మార్కెట్లో రూ.15 లక్షల లోపు లభించే బెస్ట్ ఎస్‌యూవీలు

ప్రస్తుతం భారత మార్కెట్లో సరసమైన మరియు ఫీచర్ లోడెడ్ ఎస్‌యూవీలు అందుబాటులో ఉన్నాయి. గత కొన్నేళ్లుగా మార్కెట్ ట్రెండ్‌ను పరిశీలిస్తే, కస్టమర్లు ఎక్కువగా ఎస్‌యూవీలనే ఆదరించడాన్ని చూడొచ్చు. ఈ నేపథ్యంలో, ప్రస్తుతం భారత్‌లో రూ.15 లక్షల కన్నా తక్కువ ధరకు లభించే ఎస్‌యూవీల వివరాలేంటో ఈ కథనంలో తెలుసుకుందాం రండి.

1. కియా సెల్టోస్ - ప్రారంభ ధర రూ.9.89 లక్షలు

కియా మోటార్స్ సంస్థకి గేమ్ ఛేంజర్ మోడల్ ఈ కియా సెల్టోస్. మిడ్-సైజ్ ఎస్‌యూవీ విభాగంలో లభిస్తున్న ఈ హాటెస్ట్ కారు ప్రారంభ ధర రూ.9.89 లక్షలు మాత్రమే. ఇది మొత్తం 8 వేరియంట్లలో అందుబాటులో ఉంటుంది. అంతేకాదు, ఇందులో మూడు రకాల ఇంజన్ ఆప్షన్లు (1.5 లీటర్ పెట్రోల్, 1.5 లీటర్ డీజిల్ మరియు 1.4 లీటర్ టర్బో-పెట్రోల్ ఇంజన్‌) ఉంటాయి. కంపెనీ ఈ కారులో అనేక గొప్ప ఫీచర్లను కూడా అందిస్తోంది.

2. హ్యుందాయ్ క్రెటా - ప్రారంభ ధర రూ.9.81 లక్షలు

కియా సెల్టోస్ మాదిరిగానే, హ్యుందాయ్ క్రెటా కూడా ఈ విభాగంలో అత్యంత పాపులర్ అయిన మోడళ్లలో ఒకటి. వాస్తవానికి, సెల్టోస్ మరియు క్రెటాలు రెండూ కూడా ఒకే ప్లాట్‌ఫాంపై నిర్మించబడ్డాయి. ఇది కూడా సెల్టోస్ మాదిరిగానే 1.5 లీటర్ పెట్రోల్, 1.5 లీటర్ డీజిల్ మరియు 1.4 లీటర్ టర్బో-పెట్రోల్ ఇంజన్‌ ఆప్షన్లతో లభిస్తుంది. ఇందులో మొత్తం 17 వేరియంట్లు మరియు 10 కలర్ ఆప్షన్లు ఉన్నాయి. మార్కెట్లో దీని ధరలు రూ.9.81 లక్షల నుండి రూ.17.31 లక్షల మధ్యలో ఉన్నాయి.

3. ఎమ్‌జి హెక్టర్ - ప్రారంభ ధర రూ.12.83 లక్షలు

మోరిస్ గ్యారేజ్ మోటార్స్ (ఎమ్‌జి మోటార్స్) నుండి లభిస్తున్న పాపులర్ మిడ్-సైజ్ ఎస్‌యూవీ ఎమ్‌జి హెక్టర్. ఈ కారు మొత్తం 11 వేరియంట్లలో అందుబాటులో ఉంటుంది. ఇందులో హైబ్రిడ్ సిస్టమ్ ఆప్షన్ కూడా ఉంటుంది. ఈ ఎస్‌యూవీ కూడా మూడు ఇంజన్ ఆప్షన్స్ (1.5 లీటర్ టిసిఐసి పెట్రోల్, 2.0 లీటర్ డీజిల్ మరియు 1.5 లీటర్ టిసిఐసి హైబ్రిడ్) ఆప్షన్లలో లభిస్తుంది. ఈ కారులో, కంపెనీ 10.25 ఇంచ్ టచ్ స్క్రీన్‌తో పాటుగా అనేక ఫీచర్లను అందిస్తుంది. మార్కెట్లో ఈ ఎస్‌యూవీ ధరలు రూ.12.83 లక్షల నుంచి రూ.17.89 లక్షల మధ్యలో ఉన్నాయి.

4. రెనో డస్టర్ - ప్రారంభ ధర రూ.8.59 లక్షలు

ఫ్రెంచ్ కార్ బ్రాండ్ రెనో ఇండియా నుండి దేశీయ విపణిలో అత్యధికంగా అమ్ముడవుతున్న ఎస్‌యూవీలలో డస్టర్ కూడా ఒకటి. బిఎస్6 అప్‌డేట్ తరువాత, కంపెనీ ఈ కారులో డీజిల్ ఇంజన్ ఆప్షన్‌ను నిలిపివేసింది. ప్రస్తుతం ఇది పెట్రోల్ ఇంజన్‌తో మాత్రమే అందుబాటులో ఉంటుంది. ఇందులో 1.5 లీటర్, 4-సిలిండర్ పెట్రోల్ ఇంజన్ మరియు 1.3 లీటర్ 4-సిలిండర్ టర్బో పెట్రోల్ ఇంజన్ ఆప్షన్లు ఉన్నాయి. మార్కెట్లో ఈ కారు ధరలు రూ.8.59 లక్షల నుండి రూ.13.59 లక్షల మధ్యలో ఉన్నాయి.

5. మహీంద్రా ఎక్స్‌యూవీ 300 - ప్రారంభ ధర రూ.7.95 లక్షలు

మహీంద్రా అండ్ మహీంద్రా అందిస్తున్న ఈ పాపులర్ మిడ్-సైజ్ ఎస్‌యూవీ ఎక్స్‌యూవీ300 మోడల్‌ను పాపులర్ ఎక్స్‌యూవీ500 మోడల్ ఆధారంగా రూపొందించారు. ఈ ఎస్‌యూవీని నాలుగు వేరియంట్లు, ఏడు కలర్ ఆప్షన్లలో విక్రయిస్తున్నారు. ఇందులో 1.2 లీటర్ టర్బో-పెట్రోల్ మరియు 1.5 లీటర్ టర్బో డీజిల్ ఇంజన్ ఆప్షన్లు ఉన్నాయి. మార్కెట్లో ఈ కారు ప్రారంభ ధరలు రూ.7.95 లక్షల నుంచి రూ.10.97 లక్షల మధ్యలో ఉన్నాయి.

6. ఫోర్డ్ ఎకోస్పోర్ట్ - ప్రారంభ ధర రూ.8.19 లక్షలు

అమెరికన్ కార్ బ్రాండ్ ఫోర్డ్ ఇండియా, భారత మార్కెట్లో విక్రయిస్తున్న పాపులర్ కాంపాక్ట్ ఎస్‌యూవీ ఎకోస్పోర్ట్, ఇది మొత్తం 14 వేరియంట్లలో అందుబాటులో ఉంటుంది. ఇందులో రెండు ఇంజన్ ఆప్షన్లు ఉన్నాయి. అవి: 1.5 లీటర్ 3-సిలిండర్ పెట్రోల్ మరియు 1.5 లీటర్ 4-సిలిండర్ డీజిల్ ఇంజన్. ఈ కారులో 9 ఇంచ్ ఇన్ఫోటైన్‌మెంట్ సిస్టమ్‌తో పాటుగా అనేక ఫీచర్లు ఉన్నాయి. మార్కెట్లో ఈ కారు ధరలు రూ.8.19 లక్షల నుండి రూ.11.73 లక్షల మధ్యలో ఉన్నాయి.

7. టాటా నెక్సాన్ - ప్రారంభ ధర రూ.6.99 లక్షలు

టాటా మోటార్స్ అందిస్తున్న పాపులర్ కాంపాక్ట్ ఎస్‌యూవీ నెక్సాన్, పెట్రోల్ మరియు డీజిల్ ఇంజన్ ఆప్షన్లతో పాటుగా పూర్తిగా ఎలక్ట్రిక్ పవర్ ఆప్షన్‌తో కూడా లభిస్తోంది. ఇందులో 1.2-లీటర్ టర్బోచార్జ్డ్ పెట్రోల్ మరియు 1.5-లీటర్ టర్బోచార్జ్డ్ డీజిల్ ఇంజన్లు ఉన్నాయి. ఈ కారులో 7 ఇంచ్ ఫ్లోటింగ్ టచ్ స్క్రీన్‌తో పాటు అనేక ఇతర ఫీచర్లు కూడా ఉన్నాయి. మార్కెట్లో ఈ కారు ధరలు రూ.6.99 లక్షలు నుంచి రూ.12.70 లక్షల మధ్యలో ఉన్నాయి.

గమనిక:- పైన పేర్కొన్న అన్ని ధరలు ఎక్స్-షోరూమ్, ఢిల్లీ, జులై 6, 2021వ తేదీ నాటికి. భారత మార్కెట్లో పైన పేర్కొన్న ఎస్‌యూవీలు మాత్రమే కాకుండా, మారుతి విటారా బ్రెజ్జా, హ్యుందాయ్ వెన్యూ, కియా సొనెట్, మారుతి ఎస్-క్రాస్, మారుతి ఎక్స్ఎల్-6, టాటా హారియర్, మహీంద్రా ఎక్స్‌యూవీ500, మహీంద్రా బొలెరో మరియు మహీంద్రా స్కార్పియో వంటి మోడళ్లు కూడా అందుబాటులో ఉన్నాయి.