రెట్టింపు వృద్దితో దుమ్ములేపిన మారుతి ఎస్-క్రాస్

మారుతి సుజుకి గత ఏడాది ఇదే నెలలో 2,113 ఎస్-క్రాస్ లను విక్రయించగా, ఈ ఏడాది అక్టోబర్ నెలలో 5,510 యూనిట్ల ఎస్-క్రాస్ ఎస్‌యూవీలను విక్రయించింది.

2016 తో పోల్చుకుంటే మారుతి సుజుకి ఎస్-క్రాస్ వృద్ది 100 శాతానికి పైగా పెరిగింది. దీనికి ప్రధాన పోటీగా ఉన్నహోండా బిఆర్-వి(1,280) మరియు రెనో డస్టర్(919)ల కంటే అధికంగా విక్రయించింది.

మారుతి నెక్సా షోరూమ్ లలో మాత్రమే విక్రయిస్తున్న వాటిలో ప్రస్తుతం ఇగ్నిస్, సియాజ్ మరియు ఎస్-క్రాస్ ఉన్నాయి. ఎస్-క్రాస్ సేల్స్ ఇగ్నిస్(3,072) మరియు సియాజ్(4,170)ల కంటే అధికంగా అమ్ముడయ్యి, నెక్సా షోరూమ్ బెస్ట్ సెల్లింగ్ మోడల్‌గా నిలిచింది.

మారుతి సుజుకి తొలిసారి ఎస్-క్రాస్‍‌ను విడుదల చేసినపుడు ఆశించిన మేర సేల్స్ నమోదయ్యేవి కాదు. అయితే, అక్టోబర్ 1, 2017లో భారీ మార్పులు చేర్పులతో ఎస్-క్రాస్ ఫేస్‌లిఫ్ట్‌ను ప్రవేశపెట్టింది. దీంతో ఎస్-క్రాస్ సేల్స్ ఒక్కసారిగా ఊపందుకున్నాయి.

మారుతి సుజుకి ఎస్-క్రాస్ క్రాసోవర్ ఎస్‍‌యూవీ కేవలం డీజల్ ఇంజన్ వెర్షన్‌లో మాత్రమే లభిస్తోంది. ఎస్-క్రాస్‌లోని శక్తివంతమైన 1248సీసీ కెపాసిటి గల డీజల్ ఇంజన్ గరిష్టంగా 89బిహెచ్‌పి పవర్ మరియు 200ఎన్ఎమ్ టార్క్ ఉత్పత్తి చేస్తుంది. ఎస్-క్రాస్ కేవలం మ్యాన్యువల్ ట్రాన్స్‌మిషన్‌లో మాత్రమే లభిస్తోంది.

భద్రత పరంగా ఎస్-క్రాస్ ఫేస్‍‌లిఫ్ట్‌లో డ్యూయల్ ఫ్రంట్ ఎయిర్ బ్యాగులు, యాంటిలాక్ బ్రేకింగ్ సిస్టమ్, ఎలక్ట్రానిక్ బ్రేక్ ఫోర్స్ డిస్ట్రిబ్యూషన్ మరియు చిన్న పిల్లల సీట్లను బిగించడానికి ఐఎస్ఒఫిక్స్ చైల్డ్ సీట్ మౌంట్లు వంటి ఫీచర్లను అన్ని వేరియంట్లలో తప్పనిసరిగా అందించింది.