ఫిబ్రవరి 2021లో దుమ్ము లేపిన మహీంద్రా స్కార్పియో సేల్స్

కొత్త తరం మహీంద్రా స్కార్పియో విడుదల మరింత ఆలస్యం కావడంతో, కస్టమర్లు ప్రస్తుత తరం స్కార్పియోని కొనుగోలు చేసేందుకే ఆసక్తి చూపుతున్నారు. ఈ నేపథ్యంలో, గత నెలలో మహీంద్రా స్కార్పియో అమ్మకాలు 3,532 యూనిట్లుగా నమోదయ్యాయి. దీంతో స్కార్పియో గత నెలలో ఈ బ్రాండ్ లైనప్‌లో అత్యధికంగా అమ్ముడైన రెండవ మోడల్‌గా నిలిచింది.

ఫిబ్రవరి 2020లో మహీంద్రా స్కార్పియో అమ్మకాలు 1,505 యూనిట్లుగా ఉన్నాయి. ఈ సమయంతో పోలిస్తే స్కార్పియో అమ్మకాలు ఏకంగా 134.68 శాతం వృద్ధిని సాధించాయి. కానీ, జనవరి 2021లో కంపెనీ విక్రయించిన 4,083 యూనిట్లతో పోలిస్తే మాత్రం, స్కార్పియో నెలవారీ అమ్మకాలు 13.49 శాతం క్షీణించాయి.

గడచిన ఫిబ్రవరి 2021లో మహీంద్రా స్కార్పియోలో ఓ కొత్త వేరియంట్‌ను కంపెనీ సైలెంట్‌గా మార్కెట్లో విడుదల చేసింది. మహీంద్రా స్కార్పియో ఎస్3+ పేరుతో రూ.11.99 లక్షల (ఎక్స్-షోరూమ్) ప్రైస్ ట్యాగ్‌తో ఈ కొత్త వేరియంట్‌ను ప్రవేశపెట్టారు. ఇది ఎస్ 5 వేరియంట్ ధర (రూ.12.67 లక్షల) కన్నా రూ.68,000 తక్కువగా ఉంటుంది.

మహీంద్రా స్కార్పియో ఎస్‌యూవీలో పవర్‌ఫుల్ 2.2-లీటర్ ఎమ్‌హాక్ డీజిల్ ఇంజన్‌ను ఉపయోగించారు. ఈ ఇంజన్ గరిష్టంగా 140 బిహెచ్‌పి పవర్‌ను మరియు 319 ఎన్ఎమ్ టార్క్‌ను ఉత్పత్తి చేస్తుంది. ఇది సిక్స్-స్పీడ్ మ్యాన్యువల్ గేర్‌బాక్స్ ఆప్షన్‌తో లభిస్తుంది. ప్రస్తుతం మార్కెట్లో స్కార్పియో ధరలు రూ.11.99 లక్షల నుంచి రూ.16.52 లక్షల మధ్యలో ఉన్నాయి (ఎక్స్-షోరూమ్).

ఇదిలా ఉంటే, ఈ ఏడాది కొత్త తరం మహీంద్రా స్కార్పియో విడుదల మరింత అలస్యం అయ్యేలా కనిపిస్తోంది. వాస్తవానికి గతేడాదే మార్కెట్లోకి రావల్సిన ఈ కొత్త మోడల్ కరోనా కారణంగా ఈ ఏడాదికి వాయిదా పడింది. అయితే, ఈ ఏడాది కూడా కొత్త స్కార్పియో త్వరలో మార్కెట్లోకి వచ్చే అవకాశాలు కనిపించడం లేదు.

ఇందుకు ప్రధాన కారణం, సెమీకండక్టర్ చిప్స్ కొరతగా తెలుస్తోంది. ప్రపంచవ్యాప్తంగా ఉన్న ఆటోమొబైల్ పరిశ్రమ ప్రస్తుతం ఈ సెమీకండక్టర్ చిప్స్ కొరతను ఎదుర్కుంటోంది. మహీంద్రా థార్ విషయంలో కూడా ఇదే జరిగింది, ఫలితంగా థార్ వెయిటింగ్ పీరియడ్ కూడా గణనీయంగా పెరుగుతోంది.