహికల్స్ టెస్ట్ ప్రొసీజర్ (డబ్ల్యుఎల్‌టిపి) ధృవీకరించిన దాని ప్రకారం, ఈ ఎలక్ట్రిక్ కారు పూర్తి చార్జ్‌పై 590 కిలోమీటర్ల రేంజ్‌ను ఆఫర్ చేస్తుంది. అలాగే, యునైటెడ్ స్టేట్స్ ఎన్విరాన్‌మెంటల్ ప్రొటెక్షన్ ఏజెన్సీ (ఇపిఎ) ప్రకారం, ఇది పూర్తి చార్జ్‌పై 482 కిలోమీటర్ల రేంజ్‌ను అందిస్తుంది.

ఈ ఎలక్ట్రిక్ కారులో కంపెనీ 390 కిలోవాట్ల ఎలక్ట్రిక్ మోటారును ఉపయోగించనున్నారు. ఇది గరిష్టంగా 530 బిహెచ్‌పిల శక్తిని ఉత్పత్తి చేస్తుంది. అంతేకాకుండా, ఈ ఎలక్ట్రిక్ స్పోర్ట్స్ కార్ కేవలం 4 సెకన్లలోనే గంటకు 0 నుండి 100 కిలోమీటర్ల వేగాన్ని చేరుకుంటుంది. దీని గరిష్ట వేగాన్ని గంటకు 200 కిలోమీటర్లకు పరిమితం చేసినట్లు సమాచారం.

బిఎమ్‌డబ్ల్యూ ఐ4 ఎలక్ట్రిక్ గ్రాన్ కూపే కారు కంపెనీ యొక్క క్లార్ (CLAR) ప్లాట్‌ఫామ్‌పై అభివృద్ధి చేస్తున్నారు. ఇదే ప్లాట్‌ఫామ్‌పై ప్రస్తుత తరం 3 సిరీస్ మరియు 4 సిరీస్ మోడళ్లను తయారు చేస్తున్నారు. ఈ కారులో చిన్న బ్యాటరీ ప్యాక్స్‌తో రియర్-వీల్-డ్రైవ్ ఆప్షన్ కలిగిన ఎంట్రీ లెవల్ వేరియంట్లను కూడా ఆఫర్ చేయనున్నట్లు తెలుస్తోంది.

బిఎమ్‌డబ్ల్యూ గతంలో ప్రదర్శించిన కాన్సెప్ట్ వెర్షన్ ఐ4లోని అనేక డిజైన్ అంశాలు ఈ ప్రొడక్షన్ వెర్షన్ బిఎమ్‌డబ్ల్యూ ఐ4లో కూడా కనిపించనున్నాయి. కాన్సెప్ట్ వెర్షన్‌లో లాంగ్ వీల్‌బేస్, ఫాస్ట్‌బ్యాక్ రూఫ్‌లైన్ మరియు షార్ట్ ఓవర్‌హాంగ్‌లతో ఇది చాలా ఆధునికంగా కనిపించింది. ప్రొడక్షన్ వెర్షన్ కూడా ఇదే తరహా డిజైన్ క్యూలను ముందుకు తీసుకువెళ్తుందని భావిస్తున్నారు.

బిఎమ్‌డబ్ల్యూ ఆవిష్కరించిన ఈ కొత్త ఐ4 మోడల్‌లో రీడిజైన్ చేయబడిన ఫ్రంట్ గ్రిల్ ఉంటుంది, ఇది చూడటానికి బక్‌టూత్ (కుందేలు ముందు రెండు పళ్లు) మాదిరిగా కనిపిస్తుంది. ఇది సాధారణ బిఎమ్‌డబ్ల్యూ కార్లలో కనిపించే సిగ్నేచర్ కిడ్నీ గ్రిల్‌కు విరుద్ధంగా ఉంటుంది. ఈ గ్రిల్‌పై ఇప్పటికే భిన్నాభిప్రాయాలు ఉన్నాయి.

కాగా, ఈ కొత్త 2022 బిఎమ్‌డబ్ల్యూ ఐ4 ఎలక్ట్రిక్ స్పోర్ట్ సెడాన్ కోర్, స్పోర్ట్ మరియు ఎఫిషియంట్ అనే మూడు వేర్వేరు డ్రైవింగ్ మోడ్‌లతో వచ్చే అవకాశం ఉంది. ఇందులోని కొత్త కర్వ్డ్ డిస్‌ప్లేలో, 12.3 ఇంచ్ ఇన్ఫోటైన్‌మెంట్ డిస్‌ప్లే మరియు 14.9 ఇంచ్ కంట్రోల్ డిస్‌ప్లే స్క్రీన్‌లు రెండూ ఒకే యూనిట్‌లో కలిసి ఉంటాయి.

బిఎమ్‌డబ్ల్యూ ఐ4 ఎలక్ట్రిక్ కారు ఈ విభాగంలో టెస్లా మోడల్ 3 పెర్ఫార్మెన్స్ మరియు ఆడి ఇ-ట్రోన్ జిటి వంటి మోడళ్లకు పోటీగా నిలుస్తుందని అంచనా.