ఆ చైనా ఎలక్ట్రిక్ కారుకి పెరుగుతున్న డిమాండ్; జులైలో 600కి పైగా బుకింగ్స్!

జులై 2021లో ఎమ్‌జి జెడ్ఎస్ ఈవీ కోసం 600 యూనిట్లకు పైగా బుకింగ్స్ వచ్చాయని కంపెనీ పేర్కొంది. ఈ ఎలక్ట్రిక్ కారు కోసం పెరుగుతున్న డిమాండ్‌ను చూస్తుంటే సంతోషంగా ఉందని ఎమ్‌జి మోటార్ ఇండియా అధ్యక్షుడు మరియు మేనేజింగ్ డైరెక్టర్ రాజీవ్ చాబా తెలిపారు.

ఎమ్‌జి జెడ్ఎస్ ఈవీని తొలిసారిగా జనవరి 2020 లో భారతదేశంలో విడుదల చేశారు. ఈ ఏడాది ఫిబ్రవరి నెలలో కంపెనీ ఇందులో ఓ ఫేస్‌లిఫ్ట్ వెర్షన్‌ని కూడా విడుదల చేసింది. దేశీయ విపణిలో ఈ ఎలక్ట్రిక్ కారు రెండు వేరియంట్లలో మాత్రమే అందుబాటులో ఉంటుంది. వీటిలో ఎక్సైట్ అనే బేస్ వేరియంట్ ధర రూ.20.99 లక్షలు కాగా, ఎక్స్‌క్లూజివ్ టాప్-ఎండ్ వేరియంట్ ధర రూ.24.18 లక్షలు (ఎక్స్-షోరూమ్)గా ఉన్నాయి.

ఎమ్‌జి జెడ్ఎస్ ఎలక్ట్రిక్ కారులో ఉపయోగించిన మోటార్ గరిష్టంగా 141 బిహెచ్‌పి శక్తిని మరియు 353 ఎన్ఎమ్ టార్క్‌ను ఉత్పత్తి చేస్తుంది. ఇది 44.5 కిలో వాట్ అవర్ బ్యాటరీ ప్యాక్‌తో పనిచేస్తుంది. ఈ కారుకేవలం 8.5 సెకన్లలోనే గంటకు 0 - 100 కిమీ వేగాన్ని చేరుకుంటుంది.

రేంజ్ విషయానికి వస్తే, ఎమ్‌జి జెడ్ఎస్ ఈవీ పూర్తి చార్జ్‌పై గరిష్టంగా 419 కిమీ రేంజ్‌ను ఆఫర్ చేస్తుందని కంపెనీ పేర్కొంది. ఇది ఈ విభాగంలో టాటా నెక్సాన్ ఈవీ ఆఫర్ రేంజ్ (312 కిమీ) కన్నా ఎక్కువ మరియు హ్యుందాయ్ కోన ఆఫర్ చేసే రేంజ్ (452 ​​కిమీ) కన్నా తక్కువ.

ఎమ్‌జి జెడ్ఎస్ ఈవీ చార్జింగ్ సమయానికి వస్తే, హోమ్ ఛార్జర్ ద్వారా అయితే, జెడ్‌ఎస్ ఈవిని 80 శాతం వరకూ ఛార్జ్ చేయటానికి 6 నుండి 7 గంటల సమయం పడుతుంది. అదే 50 కిలోవాట్ల డిసి ఫాస్ట్ ఛార్జర్ ద్వారా అయితే, ఈ ఎస్‌యూవీని కేవలం 50 నిమిషాల్లోనే 0 నుండి 80 శాతం వరకు ఛార్జ్ చేసుకోవచ్చు.

ఎమ్‌జి జెడ్ఎస్ ఎలక్ట్రిక్ ఎస్‌యూవీలో త్రీ-లెవల్ బ్రేకింగ్ రీజనరేషన్ టెక్నాలజీ కూడా ఉంది, ఇది డ్రైవర్ బ్రేక్ నొక్కినప్పుడు బ్యాటరీలను ఛార్జ్ చేస్తుంది, ఫలితంగా డ్రైవింగ్ రేంజ్ పెరుగుతుంది. ఈ కారులోని బ్యాటరీ ప్యాక్ ఎనిమిది సంవత్సరాల వారంటీని కలిగి ఉంటుంది.

ఈ ఎలక్ట్రిక్ ఎస్‌యూవీలో స్టార్-రైడర్ గ్రిల్, ప్రొజెక్టర్ హెడ్‌ల్యాంప్‌లతో ఎల్‌ఈడి డిఆర్‌ఎల్‌లు, హీటెడ్ రియర్ వ్యూ మిర్రర్స్, రూఫ్ ట్రాక్స్, ఎల్‌ఈడి టెయిల్ లాంప్స్ మొదలైన ఫీచర్లు ఉన్నాయి. ఇంటీరియర్స్‌లో ఆపిల్ కార్‌ప్లే, ఆండ్రాయిడ్ ఆటో మరియు బ్రాండ్ యొక్క 'ఐ-స్మార్ట్' కనెక్టింగ్ టెక్నాలజీని సపోర్ట్ చేసే పెద్ద టచ్‌స్క్రీన్ ఇన్ఫోటైన్‌మెంట్ సిస్టమ్‌ ఉంటుంది.

ఇంకా ఇందులో, పూర్తి డిజిటల్ ఇన్‌స్ట్రుమెంట్ క్లస్టర్, 2.5 పిఎమ్ ఎయిర్-ఫిల్టర్, మల్టిపుల్ డ్రైవింగ్ మోడ్స్, కీలెస్ ఎంట్రీ, పుష్-బటన్ స్టార్ట్ / స్టాప్ మరియు స్మార్ట్‌ఫోన్ ద్వారా లేదా ఏఐ సహాయంతో మీ కారును కంట్రోల్ చేయటానికి 60కి పైగా కమాండ్స్ వంటి ఫీచర్లు కూడా ఉన్నాయి.